გურჯაანი, ქუთაისი, რაში, კავკასია, ორბი, მარგვეთი და დღეს ვსა-ც. ეს ის გუნდებია თანმიმდევრობის მიხედვით, რომლებმაც თასის მოქმედი მფლობელი თსუ დაამარცხეს. უნივერსიტეტელებმა ზედიზედ 7 მატჩი წააგეს და როცა ესეთ შედეგს რომელიმე გუნდი აჩვენებს, ცხრილის ბოლოში თუ არა, ქვედა ნაწილშია ხოლმე, თუმცა არა თსუ-ს შემთხვევაში. სანამ 7 მატჩს ზედიზედ წააგებდა, ლექსო ლაფანაშვილის გაწვრთნილ თსუ-ს ზედიზედ 8 მოგება ჰქონდა მოპოვებული და დღეს, მოგება-წაგებათა ხსენებული შეფარდებით სუპერლიგის ცხრილში მე-3 ადგილზეა.დიახ, თსუ-მ სეზონი ისე დაიწყო, ბევრს აფიქრებინა, ჩემპიონი წაუგებლად გახდებოდა თუ სამადლოდ 1-2 შეხვედრას
თსუ-მ დღეს ვსა-სთან პირწმინდად – 81:103 წააგო. უნივერსიტეტელებმა მეტოქეს წინააღმდეგობა მხოლოდ პირველ პერიოდში გაუწიეს, რომელიც ვსა-მ მხოლოდ 2 ქულით მოიგო, თუმცა მეორეში დავით ნოზაძის გაწვრთნილმა გუნდმა უპირატესობა მოიპოვა, რაც ანგარიშშიც ასახა – 52:41 დიდი შესვენებისთვის.
მესამე პერიოდი იგივე სცენარით გაგრძელდა – ვსა-ს ლიდერობამ 20 ქულას გადააჭარბა და მატჩს აზრი მალევე დაეკარგა. ბოლო პერიოდის წინ სხვაობა 24 ქულა იყო, რომელიც მალე 30-ზე ავიდა და … ვსა-მ ჩინებულად ითამაშა. გუნდის თითოეული წევრი, რომელიც მოედანზე იყო, შეცდომებს მინიმალურად უშვებდნენ, რასაც შეტევაში და დაცვაში ყოჩაღობით ანაზღაურებდნენ. გამოსარჩევია დავით კაკუშაძის შედეგიანი თამაში, ასევე ქსავიერ ჰილ-მეისის უნივერსალიზმი, რომელმაც 24 ქულა და 9 მოხსნა მოაგროვა.
საპირისპირო ამბავი ხდება გორის “ივერიონის” თავს. 7 არა, მაგრამ დავით როგავას გაწვრთნილმა გუნდმა ზედიზედ მე-5 შეხვედრა მოიგო, რისი წყალობითაც ცხრილის სათავეში მოექცა. მართალია, დაკარგული ქულებით გორელებს “ქუთაისი” და ვსა უსწრებენ, თუმცა 9 მოგება საკმაოდ ბევრია, რისი მოგროვებაც ამ მომენტისთვის ივერიონთან ერთად სწორედ ვსა-მ და “ქუთაისმა” მოახერხეს.
გორელებმა მორიგი შეხვედრა ზესტაფონში, “ბათუმთან” მოიგეს. აჭარის დედაქალაქის დარბაზში ტაბლო არის დაზიანებული, რომლის აღდგენაც, თვეზე მეტია, ვერ ხერხდება და ამის გამო ბათუმელები საშინაო შეხვედრებს ვერ მასპინძლობენ. ზესტაფონში ნომინალური მასპინძელი ბათუმი იყო, თუმცა გორის ივერიონმა ისე მწყობრად ითამაშა, მატჩის მოგება მოახერხა – 103:97 (სტატისტიკა). ამაში დიდი წვლილი რეჯი მესიდორს, 26 ქულისა და 12 პასის მიმთვლელ ამერიკელ უკანახაზელს მიუძღვის, რომელიც ტურის სიმბოლურში ხომ შევა და MVP-ის ტიტულის მოგების შანსიც დიდი აქვს. აღსანიშნავია ივანე მეგენეიშვილის მორიგი მძლავრი თამაში – 21 ქულა და 16 მოხსნა. 19 ქულა და 11 მოხსნა ჯეი პალის ანგარიშზე აკუმულირდა.
დღეს დაწყებული სუპერლიგის მე-18 ტური ხვალ, 12 მარტს, ზესტაფონსა და ტყიბულში გაგრძელდება. მარგვეთი გურჯაანის დელტას უმასპინძლებს, ორბი კი ქუთაისს დაუხვდება.
