29 ივნისი. კეიპტაუნი. გრინ პოინტ სთედიუმი. 22:30
ესპანეთი-პორტუგალია
სავარაუდო შემადგენლობები
ესპანეთი (4-2-3-1): კასილიასი - ს. რამოსი, პიკე, პუიოლი, კაპდევილა - ბუსკეტსი, ჩაბი ალონსო (ან მარტინესი) - ინიესტა, ჩავი, ვილია - ტორესი.
პორტუგალია (4-3-3): ედუარდო - ფერეირა, ალვეში, კარვალიო, კოენტრაო - ტიაგო, პეპე, მეირელეში - სიმაო, ლიდსონი, რონალდო.
არბიტრი: ექტორ ბალდასი (არგენტინა)
ამ ორ პირენეულ ქვეყანას შორის ხშირად ყოფილა მტრული ურთიერთდამოკიდებულება, ხანდახან კი ომიც კი. ამიტომაც, გასაკვირი სულაც არ არის, რომ სპორტის ნებისმიერ სახეობაში ესპანურ-პორტუგალიური დერბი განსაკუთრებული სტატუსისაა, განსაკუთრებით კი ფეხბურთში.
ეს ქვეყნები სანაკრებო დონეზე ერთმანეთს 33-ედ დაუპირისპირდებიან. ესპანეთის ნაკრებს დიდი უპირატესობა აქვს, "ფურია როხამ" "სელეშაუს" მოუგო 15 მატჩი და მხოლოდ 5 დათმო. პირენეული დერბი 12-ჯერ დასრულდა ფრით, ბურთების შეფარდებაც ესპანელთა სასარგებლოდაა - 71:37. მართალია, ეს მათი 33-ე დაპირისპირებაა, მაგრამ მუნდიალის ფინალურ ეტაპზე ესპანეთი და პორტუგალია პირველად ეთამაშებიან ერთმანეთს.
ესპანეთი მუნდიალის ერთ-ერთი მთავარი ფავორიტია და ბევრი მიიჩნევდა, რომ "ფურია როხა" თავიდანვე რიხით დაიწყებდა, მაგრამ გეგმა მაშინ ჩაიფუშა, როცა "ესპანური არმადა" შვეიცარიულ ციხე-სიმაგრესთან დაიმსხვრა. ვისენტე დელ ბოსკეს გუნდისათვის საბედნიეროდ, ეს წარუმატებლობა არ აღმოჩნდა საბედისწერო, ნაკრებმა შემდგომი ორი მატჩი მოიგო და ჯგუფი პირველ ადგილზე დაასრულა.
კარლუშ კეირუშის ნაკრები კი გამოცანად რჩება, გუნდმა "სიკვდილის ჯგუფი" დაუმარცხებლად, გოლის გაუშვებლად და ტურნირზე ყველაზე მეტი გატანილი გოლით (არგენტინასთან ერთად) დაასრულა, მაგრამ მაინც ვერ ვიტყვით, რომ პორტუგალია ბრწყინავს. და მაინც, ციფრები ერთობ შთამბეჭდავია - პორტუგალიის ნაკრებმა ბოლო 26 მატჩიდან 22-ში შეინახა კარი მშრალად და კეირუშის გუნდს არ წაუგია, აგერ უკვე 19 მატჩია.
ვისენტე დელ ბოსკე (ესპანეთის ნაკრების მწვრთნელი): "პორტუგალიის ნაკრები დიდებული გუნდია. ეს გუნდი მეტია, ვიდრე კრიშტიანო რონალდო. დიახ, კრიშტიანო პლანეტის ერთ-ერთი საუკეთესო ფეხბურთელია, მაგრამ არ დაგვავიწყდეს, რომ პორტუგალიის ნაკრებს გოლი არ გაუშვია ჩემპიონატში, რაც მისი დამსახურება ვერაფრით იქნება. ეს არის სოლიდური გაერთიანება შესანიშნავი ინდივიდუალებისა და არა უბრალო ჯგუფი: რონალდო პლუს სხვები. მეტოქე თამაშს უშეცდომო დაცვაზე და მწვავე კონტრშეტევებზე აგებს, რისთვისაც მას ბრწყინვალე შემსრულებლები ჰყავს. მე ძალიან რთულ მატჩს ვვარაუდობ, ისევე როგორც ყველა სხვა მერვედფინალურ შეხვედრაში. სხვანაირად გამორიცხულია, მუნდიალზე მხოლოდ საუკეთესოები დარჩნენ".
კარლუშ კეირუში (პორტუგალიის ნაკრების მწვრთნელი): "მზად ვართ ნებისმიერ მეტოქეს შევებრძოლოთ. მძიმე თამაშების გამოცდილება გვაქვს, რადგან ჩვენთვის საკვალიფიკაციო ეტაპი იოლი არ ყოფილა, ეს კი უთუოდ წაგვადგება ესპანეთის ნაკრებთან დაპირისპირებაში. მინდორზე მხოლოდ ერთი მიზნით გავალთ, ჩვენ უნდა დავრჩეთ მსოფლიოს ჩემპიონატზე, მეტოქე წავიდეს. პორტუგალიის საუკეთესო თამაში კიდევ წინაა".
ესპანეთის ნაკრების ცენტრალურმა მცველმა რაულ ალბიოლმა ჯვარედინი მყესები დაიზიანა და მისი თამაში გამორიცხულია. ის შაბათს ვარჯიშისას ცუდად დაეცა მინდორზე. ჩაბი ალონსომ მცირე ტრავმა ჩილესთან 2:1 მოგებულ მატჩში მიიღო. მართალია, ტრავმა არ არის სერიოზული, მაგრამ შესაძლოა მადრიდის "რეალის" ნახევარმცველმა სასტარტოში ადგილი დაკარგოს. ამ შემთხვევაში სასტარტოში ხავი მარტინესის გამოჩენაა მოსალოდნელი, ეს კი ნამდვილი სენსაცია იქნება. ჩავი უფრო შემტევ პოზიციაზე ითამაშებს, ორი საყრდენი ნახევარმცველის წინ. მიუხედავად იმისა, რომ ფერნანდო ტორესი საშინელ ფორმაშია, თამაშს მაინც ის დაიწყებს და არა დავიდ სილვა.
დეკუ კარგა ხანია გამოჯანმრთელდა, მაგრამ გვეეჭვება კეირუშმა კარგად მოთამაშე ტიაგო სკამზე დააბრუნოს და მასთან დაპირისპირებული ფეხბურთელი სასტარტოში დააყენოს. დანიმ მარცხენა ფეხის მცირე ტრავმა მიიღო და მისი თამაში საეჭვოა. მარჯვენა მცველად ალბათ პაულო ფერეირას ვიხილავთ, ხოლო პეპე ისევ საყრდენობას იტვირთავს.
ვფიქრობთ, ძალიან ბევრი იქნება დამოკიდებული იმაზე, თუ როგორ ითამაშებენ გუნდის ლიდერები. ამ მუნდიალზე ესპანელთა ლიდერად დავიდ ვილია წარმოჩინდა, ხოლო პორტუგალიელთა ლიდერი ვინც არის ყველას მოეხსენება...
ნიკოლოზ ნეფარიძე
