ნაციონალურ საკალათბურთო ასოციაციაში "ლოს ანჯელეს ლეიკერსმა" "კლივლენდ კავალიერსს" უმასპინძლა. მატჩი სტუმართა გამარჯვებით, 114:100 დასრულდა.
მასპინძელთა მხრიდან რასელ უესტბრუქმა 19 ქულა, 3 მოხსნა, 10 შედეგიანი გადაცემა, 2 ჩაჭრა და 1 დაფარება მიითვალა. მოგეხსენებათ, ლიგის ერთ-ერთი გამორჩეული კალათბურთელის თამაშით გულშემატკივრები უკმაყოფილო იყვნენ, რამდენიმე მატჩის წინ კი შეხვედრაში ჩართვა სათადარიგო სკამიდან დაიწყო და მისმა თამაშმაც უმალ მოიმატა.
ლებრონ ჯეიმსმა გუნდს 27 ქულა, 7 მოხსნა და 4 შედეგიანი გადაცემა შესძინა.
ენტონი დევისმა 19 ქულა, 12 მოხსნა, 4 შედეგიანი გადაცემა და 1 დაფარება დააგროვა.
"კავალიერსის" შემადგენლობიდან დონოვან მიტჩელმა 33 ქულა, 5 მოხსნა, 2 შედეგიანი გადაცემა, 1 ჩაჭრა და 1-იც დაფარება მიითვალა.
დარიუს გარლანდმა თავი 24 ქულით, 4 მოხსნითა და 7 შედეგიანი გადაცემით გამოიჩინა.
ამრიგად, კალიფორნიულ გუნდს ძალიან უჭირს, 2 მოგებითა და 7 წაგებით დასავლეთ კონფერენციაში მე-14 პოზიციას იკავებს, მომდევნო მატჩს კი ხვალ, 8 ნოემბერს, "იუტა ჯაზის" წინააღმდეგ ჩაატარებს.
საპასუხოდ, "კლივლენდი" სეზონის სტარტზე შესანიშნავად გამოიყურება, 8 გამარჯვებითა და 1 მარცხით აღმოსავლეთ კონფერენციაში მე-2 ადგილზე იმყოფება, იმავე 8 ნოემბერს კი "ლოს ანჯელეს კლიპერსს" დაუპირისპირდება.
