საქართველოს სარაგბო ჩემპიონატის XI ტური: საუკეთესო შვიდეული

საქართველოს სარაგბო ჩემპიონატის XI ტურის დასრულების შემდეგ სატურნირო ცხრილში კიდევ უფრო დაიძაბა მდგომარეობა, რაც გულშემატკივარს მომავალში მეტ სანახაობას ჰპირდება.

ტური კვლავ ნაკლული გამოდგა. დასავლეთ საქართველოში ზამთარი ბატონობს, ცუდი მეტეოროლოგიური პირობების გამო (თოვლი და მოყინული მოედანი) ქუთაისში გასამართავი "აიას" და "ბათუმის" დაპირისპირება გადაიდო. დარჩენილ ოთხ შეხვედრაში კი სტადიონებზე მისულმა გულშემატკივარმა უშეღავათო ბრძოლა და 15 ლელო იხილა.

რკინიგზული რევანში
გათამაშების პირველ წრეში ნაწვნევი მარცხისთვის "ლოკომოტივს" გასულ უქმეებზე რევანშის აღება მართებდა თანაქალაქელ "არმაზთან." თემურ ბენდიაშვილის გაწვრთნილმა რკინიგზელებმა დაკისრებულ მოვალეობას თავი მშვენივრად გაართვეს და პირველივე ტაიმში გატეხეს მეტოქე, როდესაც საბა ნიკოლავას გატანილ საჯარიმოს ერთბაშად 24 ქულით უპასუხეს.

უკვე თამამად შეიძლება ითქვას, რომ კიდევ ერთხელ გაამართლა "ლოკომოტივის" სატრანსფერო პოლიტიკამ. ზაფხულში "ლელოდან" გადმოყვანილი ახალგაზრდა გოდერძი ჭინჭარაული ძალიან მოკლე დროში გუნდის ერთ-ერთ ლიდერად იქცა და მშვენივრად აკონტროლებს გუნდის სათამაშო ტემპს მგეზავის პოზიციიდან.

"არმაზთან" გამართულ პრინციპულ დაპირისპირებაში ჭინჭარაულმა თავისი არასტანდარტული აზროვნებით და გადამწყვეტ მომენტში მიღებული ჭკვიანური გადაწყვეტილებებით კიდევ ერთხელ დაამტკიცა, რომ მასში დიდი სარაგბო პოტენციალი იმალება.

დაბრუნება საპლეიოფო ზონაში
"ბოლნისი ყოჩებმა" ეროვნული ჩემპიონატის მეორე წრე შესანიშნავად დაიწყეს. მათ ჯერ მოქმედი ჩემპიონი "ლელო" დაამარცხეს, ხოლო უკანასკნელ ტურში სატურნირო თვალსაზრისით უშუალო კონკურენტ "ჯიქებს" სძლიეს - 10:3, რამაც საშუალება მისცა ბოლნისელებს, 30 ქულით მეხუთე საფეხურამდე აღზევებულიყვნენ და კიდევ უფრო განემტკიცებინათ საკუთარი პოზიციები საპლეიოფო ზონაში.

პირველად მშრალად
გასული ტური იმ მხრივაც გახლდათ საინტერესო, რომ მიმდინარე ჩემპიონატში პირველად დაფიქსირდა მშრალი ანგარიშით გამარჯვება. მოქმედმა ჩემპიონმა "ლელომ" თბილისურ დერბიში 32:0 სძლია "აკადემიას", ერთი პრემიალური ქულა მიითვალა და სატურნირო ცხრილს კვლავ სათავეში ჩაუდგა.

"ლელომ" პირველი წუთებიდანვე აქტიურად შეუტია და მატჩის დაწყებიდან 1 საათის შემდეგ უკვე 32-ქულიანი სხვაობით ლიდერობდა. უკანასკნელი 20 წუთი კი მხოლოდ ფორმალობად იქცა. სასიამოვნოა ის ფაქტი, რომ საზარდულის ტრავმის შემდეგ საბოლოოდ გამოჯანმრთელდა "ბორჯღალოსნებისა" და "ლელოს" ძირითადი მგეზავი ლაშა ხმალაძე.

არმია წინ მიდის
"არმია" წინსვლას განაგრძობს. ნიკო ჭავჭავაძის გაწვრთნილმა გუნდმა მიმდინარე ჩემპიონატში ზედიზედ მეხუთე გამარჯვება იზეიმა და სატურნირო ცხრილის ლიდერ "ლელოს" მხოლოდ 3 ქულითღა ჩამორჩება.

