U20. ურუგვაი-საქართველო 21:19 - "უმცროსი ბორჯღალოსნების" მესამე მარცხი

28 თებერვალს, საქართველოს მორაგბეთა ახალგაზრდულმა ნაკრებმა სამხრეთამერიკულ ტურნეში მესამე შეხვედრა ურუგვაელ თანატოლებთან მონტევიდეოში გამართა და ანგარიშით 19:21 დამარცხდა.

"პირველი 15 წუთი ისე წარვმართეთ, რომ მეტოქეს შანსს არ ვუტოვებდით, მაგრამ მერე ბევრი შეცდომა დავუშვით. ეს მატჩი ჩვენი შეცდომების ხარჯზე წავაგეთ, განსაკუთრებით კი, დასკვნით ფაზაში, როდესაც ქულა-ქულაზე მიდიოდა თამაში.

რა თქმა უნდა, წაგება არასასიამოვნოა, მაგრამ ეს ტურნე მთლიანად ემსახურება მორაგბეების გამოცდას, რათა კიდევ ერთხელ მოგვეცეს მსოფლიოს წინ მათი საქმეში ნახვისა და უკვე ტურნირის წინა შეკრებისთვის გარკვეული დასკვნების გაკეთების შესაძლებლობა", - აქვეყნებს 20-წლამდელთა ნაკრების მთავარი მწვრთნელის,  ილია მაისურაძის ნათქვამს საქართველოს რაგბის კავშირის ოფიციალური საიტი.

მანამდე ქართველი მორაგბეები ორჯერ არგენტინელ 20-წლამდელებს გაეჯიბრნენ და ორივეჯერ დამარცხდნენ (17:36, 11:49). სერიის ბოლო, მეოთხე შეხვედრას "უმცროსი ბორჯღალოსნები" კვლავაც ურუგვაელებთან გამართავენ. მატჩი მონტევიდეოში 4 მარტს, თბილისის დროით 23:00 სთ-ზე დაიწყება.

შეგახსენებთ, რომ "უმცროსი ბორჯღალოსნები" ქართული რაგბის ისტორიაში წელს პირველად იასპარეზებენ მსოფლიოს ჩემპიონატზე, სადაც პლანეტის 12 უძლიერესი ახალგაზრდული ნაკრები ითამაშებს. ტურნირი 5-25 ივნისს ინგლისის ქალაქ მანჩესტერში გაიმართება.

ამხანაგური მატჩი
U20. ურუგვაი-საქართველო 21:19
საქართველო U20: 15 მირიან მოდებაძე, 14 გიორგი მელაძე, 13 სანდრო ილურიძე, 12 გიორგი გოგოლაძე, 11 დავით მესხი, 10 დავით მოძღვრიშვილი, 9 ლაშა მამუჩარაშვილი. 1 თორნიკე მატარაძე, 2 ლაშა საჯაია, 3 ნიკა ნეფარიძე (კაპ), 4 გაგა არაბული, 5 მიხეილ ბაბუნაშვილი, 6 ირაკლი ცხადაძე, 7 გიორგი ცუცქირიძე, 8 ილია სპანდერაშვილი
16 უშანგი ჭეიშვილი, 17 გოგა ხუროშვილი, 18 გურამ პაპიძე, 19 დემურ ეფერემიძე, 20 ვანო ფუტკარაძე, 21 გელა აფრასიძე, 22 გურამ ქანდაურაშვილი, 23 რატი შანიძე
3ლ: ილურიძე, საჯაია, მესხი. 2გ: გოგოლაძე.