"ბორჯღალოსნები" ზაფხულის ტესტებზე მეორე მატჩს 17 ივნისს, აშშ-ს ნაკრებთან ქენესოში, ქენესოს უნივერსიტეტის სტადიონზე (Fifth Third Bank Stadium) გამართავენ.ივნისის ტესტებზე ეს მატჩი მეორე იქნება ორივე გუნდისათვის. 10 ივნისს "არწივები" ირლანდიის ნაკრებს მასპინძლობენ, ხოლო "ბორჯღალოსნები" ქალგარში კანადას ეთამაშებიან.
ქალაქი ქენესო ჯორჯიის შტატში მდებარეობს და 32 კილომეტრითაა დაშორებული ატლანტადან. Fifth Third Bank Stadium-ი 9 ათას მაყურებელს იტევს, მისი მოედნის ბუნებრივი საფარი კი ქვეყანაში საუკეთესოა და ბოლო ორი წელია ნომინაციის - "წლის მოედანი" გამარჯვებული ხდება.
"არწივებმა" ამ სტადიონზე ბოლო მატჩი 2014 წელს ჩაატარეს,
აშშ-სა და საქართველოს ნაკრებების დასწრების მსურველებმა usarugby.org/Tickets-ზე 22 მარტიდან რეგისტრაცია უნდა გაიარონ, ხოლო ბილეთების გაყიდვა 24 მარტიდან იწყება.
"მოხარულები ვართ ატლანტაში დაბრუნებით და ვიმედოვნებთ, რომ ადგილობრივი გულშემატკივრის მხარდაჭერა არ მოგვაკლდება, რადგან სერიოზული მეტოქის, საქართველოს წინააღმდეგ მოგვიწევს თამაში" - განაცხადა "არწივების" მენეჯერმა დეივ ჰოჯესმა.
ჯონ მიჩელის გაწვრთნილმა "არწივებმა" 2017 წლის ამერიკის ჩემპიონატზე ოთხი თამაში მოიგეს, ერთი ფრედ დაასრულეს და ტურნირის გამარჯვებულები გახდნენ.
აქამდე "ბორჯღალოსნებსა" და "არწივებს" ერთმანეთში 4-ჯერ უთამაშიათ და 3-ჯერ გამარჯვება მეტოქეს დარჩა. ბოლო შეხვედრა 2013 წელს, რუსთავში გაიმართა და ბოლო წუთზე მომხდარი გაუგებრობით და ჯარიმით აშშ-მ 25-23 იმარჯვა.
მიჩელის გუნდისთვის 17 ივნისს საქართველოსთან გასამართი შეხვედრა ბოლო რეპეტიცია იქნება და 24 ივნისსა და 1 ივლისს აშშ კანადასთან 2019 წლის მსოფლიო თასის შესარჩევ მატჩებს გამართავს.
"მოუთმენლად ველით ზაფხულის ტესტებს და ახალ გამოწვევებს. ირლანდიამ ახალი ზელანდია და ინგლისი დაამარცხა, ხოლო საქართველო მსოფლიო რეიტინგში დამსახურებულად იკავებს მე-12 პოზიციას. მათი ძლიერი მხარე შერკინებაა და ბოლო წლებში ამ კომპონენტში ჩვენც გავიზარდეთ.
დარწმუნებული ვარ, რომ ეს ორი თამაში ყოველმხრივ დაგვეხმარება და მსოფლიო თასის შესარჩევი ეტაპის შეხვედრებს სრულ მზადყოფნაში შევხვდებით. ვეცდებით ეს თამაშები საუკეთესოდ ჩავატაროთ და შევქმნათ ფუნდამენტი, რომელსაც მოგვიანებით კანადასთან გამოვიყენებთ" - თქვა მიჩელმა.
აშშ-სთან მატჩის შემდეგ "ბორჯღალოსნები" სამხრეთ ამერიკაში გადაინაცვლებენ, სადაც 24 ივნისს არგენტინის ნაკრებს შეხვდებიან. ქართველი მორაგბეები სამხრეთში ამის შემდეგაც დარჩებიან, შემადგენლობა გადახალისდება და საქართველოს A ნაკრები არგენტინის A ნაკრებთან და ურუგვაისთან ორ შეხვედრას გამართავს.
ფოტოს ავტორი: ნიკა ფანიაშვილი
მომზადებულია rugby.ge-ს მიხედვით
ყველა სარაგბო ქვეყანა შვიდკაცას განვითარებას მიაწვა,მას შემდეგ რაც ოლიმპიური სახეობა გახდა, რუსეთმაც კი გააკეთა უკვე კარგი გუნდი, ჩვენებს ყურიც არ შეურტყავთ!!!!!! ქართული სიზარმაცე და დაუდევრობა!