საფრანგეთის ნაკრების თამაში იდეალურისგან ცოტა შორსაა და დიდიე დეშამით ბევრია უკმაყოფილო. თქმაც არ უნდა იმას, რომ თუ "მამლები" პლეი ოფში უკრაინას ვერ აჯობებენ და მსოფლიოს ჩემპიონატის საგზურს ვერ მოიპოვებენ, დეშამს მოხსნიან. ნერვიულობს თავად დიდიეც და თავსაც იზღვევს."ვფიქრობ, აშკარა ფავორიტებად ნაადრევად შეგვრაცხეს. უკრაინა ძალიან ცოტას უშვებს. კონოპლიანკა და იარმოლენკო მათი მხრიდან მთავარ საფრთხეს წარმოადგენენ. მეტოქე ძალიან ძლიერია ფლანგებზე. ცხადია, საკუთარი გულშემატკივრის მხარდაჭერა გვექნება, მაგრამ სტადიონი კიევშიც სავსე იქნება. უკრაინის ნაკრები ტურისტების ჯგუფი არ გეგონოთ" - თქვა დეშამმა.
პირველი მატჩი სწორედ
"მსოფლიოს ჩემპიონატის ფინალურ ეტაპზე გასვლა ფრანგული ფეხბურთისთვის ძალიან მნიშვნელოვანი და საჭიროა. ვთვლი, რომ შესაბამისი ატმოსფეროს შექმნის თხოვნა არ უნდა მჭირდებოდეს, მაგრამ საერთო დამოკიდებულებასა და განწყობას დიდი მნიშვნელობა აქვს. ამიტომ იმედს ვიტოვებ, ნეგატიური ფონი არ იქნება.
საფრანგეთის მწვრთნელად იმისთვის მოვედი, რომ კარგი გუნდი გავაკეთო. ჩვენ აუცილებლად უნდა მოვხვდეთ მუნდიალზე და უნდა ავაშენოთ ისეთი ნაკრები, რომელსაც 2016 წლის საშინაო ევროპის ჩემპიონატზე დავეყრდნობით" - განაცხადა "დიდიმ".
ფიფას უარი უკრაინას
სამზადისია საპირისპირო ბანაკშიც. უკრაინელებს ჰქონდათ იმედი, რომ ფიფა მათ ყვითელ ბარათებს ბათილად სცნობდა. სარჩელის მთავარი არგუმენტი ის გახლდათ, რომ ფრანგები უფრო მოკლე ჯგუფში იყვნენ და ნაკლები მატჩის გამართვა მოუხდათ, უკრაინას კი ორით მეტის და გაფრთხილებების ერთ-ერთი გამომწვევი მიზეზი იყო, ყოველ შემთხვევაში, ალბათობას ზრდიდა.
ფიფამ ეს მოთხოვნა არ დააკმაყოფილა, რადგან რეგლამენტის მიხედვით, ერთ შესარჩევ ციკლში ბარათების ორგზის ამნისტია გათვალისწინებული არ არის და ვერ მოხდებაო. შესაბამისად, უკრაინელები მართლაც ვერ არიან სახარბიელო მდგომარეობაში, მათ ერთბაშად 10 ფეხბურთელი ჰყავთ "ყვითელზე": რუსლან როტანი, ნიკოლაი მოროზიუკი, ევგენი სელეზნიოვი, ედმარი, ანატოლი ტიმოშჩუკი, იაროსლავ რაკიცკი, ევგენი კონოპლიანკა, არტიომ ფედეცკი, მარკო დევიჩი და ოლეგ გუსევი.
ამიტომ დიდი შანსია, რომ რამდენიმე მათგანს საპასუხო თამაშის გამოტოვება მოუხდეს და თან, გაფრთხილების მიღების შიშის გამო ფეხბურთელებზე დამატებითი ფსიქოლოგიური წნეხი იქნება.
მომავალ დაპირისპირებას გამოეხმაურა უკრაინის ნაკრების ყოფილი ფორვარდი ანდრეი შევჩენკოც. ლეგენდად ქცეულ ფეხბურთელს პირდაპირ არ უთქვამს, მაგრამ ირიბად კი მიგვანიშნა - უკრაინას ჩემი თავი აკლიაო. შევა ფრანკ რიბერისაც შეეხო.
"ნაკრებს ახლა საინტერესო პერიოდი უდგას. ძლიერი მხარე ნახევარდაცვაა - კონოპლიანკა და იარმოლენკო ჩინებული ჰავბეკები და ძალიან კარგი ფეხბურთელები არიან. მიხაილ ფომენკომ გუნდში მშვენიერი გარემო შექმნა და უკრაინა დღეს სახიფათო ნაკრებია. ერთი, რაც გვაკლია, სტაბილურად გამტანი ცენტრალური თავდამსხმელია. ბევრი კარგი ფორვარდი გვყავს, მაგრამ მათ ცოტა გოლი გააქვთ.
ეს ორმატჩიანი დუელი განსაკუთრებული იქნება რიბერისთვის. თუ მას "ოქროს ბურთის" მოგება სურს, თავი კარგად უნდა წარმოაჩინოს. ვფიქრობ, ძალიან კარგი და დინამიკური მატჩები გველოდება" - გვითხრა შევჩენკომ.
ყოველდღიური სპორტული გაზეთი "ლელო"
ასევე იხილეთ:
დიდიე დეშამის გადამწყვეტი სია
