პარაგვაი - იაპონია 0:0 პენ. 5:3
პარაგვაი (4-3-3): ვილარი - ბონეტი, და სილვა, ალკარასი, მორელი - ვერა, ორტიგოსა (75. ბარეტო), რივეროსი - ბენიტესი (60. ვალდესი) - სანტა კრუსი (94. კარდოსო), ბარიოსი.
იაპონია (4-1-4-1): კავაშიმა - კომანო, ნაკაზავა, ტულიო, ნაგატომო - აბე (81. ნაკამურა) - ჰასებე, მაცუი (65. ოკაზაკი), ენდო, ოკუბო (106. ტამადა) - ჰონდა.
პენალტები: ბარეტო (1:0), ენდო (1:1), ბარიოსი (2:1), ჰასებე (2:2), რივეროსი (3:2), კომანო (ხარიხა), ვალდესი (4:2), ჰონდა (4:3), კარდოსო (5:3)
მატჩი დაიწყო: იაპონია; დარტყმა: 14(6)-12(4); ჯარიმა: 26-28; კუთხური: 6-5; ბურთის ფლობა: 60%-40%.
არბიტრი: ფრანკ დე ბლეეკერე (ბელგია)
საინტერესო მომენტები
20' - ლუკას ბარიოსმა ერთი მეურვე მოატყუა, მეკარესთან პირისპირ გავიდა, თუმცა ამ ორთაბრძოლაში კავაშიმამ იმარჯვა.
21' - მაცუიმ დაახლოებით ოცი მეტრიდან დაარტყა და მეტოქის კარის ხარიხა შეაზანზარა.
28' - პარაგვაელებმა კუთხური მოაწოდეს, ბურთი სანტა კრუსს მიუვიდა, რომელმაც ათიოდე მეტრიდან არაზუსტად დაარტყა.
39' - კეისუკე ჰონდამ დაარტყა დაახლოებით ოცი მეტრიდან, მცირდით არაზუსტად.
59' - რივეროსმა თავით დაარტყა მეტოქის კარში, თუმცა კავაშიმა აღმოჩნდა მოწოდების სიმაღლეზე.
95' - ამჯერად, ლუკას ბარიოსმა დაჰკრა თავური და კვლავ მეკარემ იმარჯვა.
98' - ნელსონ ვალდესმა დაარტყა ახლო მანძილიდან და კავაშიმამ გადაარჩინა იაპონია გაშვებულ გოლს.
მსოფლიოს ჩემპიონატი თერთმეტრიანების სერიის გარეშე მარლაც წარმოუდგენელია და აი, პირველი საფეხბურთო ლატარეაც ვიხილეთ. პარაგვაიმ და იაპონიამ 120 წუთის განმავლობაში ამაოდ უტიეს ერთმანეთს და საბოლოოდ, მეოთხედფინალში გამსვლელის ვინაობა პენალტებში გამოავლინეს. თუმცა, უტიეს ცოტა გადაჭარბებულად ნათქვამია - გუნდები პირველ რიგში საკუთარი კარის უსაფრთხოებაზე ფიქრობდნენ და გამომდინარე აქედან, მატჩის თერთმეტმეტრიანებამდე მისვლა, სრულიად ბუნებრივი გახლდათ.
ხერარდო მარტინომ ნელსონ ვალდესი თადარიგში დატოვა, რაც თითქოს იმის მომასწავებელი იყო, რომ პარაგვაის 4-4-2 ტაქტიკით უნდა ეთამაშა. თუმცა მთლად ასე არ მოხდა - ერთადერთი გამოკვეთილი ფორვარდი ლუკას ბარიოსი იყო, როკე სანტა კრუსი კი ფლანგიდან თამაშობდა, ისევე როგორც ედგარ ბენიტესი, ანუ ეს ერთგვარად 4-3-3-ც იყო. თუმცა, ეს უკანასკნელი უფრო მეტად გახლდათ ნახევარმცველების დახმარებაზე ორიენტირებული, ვიდრე ამას ვალდესი აკეთებდა წინა შეხვედრებში. მოკლედ, მარტინომ შუა ხაზი გაამაგრა და ამით, შეხვედრამ სანახაობრივი თვალსაზრისით აშკარად წააგო. თანაც, არ დაგვავიწყდეს, რომ იაპონიაც დაცვაზე ორიენტირებულ ფეხბურთს თამაშობს და პრინციპში, 120-წუთიანი უგოლო ფრეც ამ ყველაფრის ლოგიკური შედეგი გახლდათ.
