იოსებ ტყემალაძე: "შავი ლომის" მნიშვნელობასა და პერსპექტივებზე

“ერთი თამაში მიმდინარე სეზონშიც უკვე მოვიგეთ, დავამარცხეთ ფრანგული ‘ვანი’ და თუ 11 იანვარს ‘ბაიონასთანაც’ გავიმარჯვებთ, ჯგუფიდან გასვლის ძალიან დიდი შანსი გაგვიჩნდება, რაც კიდევ ერთი ზარი იქნება დიდი სარაგბო ოჯახისთვის, რომ ქართველები მოვდივართ! და ამ კუთხით ერთ-ერთი უმნიშვნელოვანესი გულშემატკივრის ფაქტორი იქნება, რომელთა სიმრავლე ერთის მხრივ ბიჭებისთვისაა მნიშვნელოვანი და მეორეს მხრივ ქართული რაგბის წინსვლისთვის, რათა მომავალში კიდევ უფრო მაღალი დონის ტურნირები ვითამაშოთ” - აღნიშნავს ტყემალაძე.

პერსპექტივა - გაერთიანებული რაგბის ჩემპიონატი

იოსებ ტყემალაძე იმედოვნებს, რომ უახლოეს მომავალში ‘შავი ლომი’ კიდევ ერთ უმაღლესი დონის ტურნირში, გაერთიანებულ რაგბის ჩემპიონატში ჩაერთვება, სადაც ირლანდიური, უელსური, შოტლანდიური, იტალიური და სამხრეთ აფრიკული ფრენჩაიზები თამაშობენ და მთელი სეზონი გრძელდება.

მასში ამჟამად 16 გუნდი თამაშობს და განიხილება კიდევ ორი გუნდის დამატების შესაძლებლობა და თუ ეს განხორციელდა, ტურნირის ფარგლებში ‘შავ ლომს’ მინიმუმ 18-20 მაღალი დონის თამაში ექნება - მათგან ნახევარი საქართველოში.

“თუკი რამ შესაძლებელია ყველაფერს ვაკეთებთ, რათა გაერთიანებულ რაგბის ჩემპიონატში ჩავერთოთ. ეს არის უმაღლესი დონის საკლუბო ტურნირი, რომელიც გზას გვიხსნის ჩემპიონთა თასისკენ. ნებისმიერ შემთხვევაში, იქ ჩართვით ‘შავი ლომი’ მიიღებს 18-20 მაღალი ინტენსივობის თამაშს, რასაც ემატება ჩელენჯ თასის მინიმუმ 4 შეხვედრა. ამ შემთხვევისთვის, მაღალი მიღწევების ჯგუფთან ერთად განვიხილავთ საფრანგეთიდან იმ მოთამაშეების დაბრუნებას, რომლებიც ისეთ კლუბებში თამაშობენ, რომ მათ განვითარებას ვერ უზრუნველყოფენ. ეს მოთამაშეებისთვისაც სასურველი იქნება, რადგან სწორედ ისეთი გუნდების წინააღმდეგ ითამაშებენ, რისი სურვილიც აქვთ”.

“რაგბის გაერთიანებული ჩემპიონატის საბჭო ამ საკითხის განსახილველად იანვარში შეიკრიბება და ჩვენ მასში სრულად ვართ ჩართული. თუ დადებითი გადაწყვეტილება იქნება, ეს დააკომპენსირებს იმ მაღალი დონის თამაშების ნაკლებობას, რომელსაც ჩვენი ეროვნული ნაკრები განიცდის. 20-წლამდელების 6-ერში და ‘შავი ლომის’ გაერთიანებულ ჩემპიონატში ჩართვა პროგრამა მაქსიმუმი იქნება უახლოეს 1-2 წელიწადში და მერე ისეთ შედეგებს მივიღებთ, ისეთ ტიერ1-ის გუნდებს დავამარცხებთ, რომ ექვსი ერი თვითონ გაგვიღებს კარებს”.

“ამიტომ, სულმოუთქმელად ველით იანვრის შეხვედრას, თუმცა ისინიც უყურებენ ჩვენს ქვეყანაში მიმდინარე მოვლენებს, რადგან მათთვის მნიშვნელოვანია სტაბილურობა. აქვე ისიც უნდა აღინიშნოს, რაც სტუმრად ჩამოსულმა ფრანგებმა თქვეს - თქვენთან სრული მშვიდობაა იმასთან შედარებით, რაც ჩვენთან “ყვითელი ჟილეტების” გაფიცვის დროს ხდებოდაო. მაგრამ ორგანიზატორები მაინც ღელავენ საფრთხეებსა და რისკებზე”.

“ქართველებს გვიყვარს თქმა - უნდა მოვიგოთ, მაგრამ ამ თითოეული გამარჯვების თუ წინსვლის უკან უამრავი ადამიანის ღვაწლია ჩადებული - მოთამაშეების, მწვრთნელების, მთლიანად რაგბის კავშირის და საქართველოს მთავრობის. მთავრობის მხარდაჭერის გარეშე, ‘შავი ლომის’ ჩელენჯ თასში ჩართვის პროექტი ვერ შედგებოდა, რადგან პატარა ციფრებზე არაა საუბარი და ახლა მათთან ინტენსიურ მსჯელობაში ვართ გაერთიანებულ ჩემპიონატში ჩართვასთან დაკავშირებით”.

“ეს მნიშვნელოვანია ქვეყნის ცნობადობისთვის. ტურიზმის ადმინისტრაცია გახდა EPCR-ის ერთ-ერთი სპონსორი (რომელიც ჩემპიონთა და ჩელენჯ თასების ორგანიზატორია) და საქართველოს ბანერი ყველგან ანათებს. თამაშებს ყველა კვირაში ასი ათასობით გულშემატკივარი ესწრება, თითოეულ თამაშზე 800-1000 გულშემატკივარი ჩამოდის, ტელე-ტრანსლიაციებს კი ასეულობით მილიონი ადამიანი უყურებს. რაგბის მეშვეობით ხდება ჩვენი ქვეყნის პოპულარიზაცია, ხასიათის და იდენტობის წარმოჩინება, საკლუბო პოზიციონირება”.

“სწორედ ამიტომაა მნიშვნელოვანი, რომ ყველანი მივიდეთ სტადიონზე და 11 იანვარს ვუგულშემატკივროთ ‘შავ ლომს’, არა მხოლოდ იმიტომ რომ კიდევ ერთი გამარჯვებით დავწეროთ ისტორია, არამედ გავიკვლიოთ გზა მწვერვალებისკენ. რაგბი ყველასია და ჩვენ ძალიან ახლოს ვართ იმ ბუნებრივ ადგილთან, რასაც ევროპული ტურნირების მწვერვალი ქვია და მჯერა იმ მწვერვალსაც მალე მივაღწევთ, რომელზეც ჩემი მოსვლის დღიდან ვსაუბრობდი - ერთ დღეს აუცილებლად გავხდებით მსოფლიოს ჩემპიონები! ეს არ მოხდება ერთ დღეში, მაგრამ ამისათვის ყველაფერს ვაკეთებთ და შედეგიც აუცილებლად იქნება”.

“ის რაც გვაქვს გენეტიკაში და ისტორიაში, ამას ვერავინ და ვერაფერი შეაჩერებს”.