საქართველოს მორაგბეთა ნაკრებმა პორტუგალია დაამარცხა [VIDEO]

თბილისში მიხეილ მესხის სახელობის სტადიონზე საქართველოსა და პორტუგალიის მორაგბეთა ნაკრებებს შორის "რაგბი ევროპის ჩემპიონატის" მატჩი გაიმართა.

აღსანიშნავია, რომ ქართველმა მორაგბეებმა ანგარიში 57-ე წამზე გახსნეს! ლელოს ავტორი დავით კაჭარავა გახდა. სამწუხაროდ მერაბ კვირიკაშვილმა გარდასახვა ზუსტად ვერ შეასრულა - 5:0.

მე-11 წუთზე პორტუგალიელებმა სხვაობის შემცირება შეძლეს. მეტოქემ ჯარიმა გაიტანა - 5:3. მე-15 წუთზე კი პორტუგალიელებმა მეორე ჯარიმის შესრულების უფლება მოიპოვეს და ამჯერად უკვე ჩვენი მეტოქე დაწიანურდა - 5:6.

"ბორჯღალოსნებმა" ანგარიშში უპირატესობა 24-ე წუთზე დაიბრუნეს. კვირიკაშვილმა ჯარიმა ზუსტად შეასრულა, თუმცა 36-ე წუთზე მეტოქემ კიდევ ერთი ჯარიმა გაიტანა - 8:9. რამდენიმე წუთში კი კვირიკაშვილმა მორიგი ჯარიმა გაიტანა - 11:9, რასაც ტაიმის მიწურულს კიდევ ერთი ჯარიმაც მიაყოლა და პირველი ნახევრის საბოლოო შედეგი დააფიქსირა - 14:9.

46-ე წუთზე კვირიკაშვილმა ჯარიმით უპირატესობა 7 ქულამდე გაზარდა - 17:9, თუმცა პორტუგალიამ სხვაობა კვლავ ჯარიმით შეამცირა - 17:12.

71-ე წუთზე კვირიკაშვილმა მორიგი ქულა ჩაიწერა ანგარიშზე - 20:12. შეხვედრილს მიწურულს პორტუგალიელებმა კიდევ ერთი ჯარიმა გაიტანეს.

საბოლოოდ შეხვედრა საქართველოს მორაგბეთა ნაკრების გამარჯვებით ანგარიშით 20:15 დასრულდა.

შეგახსენებთ, რომ "ბორჯღალოსნებმა" "რაგბი ევროპის ჩემპიონატის" პირველ მატჩში გერმანიას სტუმრად ანგარიშით 64:8 აჯობეს. მორიგ შეხვედრას ქართველი მორაგბეები სტუმრად ესპანეთთან 28 თებერვალს გამართავენ.

თამუნა ყულუმბეგაშვილის ფოტო