U18. საფრანგეთი VS საქართველო - "უმცროსი ბორჯღალოსნები" რევანშისთვის

დღეს საქართველოს 18-წლამდე მორაგბეთა ნარკები ევროპის ჩემპიონატის ფინალურ მატჩში საფრანგეთს თანატოლთა გუნდს დაუპირისპირდება.

შეგახსენებთ, რომ "უმცროსი ბორჯღალოსნები" კონტინენტის ვიცე-ჩემპიონები არიან, ფრანგი 18-წლამდელები კი - ჩემპიონები. შესაბამისად, წელს შარშანდელი ფინალური წყვილი გამეორდა და ქართველ მორაგბეებს რევანშის აღების შესაძლებლობა აქვთ.

შეხვედრა პორტუგალიის დედაქალაქ ლისაბონში თბილისის დროით 21:00 სთ-ზე დაიწყება. გულშემატკივარს თამაშის ლაივ-სტრიმის ხილვის საშუალება კი ინტერნეტში ამ ბმულზე ექნება.

წელს ევროპის 18-წლამდელთა ჩემპიონატში მონაწილეობაზე უარი ინგლისმა, ირლანდიამ, უელსმა, შოტლანდიამ და იტალიამ თქვეს. საქართველოს ნაკრებმა ტურნირის მეოთხედფინალში რუმინეთი 49:10, ხოლო ნახევარფინალში პორტუგალია 29:10 დაამარცხა. თავის მხრივ, საფრანგეთმა ესპანეთს 56:14, ხოლო ბელგიას 62:3 სძლია და წინ ფინალიღა დარჩა.

საქართველოს რაგბის კავშირის ოფიციალური სიატის ცნობით, წინა მატჩისგან განსხვავებით, საქართველოს ნაკრების შემადგენლობაში ორი ცვლილებაა. შეიცვალა შუამარბების წყვილი და კოტე ხამაშურიძისა და თორნიკე ჯალაღონიას ნაცვლად, თამაშს ლუკა მარგიანი და სანდრო სვანიძე იწყებენ, ანუ ის წყვილი, რომელმაც მეოთხედფინალში რუმინეთთან ითამაშა.

საქართველოს 18-წლამდელთა ნაკრები საფრანგეთის წინააღმდეგ ამ შემადგენლობით ითამაშებს:

უკანა ხაზი (ბექები): 15. ბექა მამუკაშვილი, 14. გიორგი ნარიმანიძე, 13. სანდრო სვანიძე, 12. ლუკა მარგიანი, 11. ივანე კალანდაძე, 10. გელა აფრასიძე, 9. ელგუჯა კიკვაძე;
შერკინება (ფორვარდები): 1. გურამ გოგიჩაშვილი, 2. თენგიზ ზამთარაძე, 3. ჯაბა შათირიშვილი, 4. ბექა საღინაძე, 5. ლაშა ჯაიანი, 6. სანდრო მამამთავრიშვილი, 7. თენგიზ გიგოლაშვილი, 8. არსენ მაჩალაძე.
მარქაფა (რეზერვი): 16. გიორგი ნუცუბიძე, 17. ლევან პაპიძე, 18. ლუკა აზარიაშვილი, 19. გიგა გრიგალაშვილი, 20. ალექსანდრე კალმახელიძე, 21. იოსებ ხეთაშვილი, 22. გიორგი წიკლაური, 23. კოტე ხამაშურიძე, 24. თორნიკე ჯალაღონია, 25. საბა ხურცილავა.

მომზადებულია rugby.ge-ს მიხედვით