ნაციონალურ საკალათბურთო ასოციაციაში "მილუოკი ბაქსი" "ინდიანა პეისერსს" ესტუმრა და 118:100 დაამარცხა.
ორივე გუნდის შემადგენლობაში მოედანზე ქართველი ლეგიონერები ვიხილეთ.
მასპინძელთა რიგებიდან გოგა ბითაძემ 5 წუთი ითამაშა, რა დროშიც 1 მოხსნა მიითვალა. სტუმრების მხრიდან კი სანდრო მამუკელაშვილმა 3 წუთში 2 ქულა და ამდენივე მოხსნა დააგროვა. ჩვენთვის გამორჩეული მომენტი მატჩის ბოლო წუთებზე მოხდა, როდესაც კალათბურთელები ერთმანეთს გულთბილად გადაეხვივნენ.
რაც შეეხება გამორჩეულ მოთამაშეებს, "ინდიანას" შემადგენლობიდან კარის ლევერტმა 23 ქულა, 2 მოხსნა და 1 შედეგიანი გადაცემა დააგროვა.
"ირმების" მხრიდან კი იანის ანტეტოკუნმპომ თავი 26
ქულით, 13 მოხსნით, 3 შედეგიანი გადაცემითა და 1 დაფარებით გამოიჩინა.
ამრიგად, "პეისერსი" 9 გამარჯვებითა და 13 მარცხით აღმოსავლეთ კონფერენციაში მე-13 ადგილს იკავებს, მომდევნო შეხვედრას კი ხვალ, 30 ნოემბერს, "მინესოტა ტიმბერვულვზის" წინააღმდეგ გამართავს.
"ბაქსი" 13 მოგებითა და 8 წაგებით იმავე აღმოსავლეთში მე-5 პოზიციაზე იმყოფება, შემდეგი ტურის მატჩს კი 2 დეკემბერს, "შარლოტ ჰორნეტსის" პირისპირ ჩაატარებს.
"გოლდენ სტეიტ უორიორსი" "ლოს ანჯელეს კლიპერსს" ესტუმრა და 15-ქულიანი უპირატესობით, 105:90 დაამარცხა.
მასპინძელთა მხრიდან საუკეთესო პოლ ჯორჯი გახლდათ, რომელმაც გუნდს 30 ქულა, 5 მოხსნა და ამდენივე შედეგიანი გადაცემა შესძინა.
"უორიორსის" შემადგენლობიდან კი სტეფ კარიმ თავი 33 ქულას, 5 მოხსნას, 6 შედეგიან გადაცემასა და ამდენივე ჩაჭრას მოუყარა.
გამოსარჩევია ჯორდან პულის თამაშიც, რომელმაც მესამე მეოთხედის მიწურულს პირადად მოახერხა და დააწინაურა საკუთარი გუნდი (ანგარიში 61:59 გახლდათ, რის შემდეგაც ჯორდანმა ზედიზედ 4 სამქულიანი ჩააგდო ბოლო მეოთხედის წინ და საკუთარ გუნდს 7-ქულიანი (75:68) უპირატესობა მოუპოვა. მატჩის ბოლოს კი მისი სტატისტიკური მონაგარი შემდეგნაირი გახლდათ - 17 ქულა, 3 მოხსნა, 2 შედეგიანი გადაცემა და 1 ჩაჭრა დააგროვა.
ასე და ამგვარად, "გოლდენ სტეიტი" 18 გამარჯვებითა და 2 მარცხით ლიგის საუკეთესო შედეგს აფიქსირებს, მომდევნო შეხვედრას კი 1-ელ დეკემბერს, "ფინიქს სანსის" წინააღმდეგ გამართავს.
"კლიპერსი" 11 მოგებითა და 9 წაგებით დასავლეთში მე-5 პოზიციაზე იმყოფება, შემდეგ თამაშს კი ხვალ, 30 ნოემბერს, "ნიუ ორლეანს პელიკანსის" პირისპირ ჩაატარებს.
"ლოს ანჯელეს ლეიკერსმა" "დეტროიტ პისტონსს" უმასპინძლა და 110:106 დაამარცხა.
მასპინძელთა შემადგენლობიდან საუკეთესო ლებრონ ჯეიმსი გახლდათ, რომელმაც თავი 33 ქულით, 5 მოხსნით, 9 შედეგიანი გადაცემით, 2 ჩაჭრითა და 1 დაფარებით გამოიჩინა.
რასელ უესტბრუქმა გუნდს 25 ქულა, 6 მოხსნა, 9 შედეგიანი გადაცემა და 1 ჩაჭრა შესძინა.
ენტონი დევისმა აქტივში 24 ქულა, 10 მოხსნა, 2 შედეგიანი გადაცემა, ამდენივე ჩაჭრა და 3 დაფარება ჩაიწერა.
რაც შეეხება "პისტონსს", ჯერემი გრანტმა 32 ქულა, 6 მოხსნა, 4 შედეგიანი გადაცემა და 1 დაფარება მიითვალა.
ამრიგად, "ლეიკერსი" 11 მოგებითა და ამდენივე წაგებით დასავლეთ კონფერენციაში მე-7 ადგილს იკავებს, მომდევნო შეხვედრას კი 1-ელ დეკემბერს, "საკრამენტო კინგსის" წინააღმდეგ გამართავს.
"დეტროიტი" 4 გამარჯვებითა და 16 მარცხით აღმოსავლეთში ბოლოსწინა, მე-14 პოზიციაზე იმყოფება, შემდეგი ტურის მატჩს კი იმავე 1-ელ დეკემბერს, "პორტლენდ ტრეილბლეიზერსის" პირისპირ ჩაატარებს.
