შვიდდღეული: ოქროს თანაფარდი ვერცხლი

საქართველოს მორაგბეთა ნაკრებმა რუმინეთის ძლევის შემდეგ მსოფლიოს რეიტინგში ექვსი ერის წარმომადგენელ იტალიას გაასწრო, რის შემდეგაც ევროპული რაგბის მამები ექვს ერში (7 ერი დაერქმევა თუ 6+1, ამას დიდი მნიშვნელობა არა აქვს) ჩვენს გაწევრიანებაზე სერიოზულად დაფიქრდნენ.

ცეცხლზე ნავთი დაასხა (კარგი გაგებით) ევროპის 18-წლამდელთა ჩემპიონატზე საქართველოს ნაკრების წარმატებამ. ჩვენმა ჭაბუკებმა უკან მოიტოვეს იტალია, ინგლისი და მეორე ადგილი დაიკავეს.

ოქრო ვერცხლზე ძვირად ფასობს, სპორტში გამარჯვებულებს ოქროს მედლებს აძლევენ, მეორეადგილოსნებს - ვერცხლისას. თუმცა საქართველოს 18-წლამდელ მორაგბეთა ნაკრებისთვის ვერცხლის მედალი ოქროს უდრის. მათ ხომ მსოფლიოს დაანახეს, რომ ევროპაში, ჭაბუკთა შორის მეორეები არიან. მათ დამსახურებას არც ფინალში, საფრანგეთთან დიდი სხვაობით მარცხი (0:57) აფერმკრთალებს.

სარაგბო ჩემპიონთა თასის ნახევარფინალში ორი "ქართული" გუნდი გავიდა. ესეც ძალიან გასახარია და იმედი დავიტოვოთ, რომ საბოლოოდ ერთ-ერთი მაინც მოიგებს ამ თასს.

ერთი გუნდია "კლერმონი" (დავით ზირაქაშვილი და ვიქტორ კოლელიშვილი), მეორე - "ტულონი" (მამუკა გორგოძე, ლევან ჩილაჩავა, კოტე მიქაუტაძე).

საქართველოს საფეხბურთო თასის გათამაშების ნახევარფინალში "დინამომ" და "სამტრედიამ" 50-პროცენტიან ზღვარს გადააბიჯეს: მათ პირველ მატჩებში ისეთი უპირატესობა მოიპოვეს, თამამად შეიძლება ფინალში გასვლის შანსი 50-დან 90 პროცენტამდე შევაფასოთ. "დინამომ" შინ "ცხინვალს" 2:0 სძლია, "სამტრედიამ" სტუმრად - "საჩხერეს" 1:0.

- საქართველოს საფეხბურთო ნაკრების გერმანიასთან მატჩის შემდეგ საინტერესო კომენტარი გააკეთა თასების თასის მფლობელმა ვლადიმერ გუცაევმა:

"საერთოდ, ინდივიდუალიზმის გარეშე ფეხბურთი არ არსებობს. ეს არის ის, რაც თამაშს "ხსნის", იგებს. ინდივიდუალურ თვისებებს ვხედავ ლევან მჭედლიძეში და გიორგი ჭანტურიაში. მათ და ყველა ფეხბურთელს ვურჩევ - იყვნენ მეტად აგრესიულები".

4 აპრილს გაიმართა საქართველოს თასის ფინალი კალათბურთში. ერთმანეთს დაუპირისპირდნენ "დინამო" და "რუსთავი". დინამოელებმა გადამწყვეტი წუთები უფრო დამაჯერებლად ჩაატარეს და 95:87 გაიმარჯვეს.

ფინალის საუკეთესოდ თბილისელთა გამთამაშებელი ლაშა გამყრელიძე დასახელდა.

გაზეთმა "ლელომ" იანვრიდან ახალი ტრადიცია დაამკვიდრა: ყოველ თვეში საუკეთესო ქართველ სპორტსმენს ავლენს. იანვარში პირველობა არავის დაუთმო კალათბურთელმა ზაზა ფაჩულიამ, თებერვლის საუკეთესო ძიუდოისტი ვალერი ლიპარტელიანი იყო, ხოლო მარტში პირველობა ისევ ფაჩულიამ დაიბრუნა.

მის მარტისეულ რეკორდებზე ჩვენი ჟურნალის მკითხველი უკვე ინფორმირებულია.

8 აპრილს ზაზა ფაჩულიამ ლებრონ ჯეიმსის "კლივლენდის" წინააღმდეგ ითამაშა. ქართველი ცენტრი თავის გუნდში ერთ-ერთი საუკეთესო იყო - 19 ქულა და 10 მოხსნა. ეს გახლდათ მისი მე-80 ორმაგი დუბლი NBA-ში.

არც ევროპული ფეხბურთი გვაძლევს მოწყენის უფლებას - ბოლო დღეებში მადრიდის "რეალი" და მისი ლიდერი კრიშტიანო რონალდო ამოიქოქნენ. მან გრანადასთან (9:1) მატჩში ერთბაშად 5 გოლი გაიტანა. აქამდე პენტა თრიკი მას ერთხელაც არ შეესრულებინა. "რაიო ვალეკანოსთან" მატჩში (2:0) გატანილი პირველი გოლი კი რონალდოსთვის "რეალის" მაისურით მე-300 აღმოჩნდა.

11 აპრილს თბილისში დიდი შეჯიბრება დაიწყება - ევროპის ჩემპიონატი ძალოსნობაში, რომელიც ზუსტად ერთ კვირას გაგრძელდება. სპორტის სასახლის ფიცარნაგზე მხოლოდ უცხოელების წარმატებებს კი არა, ქართულ მედლებსაც ველით.

ყოველკვირეული ჟურნალი "ლელო week"