ლეგიონერები: ორი ლელო პრო დე2-ში

საფრანგეთის მეორე ელიტარული დივიზიონის, პრო დე2-ის განვლილ ტურში ორი ქართული ლელო გავიდა. მიმდინარე სეზონში თავი პირველად გამოიჩინა ვეტერანმა ბურჯმა ირაკლი მირცხულავამ, ხოლო ახალგაზრდა კვაჭმა ლუკა ნიორაძემ საკუთარი გუნდის სასტარტო შემადგენლობაში მოხვედრა სადებიუტო ლელოთი აღნიშნა.

20 წლის მორაგბე "ორიაკში" ზაფხულში გადავიდა და ერთწლიანი კონტრაქტი გააფორმა. კლუბის ხელმძღვანელობა მისი უნარებით და საქმისადმი მიდგომით კმაყოფილი დარჩა და 13 იანვარს კონტრაქტი ორი წლით გაუხანგრძლივა.

ტოპ 14

ტოპ 14-ის ლიდერმა "ლიონმა" "ტულონის" 12-მატჩიანი წაუგებელი სერია შეწყვიტა – 27:12. მასპინძლებმა სამი უპასუხო ლელო გაიტანეს და ბონუსიც ჩაიწერეს. მათ რიგებში 67-ე წუთიდან ითამაშა კვაჭმა ბადრი ალხაზაშვილმა. სტუმართა ძირითადში იყო ბურჯი ბექა გიგაშვილი, რომელმაც მოედანზე 52 წუთი გაატარა.

მე-14 ტურში ქართველების "ბრივმა" უშუალო კონკურენტ "პოს" უმასპინძლა და დასკვნით 5 წუთში გატანილი ორი ლელოთი 33:26 დაამარცხა. "ბრივის" შემადგენლობაში პირველიდან 53-ე წუთამდე ითამაშა კახა ასიეშვილმა, ხოლო ვასილ ლობჟანიძე მოედანზე 63-ე წუთზე გამოჩნდა.

კიდევ ერთი "ქართული გუნდი" "მონპელიე" "ლა როშელთან" სტუმრად გამართულ მატჩში 64-ე წუთამდე მეტოქეს 21 ქულით ჩამორჩებოდა (11:32), მერე სამი ლელო გაიტანა, მაგრამ მხოლოდ ბონუსს დასჯერდა – 30:35. სტუმართა შემადგენლობაში ხუთმა ქართველმა ლეგიონერმა ითამაშა და მათგან სამი ძირითადში იყო. შეუცვლელად გაისარჯა მეორეხაზელი კოტე მიქაუტაძე; მიხეილ ნარიაშვილმა მოედანზე 49 წუთი გაატარა და მის ნაცვლად თამაშში უშანგი ჭეიშვილი ჩაერთო; სასტარტო შემადგენლობაში იყო და 77-ე წუთზე ალექსი ჭიჭიაშვილი შეცვალა ლევან ჩილაჩავამ. 18 წლის ჭიჭიაშვილისთვის ეს სადებიუტო მატჩი იყო "მონპელიეს" პირველ გუნდში.

"რასინგ 92"-მა "კასტრს" სტუმრად 27 უპასუხო ქულა გაუტანა და ბონუსით დაამარცხა – 27:0. პარიზელთა განაცხადში წელს მესამედ მოხვდა ბურჯი გურამ გოგიჩაშვილი და ის თამაშში 52-ე წუთიდან ჩაერთო.

"კლერმონმა" აუტსაიდერ "სტად ფრენსეს" ქართველი ლეგიონერების გარეშე უმასპინძლა და 29:19 დაამარცხა. პარიზელთა შორის 72-ე წუთიდან ითამაშა გიორგი მელიქიძემ.

