გოგა ბითაძე ადრიატიკის ახალგაზრდული ლიგის ჩემპიონი და საუკეთესო მოთამაშეა [VIDEO]

გოგა ბითაძის "მეგა ბემაქსი" ადრიატიკის ახალგაზრდული (19-წლამდელები) ლიგის ჩემპიონი გახდა, 18 წლის ქართველი კალათბურთელი კი "ოთხთა ფინალის" უძვირფასეს მოთამაშედ (MVP) აღიარეს.

შეგახსენებთ, რომ სერბულმა გუნდმა ნახევარფინალში "იგოკეას" (ბოსნია-ჰერცეგოვინა) 73:70 სძლია, ქართველმა ცენტრმა კი 33:45 წუთში 17 ქულა, 14 მოხსნა (7 შეტევაში), 1 პასი, 1 ჩაჭრა და 2 დაფარება მოაგროვა.

ბითაძეს ტემპი არც ფინალში დაუგდია, სადაც "მეგა ბემაქსი" უმთავრეს ფავორიტად მიჩნეულ "ცრვენა ზვეზდას" გაეჯიბრა და მოულოდნელად იოლად – 82:60 სძლია. აღსანიშნავია, რომ პირველი ტაიმის მერე გოგას გუნდი 2 ქულით მარცხდებოდა, მე-2 ნახევარში კი მეტოქე 47:23 გაანადგურა.

ბითაძე სასტარტო ხუთეულში გამოჩნდა და 24:31 წუთში 17 ქულა, 8 მოხსნა (2 შეტევაში), 1 პასი, 1 ჩაჭრა და 2 დაფარება მიითვალა. ქართველმა ლეგიონერმა 9-დან 7 ორქულიანი და 4-დან 3 საჯარიმო ჩააგდო, ბურთი არ დაუკარგავს, ერთხელ დაუფარეს, 3 პერსონალური ფოლი მიიღო, მის წინააღმდეგ კი 6-ჯერ დაჯარიმდნენ.

თამაშის მერე გოგას საუკეთესო კალათბურთელისთვის განკუთვნილი პრიზი გადასცეს და ცხადია, ის "ოთხთა ფინალის" სიმბოლურ ხუთეულშიც მოხვდა.
ახალგაზრდულ დონეზე ტრიუმფის მერე ბითაძე "მეგა ბემაქსის" ძირითად გუნდს უბრუნდება და 30 იანვარს, ადრიატიკის ლიგის ძირითად გათამაშებაში, მაკედონიურ "სკოპიესთან" მატჩისთვის მოემზადება.

მომზადებულია GBF.GE-ს მიხდვით