NBA. რეგულარული ჩემპიონატი: შემწყდარი სერიები

"ნიუ ორლეანისა" და "გოლდენ სტეიტის" მატჩს ინტრიგას სძენდა ის ფაქტი, რომ "მეომრებს" აკლდათ ორი წამყვანი მოთამაშე - ენდრიუ ბოგუტი (დისკვალიფიკაცია) და ანდრე იგუოდალა (ტრავმა). გარდა ამისა, "პელიკანსს" შეეძლო გამოეყენებინა ისიც, რომ "უორიორზი" ოდნავ ამოვარდნილია ფორმიდან, რაზეც მისი ზედიზედ სამი მარცხი ლაპარაკობდა.

სტუმრებმა თავიდანვე მოიპოვეს ინიციატივა და ჩვეული მხიარული თამაშით კომფორტული უპირატესობაც მიიღეს დიდი შესვენებისთვის, მაგრამ მეორე ტაიმში, როცა "მეომრებს" დაღლა დაეტყოთ, ინიციატივა "ნიუ ორლეანის" მხარეს გადავიდა. ენტონი დევისი და რაიან ანდერსონი სჯობნიდნენ მეტოქის წინა ხაზს ფარქვეშ ბრძოლაში, მასპინძელთა სნაიპერებმა კი სამქულიანების გამოყენების უკეთესი პროცენტი დააფიქსირეს.

საბოლოოდ, თამაშის ბედი ბოლო წამებზე გადაწყდა. "გოლდენ სტეიტმა" ბოლო მეოთხედში რამდენჯერმე შეძლო 5-6 ქულით წინ გასვლა, მაგრამ მეტოქე ყოველ ჯერზე ახერხებდა ანგარიშის გათანაბრებას. სირენამდე ერთი წამით ადრე კი "პელიკანებს" გამარჯვებაც შეეძლოთ: ერიკ გორდონმა წინააღმდეგობის გარეშე ისროლა სამქულიანი, მაგრამ თითქმის ჩავარდნილი ბურთი კალათიდან ამოვარდა. "უორიორზმა" ზედიზედ მეხუთედ დაამარცხა "პელიკანსი".

* * *
"ორლანდოს" დიდი ხანი არ ჰქონდა სტუმრად მოპოვებული გამარჯვება - ჟაკ ვონის გუნდის წარუმატებელი გასვლითი სერია 17 შეხვედრას უდრიდა და ის გასული სეზონიდან იღებდა სათავეს და 26 ნოემბერს ამ სერიის შეწყვეტის არანაირი პირობა არ არსებობდა. "ორლანდოს" ზედიზედ 11 მატჩი არ ჰქონდა მოგებული "ატლანტასთვის" - არც შინ და არც გასვლაზე.

მაგრამ ნებისმიერი სერია, ადრე თუ გვიან, სრულდება. პირველი ტაიმის ბრძოლაში წაგების შემდეგ, მესამე მეოთხედში სტუმრებმა მეტოქეს ნამდვილი დაბომბვა მოუწყვეს. განსაკუთრებით აქტიურობდა არონ აფლალო. მცველი არა მხოლოდ თავად უტევდა (18-დან 9 ზუსტი ტყორცნა, სამქულიანები - 4/7), არამედ კარგად ურთიერთქმედებდა დებიუტანტ ვიქტორ ოლადიპოსთან.

ამასობაში, "ატლანტას" მცველმა კაილ კორვერმა გააგრძელა ზუსტი სამქულიანების სერია. ეს კალათბურთელი ზედიზედ 88 მატჩია მინიმუმ ერთ შორეულ ტყორცნას ათავსებს კალათში. დენ ბაროსის აბსოლუტურ რეკორდამდე ერთი მატჩია დარჩენილი.

* * *
"ვაშინგტონი" შესუსტებული შემადგენლობით შეხვდა "ლეიკერსთან" მატჩს: დედაქალაქელებმა ორი კვირით დაკარგეს ბრედლი ბილი, მაგრამ "უიზარდსმა" არ შეიმჩნია ეს დანაკლისი, რადგან კარგად გამოიყურებოდნენ ტრევორ არიზა, მარტელ უებსტერი, ნენე ილარიო და ბრწყინვალე ფორმაში მყოფი ჯონ უოლი. ამ უკანასკნელმა კარიერაში პირველად დააგროვა ზედიზედ ორ მატჩში 30 ქულა, ბრაზილიელმა კი შედეგიანობის პირადი რეკორდი დაამყარა.

"ლეიკერსს" კადრების უფრო სერიოზული დეფიციტი აქვს. კვლავაც ლაზარეთშია კობი ბრაიანტი, ასევე ვერ ვიხილეთ მოედანზე სტივ ნეში და კრის კამანი.

