ტესტირების ხარვეზის გამო მაკფადენს ორი, საქართველოს ნაკრებს კი ერთი ვარჯიში გაუცდა

საქართველოს ეროვნულმა ნაკრებმა ესპოოს "Metro არენაზე" დღეს მეორედ ივარჯიშა. დილის 11 საათზე დაგეგმილი ვარჯიში გაუქმდა, რადგან ჩამოსვლის დღეს კოვიდ19-ზე ჩატარებული ტესტებიდან თად მაკფადენს დადებითი დაუფიქსირდა. საქართველოს ეროვნული ნაკრების ამერიკელ უკანახაზელს კორონავირუსი გადატანილი აქვს და გამოჯანმრთელების შემდეგ ესპანურ კლუბ “ბურგოსში” არაერთი ტესტიც ჩაიტარა და მატჩებიც ითამაშა, თუმცა ვირუსის ამოუცნობი ბუნებისა თუ გუშინდელი ტესტირების ხარვეზის გამო მაკფადენს ორი, საქართველოს ნაკრებს კი ერთი ვარჯიში გაუცდა.

მაკფადენს დილას განმეორებითი ტესტი ჩაუტარდა და სანამ პასუხი მოვიდოდა, რომელიც უარყოფითი აღმოჩნდა, საქართველოს ნაკრების დელეგაცია სასტუმროში, მკაცრი კარანტინის პირობებში იმყოფებოდა. მიუხედავად იმისა, რომ “ბაბლის” ორგანიზატორი ფიბაა, კოვიდ19-თან დაკავშირებულ ყველა გადაწყვეტილებას ადგილობრივი, ამ შემთხვევაში ფინეთის შესაბამისი სამედიცინო უწყება იღებს. საქართველოს კალათბურთის ფედერაციის ხელმძღვანელობა მჭიდრო კომუნიკაციაში იყო ფინეთში საქართველოს საელჩოსთან და გაწეული მნიშვნელოვანი დახმარების საპასუხოდ დიდ მადლობას უხდის ფინეთში საქართველოს ელჩს, ბატონ მალხაზ კაკაბაძეს და დესპანს, ბატონ თორნიკე ნოზაძეს.

საქართველოს ნაკრებს ვარჯიშის უფლება საღამოს დართეს, სანამ მაკფადენის განმეორებითი ტესტის პასუხი მოვიდოდა, რის გამოც ილიას ზუროსის გუნდმა ნატურალიზებული ამერიკელის გარეშე ივარჯიშა. მაკფადენი მაღალი დონის პროფესიონალია და ზუროსის მიერ შემუშავებულ კომბინაციებს ალღოს კარგად უღებს. დღევანდელ ვარჯიშზე უფრო ის ახალბედები და ახალგაზრდები დაიტვირთნენ, რომლებსაც ნაკრებში თამაშის გამოცდილება არ აქვთ და მომავალი თამაშებისთვის ნაკრების სტაჟიან წევრებთან უნდა შეთამაშდნენ.

თუ არ ჩავთვლით მცირე მოთელვას, ვარჯიშის თითქმის მთელი დრო მოედანზე თამაშს დაეთმო. კალათბურთელებმა მთელი დრო კომბინაციების სრულყოფას დაუთმეს. ილიას ზუროსი მითითებებს ზომიერად იძლეოდა და მთლიანობაში, საქართველოს ნაკრების საღამოს ვარჯიში საკმაოდ ნაყოფიერი გამოდგა.

26 ნოემბერს, თამაშამდე 2 დღით ადრე, საქართველოს ნაკრების სამწვრთნელო შტაბმა კვლავ 2 ვარჯიში დაგეგმა.