მილტონ ჰეიგმა მამუკა გორგოძის ნაკრებში დაბრუნებასთან დაკავშირებით ისაუბრა

მთავარმა მწვრთნელმა თავდაპირველად მომავალი შეხვედრის და სტადიონის გავსების მნიშვნელობაზე ისაუბრა:

"ბედნიერები ვართ, რომ გვეძლევა საშუალება, ტიერ1-ის გუნდს მშობლიურ მიწაზე ვეთამაშოთ. გვაქვს შესაძლებლობა, რომ ჩვენი მეგობრების, ოჯახის წევრების და რაც მთავარია, ქვეყნის წინაშე წარმოვაჩინოთ საკუთარი თავი. ამ თამაშის ისტორიული მნიშვნელობა ჩვენთვის დამხმარე ფაქტორია და მას გვერდზე არ გადავდებთ, ეს კიდევ უფრო გვაძლიერებს.

ტრიბუნების მხარდაჭერა უმნიშვნელოვანესია და გულშემატკივრებთან ერთად ბევრად უფრო ადვილია თამაში. გარდა ამისა, ეს მნიშვნელოვანია ექვსი ერის გადაწყვეტილების მიმღებებისთვისაც. მათ უნდა დაინახონ, საქართველოში ასეთ მატჩებზე სტადიონი პირთამდე ივსება. მინდა მოვუწოდო ქომაგებს, რომ ხვალ საღამოს მოვიდნენ სტადიონზე და მთელ მსოფლიოს დაანახონ, როგორ უყვართ რაგბი საქართველოში".

ჰეიგს გავრცელებული ამბის შესახებაც ჰკითხეს, რომლის თანახმად, ტრავმირებული გიორგი ცუცქირიძის ნაცვლად, ნაკრებს შესაძლოა მამუკა გორგოძე დაუბრუნდეს:

"მამუკას ნაკრებში დაბრუნების ამბავს ამ ეტაპზე ვერ დავადასტურებ. ამის შესახებ მამუკასთან არაერთხელ გვისაუბრია. რა თქმა უნდა, ცუცქირიძის ტრავმის შემდეგაც გვქონდა საუბარი, თუმცა ეს სელექციის საკითხია და როდესაც ჩავატარებთ შოტლანდიასთან მატჩს, მწვრთნელები ამის შემდეგ ვისაუბრებთ აღნიშნულ საკითხზე", - თქვა ჰეიგმა და შარიქაძის ტრავმასთან დაკავშირებით განაცხადა:

"შარიქაძე სამკვირიან სარეაბილიტაციო პერიოდს გაივლის, რის გამოც შოტლანდიასთან ორივე მატჩს გამოტოვებს. ვიმედოვნებთ, რომ რეაბილიტაცია კარგად ჩაივლის და ის მსოფლიო თასზე ჩვენთან ერთად იქნება. არაა გამორიცხული, რომ მერაბი იაპონიაში პირველ ორ თამაშშიც დაგვაკლდეს და მხოლოდ ამის შემდეგ შემოგვიერთდეს".

რაც შეეხება მსოფლიო თასის მოლოდინებს, მთავარი მწვრთნელი ამბობს:



მიხეილ ნარიაშვილი ხვალ გახდება 31-ე მორაგბე, რომელსაც "ბორჯღალოსნებისთვის" უკაპიტნია. მან ამ პასუხისმგებლობაზე ისაუბრა და იმედი გამოთქვა, რომ შარიქაძე კუთვნილ ადგილს მალე დაუბრუნდება:

"მილტონის სიტყვებს ვერაფერს დავამატებ, ყველანი ბედნიერები ვართ შოტლანდიასთან საქართველოში თამაშის შესაძლებლობით. მოთამაშეები მაქსიმუმს გავაკეთებთ, რათა ეს შეხვედრა მაღალ დონეზე ჩავატაროთ.

ჩემთვის რთულია წინა შეხვედრაზე საუბარი, რადგან არ მითამაშია, თუმცა ვფიქრობ, რომ ნორმალური იყო. ეს იყო პირველი მოსამზადებელი მატჩი, რომელმაც დაგვანახა, რა გვაქვს გასაუმჯობესებელი და რას ვაკეთებთ კარგად. გავაანალიზეთ შეცდომები, ვუყურეთ შოტლანდიის თამაშსაც და ვეცდებით, ბევრად უფრო დალაგებული, სწრაფად მოაზროვნე გუნდი ვიყოთ.

ბედნიერი ვიქნებოდი, ახლა ეს ადგილი მერაბს რომ ჰქონდეს დაკავებული. ყველანი დამწუხრებულები ვართ მომხდარით. გუნდისთვის ძალიან რთულია ორი ისეთი მოთამაშის დაკარგვა, როგორებიც შარიქაძე და ცუცქირიძე არიან. მაგრამ ჩვენ არ შეგვიძლია უკან დარჩენა, აუცილებლად უნდა გავაგრძელოთ წინსვლა. ვიმედოვნებთ, რომ მერაბი მალე შეძლებს დაბრუნებას და ჩვენთან ერთად იქნება მსოფლიო თასზე.