კალიფორნიელთა რეზერვისტებმა, პირველ რიგში კი, ბრწყინვალედ მოთამაშე ჯორდან ფარმარმა (11-დან 9 ზუსტი ტყორცნა და 8 შედეგიანი პასი), ყველაფერი გააკეთეს მატჩის გადასარჩენად, მაგრამ "ლეიკერსს" ამისთვის სულ ცოტა დააკლდა. სირენამდე 11 წამით ადრე პაუ გასოლმა შესანიშნავად მოატყუა ნენე და თითქოს იოლადაც უნდა აეღო ორი ქულა, მაგრამ დაუჯერებელი ბურთი ააცილა და მატჩის გადარჩენის შანსი აღარ დარჩა.

* * *
როცა "ტორონტოსთან" მატჩის დამთავრებამდე ხუთი წუთით ადრე "ბრუკლინი" 15 ქულას იგებდა, ისე ჩანდა, რომ კანადელებს უკვე ვეღარაფერი გადაარჩენდა, რადგან "ნეტსის" გამოცდილი ვარსკვლავები არ დაუშვებდნენ თავიანთი გუნდის წაგებათა სერიის გაგრძელებას.

მაგრამ ამ ვარსკვლავებმა მოულოდნელად გაუშვეს მეტოქის 1:14 გაქცევა და გამარჯვებულის საკითხი ბოლო წამამდე ღიად რჩებოდა.

ძირითადი დროის დამთავრებამდე 11.2 წამით ადრე შონ ლივინგსტონმა საჯარიმო ააცილა და მასპინძლებს დაუტოვა ორქულიანი ჩამორჩენის გაბათილების შანსი, მაგრამ ყველაფერი გააფუჭა "რეპტორზის" მთავარმა მწვრთნელმა დუეინ კეისიმ. მან ტაიმ-აუტზე ორიგინალური, მაგრამ ძალიან მოულოდნელი კომბინაცია მოიფიქრა. მასპინძლებმა სამქულიანით პირდაპირ მოგება გადაწყვიტეს და სუფთა შორეული ტყორცნის შესასრულებლად გაიყვანეს... ცენტრი ამირ ჯონსონი. საბოლოოდ, კანადელებს ხელში არც ოვერტაიმი შერჩათ და არც მოგება.

ნ. ორლეანი-გ. სტეიტი 101:102
18:28, 31:29, 28:19, 24:26
ნ-ო: ანდერსონი (21+12 მოხსნა), ჰოლიდეი (17+7 პასი), გორდონი (16+7 პასი), დევისი (14+11 მოხსნა), სმიტი (14), ევანსი (12).
გ-ს: ტომპსონი (22+8 პასი), ლი (19), ო'ნილი (18+8 მოხსნა), კარი (16+9 პასი+8 მოხსნა+3 ჩაჭრა), ბარნსი (14).

ვაშინგტონი-ლეიკერსი 116:111
31:29, 28:26, 23:22, 34:34
ვ: უოლი (31+9 პასი+3 ჩაჭრა), ნენე (30), უებსტერი (20+9 მოხსნა+4 ჩაჭრა), გორტატი (15+8 მოხსნა), არიზა (13+3 ჩაჭრა).
ლ: ფარმარი (22+8 პასი), გასოლი (17+8 პასი), იანგი (16), ბლეიკი (15), ჯონსონი (11), ჰილი (10+8 მოხსნა), მიქსი (10).

ატლანტა-ორლანდო 92:109
25:26, 28:23, 20:36, 19:24
ა: ჰორფორდი (15), ტიგი (15+6 პასი), უილიამსი (11+8 პასი), მილსეპი (10).
ო: აფლალო (26), ნიკოლსონი (18+8 მოხსნა), ოლადიპო (18), ვუჩევიჩი (12+15 მოხსნა), მური (12).

ტორონტო-ბრუკლინი 100:102
28:26, 23:29, 25:26, 24:21
ტ: დეროზანი (27), ლოური (24+6 პასი), ნოვაკი (12).
ბ: ბლეტჩი (24), ჯონსონი (21), პირსი (16), გარნეტი (12).

კობის დაბრუნება გადაიდო?
"ლოს ანჯელეს ლეიკერსის" მცველმა კობი ბრაიანტმა ჟურნალისტებს განუცხადა, რომ მისი დაბრუნება აქილევსის მყესის დაზიანების შემდეგ, სავარაუდოდ, რამდენიმე კვირის შემდეგ შედგება.

"როგორც ჩანს, კიდევ რამდენიმე კვირა მომიწევს მოცდა", - განაცხადა ბრაიანტმა, რომელიც უფრო ადრე ამტკიცებდა, რომ ოფიციალურ მატჩებში მონაწილეობას უკვე ნოემბრის ბოლოს შეძლებდა.

შეგახსენებთ, რომ რამდენიმე დღის წინ კობიმ ახალი ხელშეკრულება გააფორმა კალიფორნიელ კლუბთან, რომელიც 2016 წლის ზაფხულამდე იქნება ძალაში და ამ დროის განმავლობაში კალათბურთელი 48 მილიონ დოლარს გამოიმუშავებს.

ყოველდღიური სპორტული გაზეთი "ლელო"

ასევე იხილეთ:
NBA. რეგულარული ჩემპიონატი - "პორტლენდი": ექვსი მოგება რეკორდამდე