საქართველოს ნაკრების ექვს ერში დაშვებასა თუ ამ ტურნირის რეორგანიზაციასთან დაკავშირებით, ბრიტანული მედია ხშირად მსჯელობს. იწერება პუბლიკაციები, ხდება მკითხველთა აზრის ონლაინგამოკითხვა. ისე ჩანს, რომ ყველა, თავად ორგანიზატორებისა და იტალიელების გარდა, ექვსი ერის გათამაშების გაფართოების მომხრეა. ახლა ამ კამპანიას ფრანგულმა მედიამაც აუბა მხარი. "ლე ფიგარომ" გამოაქვეყნა ინტერვიუ "მსოფლიო რაგბის" ჯერ კიდევ მოქმედ პრეზიდენტ ბერნარ ლაპასესთან, რომელიც ექვსი ერის თემასაც შეეხო და მისი მოსაზრება ამ საკითხთან დაკავშირებით სხვა საინფორმაციო საშუალებებმაც გაავრცელეს.
ბერნარ ლაპასე მომხრეა, ექვსი ერის გათამაშების ფორმატი შეიცვალოს.
"თუ გვინდა, რაგბი განვითარდეს,
ფაქტია, ცვლილება რაც შეიძლება სწრაფად უნდა განხორციელდეს", - თქვა ბერნარ ლაპასემ.
სამწუხაროდ, ლაპასე თანამდებობას ტოვებს. მის ადგილს ინგლისელი ბილ ბომონტი დაიკავებს, რომელსაც, ლაპასეს აზრით, ძალიან გაუჭირდება ამ ცვლილების განხორციელება. თუმცა "მსოფლიოს რაგბის" მომავალი ვიცე-პრეზიდენტი არგენტინელი ავგუსტინ პიშოა, რომელიც საქართველოს ექვს ერში ჩართვის მომხრეა.
ერთი სიტყვით, ექვსი ერის გაფართოებაზე უკვე ძალიან ბევრს ლაპარაკობენ, რასაც, დაუჯერებელია, რომ ქმედითი ღონისძიებები არ მოჰყვეს. ყველაფერი მაინც "მსოფლიოს რაგბის" ახალი ხელმძღვანელობის მარიფათზე იქნება დამოკიდებული.
(იბეჭდება მცირე ცვლილებით)
ყოველდღიური სპორტული გაზეთი "ლელო"