არმიელებმა გასულ ტურში დამაჯერებლად დაამარცხეს რუსთავის "ხარები" - 29:9. გამარჯვებულთა რიგებში გამორჩეულნი კვლავ უკანა ხაზის მოთამაშეები იყვნენ: შუამარბმა ვანო გაბროშვილმა მცირე ბენეფისი მოიწყო, ორჯერ თავად შეაღწია რუსთაველთა ჩათვლის მოედანში, ხოლო ერთხელ ასისტენტის როლში მოგვევლინა. ტრადიციულად, თავისი ლელო გაიტანა გარემარბმა ალექსანდრე ტუჩაშვილმა, რომელიც ბრწყინვალე ფორმაშია და უკანასკნელ 2 ტურში მის ანგარიშზე 20 ქულაა (4 ლელო).

წიკლაურის 21 ქულა
XI ტურის ცენტრალური შეხვედრა უდავოდ "არმაზისა" და "ლოკომოტივის" დაპირისპირება გახლდათ, რომელშიც საბოლოოდ გამარჯვებულნი რკინიგზელები გამოვიდნენ - 31:17.

მიმდინარე სეზონში "ლოკომოტივის" წარმატების ერთ-ერთი მთავარი განმსაზღვრელი ფაქტორი მისი ახალგაზრდა მოთამაშე ბექა წიკლაურია, რომელიც ინდივიდუალიზმითაც გამოირჩევა და გუნდურ თამაშშიც არაფერი დაეწუნება.

"არმაზთან" მატჩში ბექა შეუდარებლად კარგი იყო. მან ერთი ლელოს გარდა, საკუთარი ფეხჩუბინობის წყალობით მეტოქეს 3 საჯარიმო, 1 არეკნი და 2 გარდასახვა გაუტანა. ჯამში მისმა მონაგარმა 21 ქულა შეადგინა და შეხვედრის საუკეთესო მოთამაშეც დამსახურებულად გახდა.

სტატისტიკური კალეიდოსკოპი
ვაგრძელებთ მიმდინარე სარაგბო ჩემპიონატის სტატისტიკურ მიმოხილვას. სარაგბო მატჩში ქულების დაგროვების რამდენიმე ხერხი არსებობს. ლელო - 5 ქულა, გარდასახვა - 2 ქულა, საჯარიმო - 3 ქულა, არეკნი - 3 ქულა. საინტერესოა, უმაღლეს ლიგაში მონაწილე გუნდებიდან თუ ვინ ლიდერობს გატანილი არეკნების რაოდენობით.

განვლილი თერთმეტი ტურის განმავლობაში გუნდებმა ჯამში 16 არეკნი გაიტანეს. აქედან თითქმის მესამედი "ბოლნისი ყოჩების" მოთამაშეებზე მოდის - 5. სამჯერ თემურ სოხაძემ გამოიჩინა თავი, ხოლო ორჯერ მისმა თანაგუნდელმა შავლეგ მახარაშვილმა.

ინდივიდუალური მონაგრის მიხედვით ლიდერობს ქუთაისის "აიას" მგეზავი გაგა სინაურიძე, რომელმაც 4 არეკნის გატანა მოახერხა. ამ სარაგბო ასპექტში ორ-ორჯერ გამოიჩინეს თავი "ლოკომოტივის" ფულბეკმა ბექა წიკლაურმა და "არმიას" მგეზავმა ლაშა ბაირამაშვილმა, ხოლო თითო არეკნი აქვთ გატანილი ლაშა ხმალაძეს, ირაკლი ყიასაშვილს (ორივე "ლელო") და ბათუმელ თორნიკე აშვეთიას.

უხვქულიანი
მიუხედავად ჩავარდნილი სტარტისა, "არმია" მიმდინარე ჩემპიონატის ყველაზე შემტევ გუნდად რჩება. გათამაშების მეორე წრის მეორე ტურის შედეგების ჩათვლით, არმიელებმა მეტოქეებს ჯამში 285 ქულა გაუტანეს, საკუთარ ჩათვლის მოედანში კი 183 მიიღეს. გატანილ ქულათა რაოდენობით მეორე ადგილზეა მოქმედი ჩემპიონი "ლელო" - 279.

მიმდინარე ჩემპიონატის პოტენციურ ლიდერ ქუთაისის "აიას" შეტევაში მხოლოდ 207 ქულა აქვს მოპოვებული. სამაგიეროდ, ქუთათურებს საუკეთესო დაცვა ჰყავთ - 10 ტურში მხოლოდ 121 ქულა მიიღეს.

სტატისტიკურად ყველაზე ცუდი შეტევაც და დაცვაც თბილისის "აკადემიას" გააჩნია. ისინი საშუალოდ მატჩში 26,2 ქულას უშვებენ, ხოლო თავად 10,1 ქულა გააქვთ, მაგრამ მიუხედავად ამისა, აკადემიელები მაინც ახერხებენ, მერვე-მეცხრე ადგილები გაიყონ რუსთავის "ხარებთან" და რეალურ შანსს იტოვებენ ლიგაში ადგილის შენარჩუნებისთვის.

ყოველდღიური სპორტული გაზეთი "ლელო"