საქართველოს ნაკრებმა მსოფლიოს ახალგაზრდულ ჩემპიონატზე სადებიუტო მატჩში მოქმედ მსოფლიოს ჩემპიონ ახალი ზელანდიის ნაკრებთან წააგო - 0:55. U20. საქართველო-ახ.ზელანდია 0:55 - გაკვეთილი მიღებულია... [VIDEO]
ცხადია, "ბეიბი ბლექსთან" "უმცროსი ბორჯღალოსნებისგან" გამარჯვებას არც არავინ ელოდა, თუმცა ოდნავ უკეთ თამაში, ალბათ, მაინც შეიძლებოდა. ერთი რამ ნამდვილია: ჩვენს ახალგაზრდა მორაგბეებს ასეთი მაღალი კლასის გუნდთან აქამდე არასდროს უთამაშიათ და მათთვის ეს უდიდესი გამოცდილებაა.
აი, როგორ შეაფასა ჩვენი გუნდის თამაში საქართველოს ნაკრების ერთ-ერთმა მწვრთნელმა ლადო კილასონიამ:
"ცივ გონებაზე შეიძლება უკვე გარკვეული დასკვნების გამოტანა. რაც მთავარია, ჩვენმა ნაკრებმა
სამწუხაროდ, ამ სისწრაფეს ალღო მალე ვერ ავუღეთ და დავისაჯეთ ანგარიშში დიდი სხვაობით. შემდეგ იყო მომენტები, სადაც რამდენიმე ადგილას ნორმალურად დავიცავით თავი - თითქოს შევეჩვიეთ, მაგრამ ეს არ იყო პერმანენტული და ორგანიზებული. შემდეგ იყო ინდივიდუალური ამოხტომები, დაცვის ხაზის დარღვევა, მოთამაშის ჩახურვაზე მარტო ასვლა. ამის გამო, რა თქმა უნდა, იქვე ვისჯებოდით.
თუ ჩვენ წელიწადში ბევრი თამაში გვექნება ასეთ გუნდებთან, ბევრად მეტად გავიზრდებით და, საბოლოო ჯამში, შევძლებთ მეტ-ნაკლებად ადაპტაციას ასეთ ტემპთან, რომელიც ახლა ჩვენთვის ძალიან უცხოა. ყოველ შემთხვევაში, ჩემთვის, როგორც მწვრთნელისთვის, ეს იყო ყველაზე ტემპიანი თამაში ჩემს კარიერაში.
განსაკუთრებით ცუდი იყო ინდივიდუალური ბოჭვები - ერთი-ერთზე გვჯაბნიდნენ და ბურთს სწრაფად ათამაშებდნენ, რის გამოც ახალი ზელანდიის წინააღმდეგ დაცვაში კარგი თამაში ძალიან ძნელია. ისინი ბრწყინვალედ თამაშობდნენ ხელით, რაც ასევე ძალიან ართულებს დაცვას.
ამას გარდა, ჩვენს შეტევით ტაქტიკაში ადგილი ჰქონდა ნაჩქარევ და დაუფიქრებელ გადაწყვეტილებებს.
ამ თამაშში ძალიან ბევრი რამ არ გამოგვივიდა, თუმცა ამაში საშინელებას ვერ ვხედავ - დიდი ხნის შემდეგ გუნდმა პირველად ითამაშა, თანაც, ახალი ზელანდიის წინააღმდეგ - დავმარცხდით მწარედ, მაგრამ ეს იქნება გაკვეთილი და უფრო მეტი მოტივაციის წყარო".
საინტერესოა მეტოქის ერთ-ერთი საუკეთესო მორაგბის, მესამეხაზელი მიტჩელ ჯეიკობსენის შეფასება:
"კმაყოფილი ვარ ჩვენი ბიჭების კარგი თამაშით. ამ შეხვედრას განსაკუთრებული პასუხისმგებლობით მოვეკიდეთ. ვიცოდით, რომ საქართველოს ნაკრები ფიზიკურად ძლიერი გუნდია და საამისოდ მთელი კვირის განმავლობაში მიზანმიმართულად ვემზადებოდით".
მორიგ შეხვედრას ჩვენი ნაკრები 11 ივნისს უელსელი თანატოლების წინააღმდეგ გამართავს, რომლებმაც პირველ მატჩში მინიმალური სხვაობით ირლანდიის გუნდთან წააგეს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
