22 მაისს ქუთაისის "აიას" საკუთარ მოედანზე საქართველოს მოქმედ ჩემპიონ "არმიასთან" განმეორებითი ნახევარფინალური შეხვედრა ელის. პირველ მატჩში ქუთაისური გუნდი 12:30 დამარცხდა და სოლიდური სხვაობის აღმოსაფხვრელად დიდი ჯაფა დაადგება.
"აიას" რთული ამოცანა აქვს შესასრულებელი, მაგრამ ქუთათურები იმედს არ კარგავენ და ბოლომდე ბრძოლას აპირებენ.
მომავალი დაპირისპირების შესახებ ქუთაისური გუნდის ერთ-ერთი გამორჩეული მოთამაშე ბაკურ გოშაძე გვესაუბრა:
- გუნდში საბრძოლო განწყობაა. ყველა მორაგბე მწყობრშია და მატჩისთვის სერიოზულად ვემზადებით.
თბილისში დიდი სხვაობით დავმარცხდით და საქმე გავირთულეთ, მაგრამ ვეცდებით, რომ ჩვენი პლუსები გამოვიყენოთ და გავიმარჯვოთ. "არმიას" იოლად
- "არმია" "აიასთვის" გადაულახავ ბარიერად იქცა. გასული სეზონიდან მოყოლებული ამ გუნდთან უკვე ზედიზედ მეხუთედ წააგეთ. მაინც რას დაუპირისპირებთ თბილისურ გუნდს?
- "არმიას" პირობებსა და ჩვენს პირობებს შორის ძალიან დიდი სხვაობაა. საშუალება აქვთ და ბევრი ძლიერი მორაგბე ჰყავთ. ჩვენ კი ახალგაზრდული გუნდი ვართ. წლეულს უფრო გადავხალისდით, ბევრი ნიჭიერი მორაგბე დავიმატეთ, მაგრამ აკლიათ მაღალ დონეზე გამოცდილება.
მიუხედავად ამისა, ვფიქრობ, რომ "არმიასთან" თანაბრად ჭიდილის ძალა შეგვწევს და ბოლომდე ვიბრძოლებთ. თანაც, საკუთარ მოედანზე ვთამაშობთ და გულშემატკივრების მხარდაჭერის იმედიც გვაქვს.
- როგორ ფიქრობთ, შარშანდელ და წლევანდელ ,,აიას" შორის დიდი სხვაობაა?
- წლეულსაც მებრძოლი გუნდი გვყავს და ეს განვლილ მატჩებშიც დავამტკიცეთ. ჯგუფში ყველა შეხვედრა მოვიგეთ, "არმიასთან" კი ახლა ვგეგმავთ რევანშის აღებას. უნდა დავამტკიცოთ, რომ ამ გუნდის მოგება ჩვენს შესაძლებლობებს არ აღემატება.
- "არმიასთან" 18 ქულით გამარჯვება ძალიან რთული ამოცანაა. შესაძლოა, "აია" გაზაფხულის ტურნირის ფინალის საგზურის გარეშე დარჩეს...
- გაზაფხულის ტურნირს ჩემპიონატისთვის მოსამზადებლად ვიყენებთ, თუმცა, ვიმეორებ, სანამ წინ თამაში გვაქვს, დაკარგული არაფერია. თუ ფინალში ვერ გავედით, შემდეგ შვიდკაცასთვის შევუდგებით მზადებას, რომელიც მომავალ თვეში დაიწყება.
- მესამე წელია, "აიაში" წამატებით თამაშობთ. თავად უთხარით მკითხველს, ქუთაისურ გუნდში მისვლამდე სად ასპარეზობდით?
- ქუთაისური რაგბის სკოლის აღზრდილი ვარ. "აიას" ასაკობრივ გუნდებში ვთამაშობდი. შემდეგ ჯარში წავედი და გარკვეული პერიოდი რაგბს ჩამოშორებული ვიყავი. თამაში 21 წლის ასაკში გავაგრძელე და "აიაში" ბესიკ ხამაშურიძის მწვრთნელად დანიშვნის შემდეგ მივედი. ვცდილობ, გუნდს სარგებელი მოვუტანო.
- უცხოეთში თამაშზე თუ ფიქრობთ?
- ჯერჯერობით "აიაში" ვარ და მშობლიური გუნდის წარმატებებზე ვფიქრობ. თუ მხარდაჭერა და ფინანსურად სტაბილური პირობები გვექნება, ყოველთვის მაღალი მიზნებისთვის ვიბრძოლებთ. ქუთაისში ბევრი ნიჭიერი მორაგბეა და ჩვენს გუნდს დიდი რესურსი აქვს.
არმიას არაფერს დავუთმობთ (იბეჭდება მცირე ცვლილებით)
ყოველდღიური სპორტული გაზეთი "ლელო"
