მილტონ ჰეიგმა კანადასთან მატჩისთვის "ბორჯღალოსნების" შემადგენლობა დაასახელა

საქართველოს მორაგბეთა ეროვნული ნაკრები კანადაში, ქალგარიში ამერიკული ტურნეს პირველი ტესტისთვის მზადებას აგრძელებს. კანადასთან შეხვედრამდე 48 საათით ადრე კი "ბორჯღალოსნების" მთავარმა მწვრთნელმა მილტონ ჰეიგმა სამატჩო რაზმი დაასახელა.

- მილტონ ჰეიგი: ჯერ კიდევ გვახსოვს მარტში, რუმინეთთან წაგებული მატჩი

თამაში "რაგბი პარკზე" ადგილობრივი დროით 10 ივნისს, 15:00 საათზე იწყება. ამ დროს თბილისში შუაღამე გადასული იქნება და შეხვედრა ჩვენი დროით 11 ივნისს, პირველ საათზე დაიწყება. კანადური მხარე სატელევიზიო რეპორტაჟს არ ახორციელებს, სამაგიეროდ, წარიმართება 4-კამერიანი ლაივსთრიმი, რომელიც კანადის რაგბის კავშირის "ფეისბუქის" გვერდზე @RugbyCanada გაიმართება. გარდა ამისა, "საზოგადოებრივი მაუწყებელი" კანადურ მხარესთან ტექნიკურ დეტალებს არკვევს, რის შედეგადაც სთრიმი ქართული კომენტარით ასევე "საზოგადოებრივი მაუწყებლის" სოც-მედია პლატფორმაზეც გადმოიცემა.

შემადგენლობაში ვერ მოხვდნენ ლევან ჩილაჩავა, ვიტო კოლელიშვილი და შალვა მამუკაშვილი. მათმა გუნდებმა ("კლერმონი" და "ტულონი") 4 ივნისს საფრანგეთის ტოპ 14-ის ფინალი ითამაშეს და გუნდს მოგვიანებით შეუერთდნენ. ძირითადში მყოფი მორაგბეების კეპების ჯამი 705-ია (393 ხაზი, 312 მორკინალი) და აქედან მხოლოდ ერთს აქვს 20-ზე ნაკლები, თუმცა თადარიგის მოთამაშეებიდან ოთხ მორაგბეს ნაკრებში 10 თამაშიც არ ჩაუტარებია.

სასტარტო შემადგენლობაშია და ქალგარში თავის მე-100 კეპს მოიხვეჭს დავით კაჭარავა. გუნდს მისი მეწყვილე მერაბ შარიქაძე უკაპიტნებს. თამაშს იწყებს ყველაზე მეტი კეპის მქონე, "ბორჯღალოსნების" საუკეთესო მექულე, ფულბეკი მერაბ კვირიკაშვილი. ფლანგებზე გამოცდილ ალექსანდრე თოდუასა და ახალბედა სოსო მათიაშვილს (1 კეპი) ვიხილავთ. მათიაშვილს სანაკრებო დებიუტი ამა წლის 4 მარტს, რაგბი ევროპის ჩემპიონატზე ესპანეთთან ჰქონდა და ეს მოვლენა ლელოთი აღნიშნა.

ღერძი ნაცადი და გამოცდილია - ვასილ ლობჟანიძე და ლაშა ხმალაძე. პირველ ხაზში მიხეილ ნარიაშვილი, ჯაბა ბრეგვაძე და ანტონ ფეიქრიშვილი დადგებიან. ამ უკანასკნელმა ნაკრების კვართით ბოლოს ერთი წლის წინ, შარშანდელ ივნისის ტესტებზე სუვაში ტონგას წინააღმდეგ ითამაშა.

მეორე ხაზში გიორგი ნემსაძისა და კოტე მიქაუტაძის გამოცდილ წყვილს ვიხილავთ, ხოლო მესამე ხაზში ლაშა ლომიძე, გიორგი თხილაიშვილი და ბექა ბიწაძე დადგებიან.

თადარიგშია ახალგაზრდა კვაჭი ბადრი ალხაზაშვილი, რომელმაც ნაკრებში პირველად შარშან, ნოემბრის ტესტებზე ითამაშა. ნაკრების კვართით პირველად რაგბი ევროპის ჩემპიონატზე ითამაშა და ამჯერად თადარიგშია სოსო ბეკოშვილი (5 კეპი), ხოლო მეორე ბურჯი გამოცდილი კარლენ ასეიშვილია. მეორე ხაზში შეცვლაზე არიან ნოდარ ჭეიშვილი და ვეტერანი გიორგი ჩხაიძე, რომელმაც სანაკრებო კვართი ბოლოს შარშან, ოკეანეთის ტურნეზე ფიჯისთან მატჩში მოირგო.

მესამე ხაზის შემცვლელად ოთარ გიორგაძეს ვიხილავთ, რომელსაც აქამდე ნაკრებში 4-ჯერ უთამაშია, ხოლო ხაზის მოთამაშეთაგან თადარიგში გამოცდილი ლაშა მალაღურაძე და გიორგი ბეგაძე არიან.



მომზადებულია rugby.ge-ს მიხედვით