NBA: სეზონის სიმბოლურები

ეროვნულმა საკალათბურთო ასოციაციამ გუშინ, 2014-15 წლების რეგულარული ჩემპიონატის შედეგების მიხედვით, სიმბოლური ნაკრებების შემადგენლობები დაასახელა.

NBA-ს ოფიციალური ვებგვერდის ინფორმაციით, ერთხმად შეიყვანეს პირველ სიმბოლურ ნაკრებში "გოლდენ სტეიტის" გამთამაშებელი სტივენ კარი და "კლივლენდის" ფორვარდი ლებრონ ჯეიმსი. თითოეულმა მაქსიმალური 645 ქულა მიიღო. ამ დუეტთან ერთად პირველ გუნდში ვხედავთ ჯეიმს ჰარდენს ("ჰიუსტონი", 637), ენტონი დევისსა ("ნიუ ორლეანი", 625) და მარკ გასოლს ("მემფისი", 453).

მეორე სიმბოლური ნაკრები შეადგინეს: რასელ უესტბრუკმა ("ოკლაჰომა-სიტი", 397), ლამარკუს ოლდრიჯმა ("პორტლენდი", 390), კრის პოლმა ("კლიპერსი", 335), პაუ გასოლმა ("ჩიკაგო", 242) და დემარკუს კაზინსმა ("საკრამენტო", 220).

მესამე ნაკრებში მოხვდნენ: ბლეიკ გრიფინი ("კლიპერსი", 189), დეანდრე ჯორდანი ("კლიპერსი", 175), ტიმ დანკანი ("სან ანტონიო", 167), კლეი ტომპსონი ("გოლდენ სტეიტი", 122) და კაირი ირვინგი ("კლივლენდი", 112).

***
- "კლივლენდის" გამთამაშებელმა კაირი ირვინგმა გაიმიზეზა მარცხენა მუხლის ტრავმა "ატლანტასთან" გუშინდელ მატჩში. თუმცა შეხვედრის დასრულების შემდეგ პლეიმეიკერმა დაარწმუნა "კავალიერზის" გულშემატკივრები, რომ შეძლებს შემდეგ მატჩში მოედანზე გასვლას.

- ამავე მატჩში "ჰოქსის" ფორვარდმა დემარ კეროლმა მარცხენა მუხლის ტრავმა მიიღო, რის გამოც პარტნიორების დახმარებით დატოვა მოედანი. უახლოეს ხანში კალათბურთელი სამედიცინო შემოწმებას გაივლის, რომელიც გაარკვევს დაზიანების ხარისხს.

- "გოლდენ სტეიტის" ლიდერი სტივენ კარი ლიგამ ხუთი ათასი დოლარით დააჯარიმა "ჰიუსტონთან" სერიის პირველ მატჩში სიმულაციისთვის. ამ ეპიზოდს ადგილი ჰქონდა შეხვედრის მეოთხე მეოთხედში.

- "მინესოტას" ლეგენდა კევინ გარნეტი, რომელიც ზამთარში დაბრუნდა მშობლიურ კლუბში, ჯერჯერობით არ ფიქრობს კარიერის დასრულებაზე. "მგლების" მთავარი მწვრთნელის, ფილიპ სონდერსის სიტყვებით, ფორვარდი აპირებს დაეხმაროს თავის გუნდს მომავალ სეზონში.

- ეროვნულმა საკალათბურთო ასოციაციამ დაასახელა 2014-15 წლების რეგულარული სეზონის საუკეთესო დამცველები.

პირველ ხუთეულში მოხვდნენ: კრის პოლი (კლიპერსი), კავაი ლეონარდი (სან ანტონიო), ტონი ალენი (მემფისი), დრეიმონდ გრინი (გოლდენ სტეიტი) და დეანდრე ჯორდანი (კლიპერსი).

მეორე ხუთეული: ჯონ უოლი (ვაშინგტონი), ჯიმი ბატლერი (ჩიკაგო), ენტონი დევისი (ნიუ ორლეანი), ტიმ დანკანი (სან ანტონიო) და ენდრიუ ბოგუტი (გოლდენ სტეიტი).

აღვნიშნავთ, რომ ტიმ დანკანი კარიერაში მეთხუთმეტედ მოხვდა საუკეთესო დამცველთა სიმბოლურ ხუთეულში.

ყოველდღიური სპორტული გაზეთი "ლელო"