ტოპ 14-ში დარჩენისთვის მებრძოლმა "აჟენმა" "ბეიონს" სტუმრად ლელო 78-ე წუთზე გაუტანა, გარდასახვაც ზუსტი იყო და მისი წყალობით 23:22 იმარჯვა. სტუმართა წარმატებაში საკუთარი წვლილი შეიტანა გიორგი თეთრაშვილმა, რომელმაც პირველიდან 55-ე წუთამდე ითამაშა.

ლიდერთა ჯახში "ბორდო" "ტულუზთან" სტუმრად 14:22 დამარცხდა და პირველი ადგილი "ლიონს" დაუთმო. ბორდოელთა შორის 56-ე წუთზე შეცვლაზე შევიდა ლექსო ყაულაშვილი.

პრო დე2

პრო დე2-ის მიმდინარე სეზონში პირველი ლელო გაიტანა ბურჯმა ირაკლი მირცხულავამ. მე-18 ტურში მისი "ოიონა" "ბიარიცს" მასპინძლობდა და 31:22 იმარჯვა. მირცხულავა სასტარტო შემადგენლობაში იყო, 62 წუთი ითამაშა და ლელო 36-ეზე გაიტანა, რითაც ანგარიში გაათანაბრა.

საფრანგეთში თავისი პირველი ლელო გაიტანა "ორიაკის" 20 წლის კვაჭმა ლუკა ნიორაძემ. ის პრო დე2-ში მესამე შეხვედრას ატარებდა, პირველად იყო სასტარტო შემადგენლობაში და თავი მე-8 წუთზე გამოიჩინა. "ორიაკმა" "რუანი" მიიღო, სამი უპასუხო ლელო გაუტანა და ბონუსით, 22:6 დაამარცხა. ნიორაძე 64-ე წუთზე შეცვალეს. მასპინძლების მარქაფაში იყო და 64-ე წუთიდან ჩაერთო თამაშში ჯემალ შათირიშვილი, ხოლო გიორგი ცუცქირიძე შეცვლაზე 55-ე წუთზე შევიდა.

"კოლომიემ" "ვანს" უმასპინძლა და 23:7 დაამარცხა. გამარჯვებულთა სასტარტო შემადგენლობაში იყო ბურჯი ბექა შეყლაშვილი. ის 49-ე წუთზე შეცვალეს, თუმცა 4 წუთში მოედანზე დაბრუნება მოუწია და 78-მდე ითამაშა. ის ტურის სიმბოლურ ნაკრებში მოხვდა.

"ნევერმა" "პროვანსს" უმასპინძლა, ექვსი ლელო გაუტანა და ბონუსით, 43:13 დაამარცხა. მასპინძელთა განაცხადში ორი ქართველი ბურჯი იყო. ილია კაიკაციშვილი გასინბინებული თანაგუნდელის ნაცვლად თამაშში 10 წუთით, 24-ე წუთიდან ჩაერთო, ხოლო სრულფასოვან შეცვლაზე 47-ე წუთზე შევიდა. 47-ე წუთიდან ითამაშა თორნიკე მატარაძემაც.

ლიდერი "გრენობლი" "ბეზიეს" ეწვია და 25:16 დაამარცხა. სტუმართა რიგებში 61 წუთი ითამაშა ბურჯმა დავით ქუბრიაშვილმა.

"მონ-დე-მარსანმა" "პერპინიანი" მიიღო და 34:14 დაამარცხა. გამარჯვებულთა შორის 58-ე წუთიდან ითამაშა ლაშა მაჭარაშვილმა, ხოლო გელა მურუსიძე შეცვლაზე 67-ე წუთზე შევიდა.

ინგლისის ჩემპიონშიფის მე-10 ტურში "ლონდონ სქოთიშმა" "ეალინგ ტრაილფინდერს" უმასპინძლა და ლელოუხვ მატჩში 26:42 დამარცხდა. ახალ გუნდს კარგად მოერგო მეორეხაზელი ნოდარ ჭეიშვილი. ის ამჯერადაც განაცხადში იყო და შეცვლაზე 48-ე წუთზე შევიდა.