საქართველოს შვიდკაცა რაგბის ნაკრები ევროპის გრანპრის სერიის მორიგ ეტაპზე მოსკოვში იასპარეზებს. ტურნირი 30 ივნისს დაიწყება და, როგორც წესია, ორ დღეს გასტანს.
ჩვენი გუნდი მოსკოვურ ეტაპზე A ჯგუფში მოხვდა, სადაც მას მეტოქეობას ინგლისის, უელსის, რუსეთის, ჰოლანდიისა და უკრაინის ნაკრებები გაუწევენ.
შეგახსენებთ, რომ წლევანდელი გრანპრის სერიის პირველ ეტაპზე, რომელიც საფრანგეთის ქალაქ ლიონში გაიმართა, "შვიდკაცა ბორჯღალოსნები" მე-8 ადგილს დასჯერდა. ნაკრების მთავარი მწვრთნელი კახა ალანია მოსკოვში, სავარაუდოდ, განახლებულ შემადგენლობას იახლებს.
რამდენიმე პერსპექტიული მოთამაშე მან ახლახან გამართული საქართველოს შვიდკაცა რაგბის ჩემპიონატის პირველ ეტაპზე მოინიშნა.
A ჯგუფი: ინგლისი, უელსი, რუსეთი, საქართველო, ჰოლანდია, უკრაინა.
B ჯგუფი: პორტუგალია, ესპანეთი, შოტლანდია, საფრანგეთი, იტალია, გერმანია.
ყოველდღიური სპორტული გაზეთი "ლელო"
