ნაციონალურ საკალათბურთო ასოციაციაში მორიგი შეხვედრები გაიმართა.
"მემფის გრიზლმა" "ლოს ანჯელეს ლეიკერსს" უმასპინძლა და 104:99 დაამარცხა.
მასპინძელთა შემადგენლობიდან ჯა მორანტმა თავი 41 ქულით, 10 მოხსნით, 2 შედეგიანი გადაცემით, ამდენივე ჩაჭრითა და დაფარებით გამოიჩინა.
კალიფორნიელების მხრიდან ლებრონ ჯეიმსმა გუნდს 37 ქულა (8/14 სამქულიანი), 13 მოხსნა, 7 შედეგიანი გადაცემა, 2 ჩაჭრა და 2-იც დაფარება შესძინა.
რასელ უესტბრუქმა 16 ქულა, 10 მოხსნა და 12 შედეგიანი გადაცემა მიითვალა.
ამრიგად, "გრიზლი" 22 გამარჯვებითა და 14 წაგებით დასავლეთ კონფერენციაში მე-4 ადგილზე იმყოფება. მომდევნო შეხვედრას 2022 წლის 1-ელ
იანვარს, "სან ანტონიო სპურსის" წინააღმდეგ გამართავს.
"ლეიკერსი" 17 მოგებითა და 19 მარცხით იმავე დასავლეთში მე-7 პოზიციას იკავებს, შემდეგი ტურის მატჩს კი, "მემფისის" მსგავსად, 1-ელ იანვარს "პორტლენდ ტრეილბლეიზერსის" პირისპირ ჩაატარებს.
"ჩიკაგო ბულზმა" "ატლანტა ჰოუქსს" უმასპინძლა და 131:117 დაამარცხა.
მასპინძელთა შემადგენლობიდან ზაკ ლავინმა 25 ქულა (5/7 სამქულიანი), 2 მოხსნა და 5 შედეგიანი გადაცემა მიითვალა.
ნიკოლა ვუჩევიჩმა გუნდს 16 ქულა, 20 მოხსნა, 1 შედეგიანი გადაცემა, 3 ჩაჭრა და 1 დაფარება შესძინა.
რაც შეეხება "ჰოუქსს", ტრეი იანგმა თავი 26 ქულით, 3 მოხსნითა და 11 შედეგიანი გადაცემით გამოიჩინა.
კლინტ კაპელამ აქტივში 18 ქულა, 15 მოხსნა და 3 შედეგიანი გადაცემა ჩაიწერა.
ამრიგად, "ბულზი" 22 გამარჯვებითა და 10 წაგებით აღმოსავლეთ კონფერენციაში მე-2 ადგილზე იმყოფება. მომდევნო შეხვედრას 2022 წლის 1-ელ იანვარს, "ინდიანა პეისერსის" წინააღმდეგ გამართავს.
"ატლანტა" 15 მოგებითა და 19 წაგებით იმავე აღმოსავლეთში მე-12 პოზიციას იკავებს, შემდეგ მატჩს კი ასევე 1-ელ იანვარს, "კლივლენდ კავალიერსის" პირისპირ ჩაატარებს.
