დასანანი მარცხი იწვნია საქართველოს 18 წლამდე ქალთა ნაკრებმა. ლიკა ქაჯაიასა და ირინა მელქაძის გაწვრთნილმა გუნდმა აზერბაიჯანთან დაძაბულ ბრძოლაში მიმდინარე მატჩი 68:74 დათმო. არადა, საქართველოს რომ მოეგო, ჯგუფიდან გასვლას გაინაღდებდა, ახლა კი ყველაფერი ხვალინდელ შეხვედრაზეა დამოკიდებული. ჯგუფური ეტაპის ბოლო ტურის მატჩს საქართველოსა და ალბანეთს შორის რომელი გუნდიც მოიგებს, პლეი-ოფშიც ის გავა. აზერბაიჯანმა საქართველოს დამარცხებით ჯგუფში პირველი ადგილი გაინაღდა, ალბანეთმა კი სომხეთს მოუგო და საქართველოს მსგავსად, თითო მოგება-წაგება აქვს. შესაბამისად, ჯგუფიდან გამსვლელი მეორე გუნდის ვინაობაც მათ შორის მატჩში გადაწყდება, რომელიც 25 ივლისს,
საქართველომ აზერბაიჯანს პირველი პერიოდიც მოუგო და მეორეც. დიდი შესვენებისთვის ჩვენი ნაკრები 46:37 იგებდა, რაც არაა პატარა უპირატესობა. მესამე პერიოდში საქართველოს ნაკრებს ჩავარდნა ჰქონდა, მხოლოდ 8 ქულა მიითვალა, როცა აზერბაიჯანელებმა 18 ჩააგდეს და ბოლო პერიოდის წინ მინიმალური სხვაობით – 55:54 დაწინაურდნენ.
გადამწყვეტ პერიოდში თანაბარი ბრძოლა გაგრძელდა, თუმცა აზერბაიჯანელებმა ბოლო წუთებზე მოახერხეს ხელჩასაჭიდი უპირატესობის მოპოვება – 68:61. ჩვენი გოგონები ეცადნენ და ჩამორჩენა 3 ქულამდე – 68:71 შეამცირეს, თუმცა მეტის მისაღწევად დრო აღარ ეყოთ.
საქართველოს ნაკრებში 9 ქულით, 10 მოხსნით და 6 შედეგიანი გადაცემით სალომე სვანი გამოირჩა. მარიამ მუქერიამ 15 ქულა მოაგროვა. 15 მოხსნა და 4 ქულა ეთერ შონიას ანგარიშზე დაგროვდა.
GBF.GE
საქართველოს ქალთა U18 ნაკრებმა ევროპის C დივიზიონი სომხეთის ძლევით დაიწყო