ბურთს უფრო ხშირად პარაგვაელები ფლობდნენ და შესაბამისად, მეტი ხიფათიც იაპონელთა კართან შეიქმნა. ბარიოსსაც შეეძლო გატანა და სანტა კრუსსაც, თუმცა დამაგვირგვინებელ ფაზაში სცოდავდნენ. ამასთან, არ შეიძლება არ აღინიშნოს, რომ შესანიშნავი შეხვედრა ჩაატარა იაპონიის კიპერმა კავაშიმამ, რომელმაც არაერთი რთული დარტყმა მოიგერია. რაც შეეხებათ ამომავალი მზის ქვეყნის წარმომადგენლებს, როგორც უკვე აღვნიშნეთ, მეტოქის ნახევარზე გადასვლით დიდად არ იკლავდნენ თავს. ტრადიციულად, აქტიური იყო კეისუკე ჰონდა, რომელსაც პარაგვაისთანაც შეეძლო თავის გამოჩენა. ტაკეში ოკადამ შინჯი ოკაზაკით სცადა შეტევის გაძლიერება, თუმცა ამ საქმისგან ბევრი არაფერი გამოვიდა.
პრინციპში, შეგვიძლია ვთქვათ, რომ ეს იყო ერთ-ერთი ყველაზე დაძაბული, მაგრამ ამასთან, ერთ-ერთი ყველაზე ნაკლებად სანახაობრივი თამაში. პარაგვაიმ მეოთხედფინალში გააღწია და თამამად შეგვიძლია ვთქვათ, რომ პროგრამა მაქსიმუმი შეასრულა. ეს იმას არ ნიშნავს, რომ, სამხრეთამერიკელები ნახევარფინალში გასვლისთვის არ იბრძოლებენ, მაგრამ ნებისმიერ შემთხვევაში, მათ ისე მიიღებენ სამშობლოში, როგორც გმირებს.
საუკეთესო ფეხბურთელი
ეიჯი კავაშიმა (იაპონია)
შესაძლოა ბევრი შეგვედავოს, რადგან კავაშიმამ თერთმეტმეტრიანების სერიაში ყველა დარტყმა გაუშვა - მაგრამ, მიუხედავად ამისა, არჩევანი სწორედ იაპონელთა კიპერზე შევაჩერეთ. ვფიქრობთ, პენალტის გაშვებაში მეკარის დადანაშაულება არ შეიძლება, აი რაც შეეხება უშუალოდ შეხვედრას, აქ შესანიშნავად წარმოაჩინა თავი და დაამტკიცა, რომ მაღალი კლასის კიპერია. რამდენჯერმე მართლაც რომ ბრწყინვალე რეაქცია გამოავლინა და რომ არა მისი ასეთი გარჯა, თამაში უთუოდ ძირითად დროში დამთავრდებოდა.
მატჩის შემდეგ
როკე სანტა კრუსი (პარაგვაის ნაკრების ფორვარდი): "ძალიან რთული თამაში იყო, რომელიც საბედნიეროდ ჩვენი გამარჯვებით დასრულდა. საფეხბურთო ღმერთი სამართლიანია და იმას გადახედა მოწყალე თვალით, ვინც მომდევნო ეტაპზე გასვლა უფრო მეტად დაიმსახურა. მთელი შეხვედრა ჩვენი უპირატესობით წარიმართა და ყველა ლოგიკით, თამაში ძირითად დროშივე უნდა დაგვესრულებინა. თუმცა, ამაზე საუბარი აღარ ღირს - მთავარია, რომ მეოთხედფინალში სწორედ ჩვენ ვიასპარეზებთ".
ლაშა წიკლაური
