საკანდელიძისა და ქორქიას მემორიალური ტურნირი ისევ "ქუთაისმა" მოიგო

ზურაბ საკანდელიძისა და მიხეილ ქორქიას მემორიალის გამარჯვებული “ქუთაისია”. კოტე ტუღუშის გაწვრთნილმა ქუთაისელებმა ფინალურ შეხვედრაში თბილისური “მეგა” 93:78 დაამარცხეს და ტიტული შეინარჩუნეს. იმერულმა კლუბმა ზურაბ საკანდელიძისა და მიხეილ ქორქიას სახელობის ტურნირი შარშანაც მოიგო და ტიტულის შენარჩუნება წლეულსაც მოახერხა.

ქუთაისელთა მეტოქე გახლდათ “მეგა”, გუნდი, რომელიც წინა სეზონში “ა” ლიგაში ასპარეზობდა და ახლა სუპერლიგის დებიუტანტია. ნიკოლოზ ჩერქეზიშვილის გაწვრთნილმა გუნდმა მემორიალზე ღირსეულად ითამაშა, ფინალის საგზური მოიპოვა და ტიტულის მოგებასთან ახლოს იყო. სუპერლიგის ლიდერმა “ქუთაისმა” მეტოქეს შანსი არ დაუტოვა, მემორიალის ფინალურ მატჩს დაძაბულობა აკლდა. მასპინძლებმა შეხვედრა აღმავლობით ჩაატარეს და შეხვედრა ისე მოიგეს, საკუთარი უპირატესობა ეჭვქვეშ არ დაუყენებიათ.

ფინალური მატჩის დასრულების შემდეგ გაიმართა დაჯილდოების ცერემონიალი. თავდაპირველად დაჯილდოვდა ტურნირის საუკეთესო ახალგაზრდა კალათბურთელი. პრიზი ქუთაისის ზურაბ საკანდელიძის სახელობის საკალათბურთო კლუბმა დააწესა. პრიზის მფლობელი გახდა ქუთაისელი ლუკა გორგოძე, რომელიც კლუბის პრეზიდენტმა თემურ ქორიძემ დააჯილდოვა.

ტურნირის საუკეთესო უკანახაზელი ქუთაისელი ადრიან ბოუი გახდა, რომელიც საქართველოს კალათბურთის ეროვნული ფედერაციის საშეჯიბრო დეპარტამენტის ხელმძღვანელმა ზვიად კოტრიკაძემ დააჯილდოვა. საუკეთესო ფორვარდის ტიტული ქუთაისელთა გუნდის ლეგიონერ ჯარვის რეის ერგო, რომელიც საქართველოს პარლამენტის ქუთაისელმა მაჟორიტარმა დეპუტატმა ზაზა ლომინაძემ დააჯილდოვა.