- მილტონ ჰეიგი: ეს იყო შესაძლებლობა, რომელიც ხელიდან გავუშვით
- მამუკა გორგოძე: ასე დაჩაგრო მეტოქე და თამაში წააგო, მე არ ვიცი...
მიხეილ მესხის სახელობის სტადიონზე გამართულ მატჩში ანგარიში სტუმრებმა მე-9 წუთზე, კოიტო მიცუშიმას ლელოთი გახსნეს. ჰიკარე ტამურამ ვერ გარდასახა, თუმცა მანვე მალევე საჯარიმო დარტყმა შეასრულა ზუსტად.
"ბორჯღალოსნებმა" სათამაშო უპირატესობა ანგარიშში ასახეს - ლელო ჯერ ვიქტორ კოლელიშვილმა დადო 26-ე წუთზე, შემდეგ კი - ვასილ ლობჟანიძემ (38). მერაბ კვირიკაშვილმა ორიდან ერთი გარდასახვა გამოიყენა და ტაიმი საქართველოს ნაკრებმა ანგარიშით 12:8 მოიგო.
შესვენების შემდეგ იაპონელებმა შეტევაში ჩვენი შეცდომით მეორედ ისარგებლეს და მეორე ლელო მითვალეს. თავი ლომაკე ლემეკიმ გამოიჩინა. ტამურამ კი ვერ გარდასახა.
საპასუხო ლელო "ბორჯღალოსნებმა" მალევე გაიტანეს. 50-ე წუთზე მასპინძელთა შეტევა ბექა ბიწაძემ დააგვირგვინა. კვირიკაშვილმა გარდასახა, შემდეგ კი საჯარიმოც გაიტანა და ანგარიშში მასპინძელთა უპირატესობამ 9 ქულას მიაღწია - 22:13.
მაგრამ ამის შემდეგ იაპონელებმა ზედიზედ ორჯერ დაგვიდეს ლელო - მე-60-ე წუთზე ლემეკიმ მეორედ დაამიწა ჩვენს ჩათვლის მოედანში ბურთი, სამი წუთის შემდეგ კი იგივე კენკი ფუკუოაკამ შეძლო. ამას ისიც დაერთო, რომ "ბორჯღალოსნები" კაცნაკლულები დარჩნენ - მსაჯმა საქართველოს ნაკრების დებიუტანტი ანზორ სიჭინავა გაასინბინა.
75-ე წუთისთვის იაპონელებმა კიდევ ერთი საჯირიმო გაიტანეს, დარჩენილ დროში კი ქართველმა მორაგბეებმა ანგარიშის შეცვლა ვეღარ შეძლეს - საბოლოოდ 22:28, იაპონელთა სასარგებლოდ.
იხილეთ ფოტოგალერეა
იაპონიასთან წაგებით "ბორჯღალოსნებმა" ხელიდან გაუშვეს ისტორიული შედეგის მიღწევის - მსოფლიო რეიტინგის ათეულში მოხვედრის შესაძლებლობა.
მომდევნო ტესტ-მატჩს საქართველოს ნაკრები თბილისში 19 ნოემბერს, სამოას ეროვნული გუნდის წინააღმდეგ ჩაატარებს, 26 ნოემბერს კი სტუმრად შოტლანდიას დაუპირისპირდება.
