ლეგიონი: ორი ლელო, ამდენივე ყვითელი და ერთი წითელი

ფოტო: ლევან დათუნაშვილი მარჯვნივ

საფრანგეთის სარაგბო ჩემპიონატის ელიტურ, მეორე დივიზიონში სატურნირო ცხრილის პირველი ოთხი საფეხური ქართველ მორაგბეთა გუნდებს უკავიათ. ესენია: "ლიონი", "აჟენი", "ლა როშელი" და "ორიაკი".

გათამაშების ლიდერი ჯერ ისევ ვიქტორ კოლელიშვილისა და გურამ კავთიძის "ლიონია", რომელმაც სტუმრად უმძიმეს მატჩში დაამარცხა ერთ-ერთი კონკურენტი "კოლომიე" - 24:23.

ჩვენებურთა გუნდმა მინიმალური სხვაობით გამარჯვებას მატჩის დასრულებამდე სამი წუთით ადრე, ლელოს გატანის შემდეგ მიაღწია, რომელიც კოლელიშვილის აქტიურობას და მის გადაცემას მოჰყვა.

"ვიტო", ისევე, როგორც სხვა მატჩებში, ამჯერადაც გუნდში ერთ-ერთი საუკეთესო იყო. კოლელიშვილმა თავიდან ბოლომდე ითამაშა, კავთიძე განაცხადში არ იყო.

"ლიონს" ორი ქულით ჩამორჩება და მეორე ადგილზეა ტარიელ რატიანიძის "აჟენი", რომელმაც შინ შეძლო გიორგი ჩხაიძის, გიორგი ნემსაძისა და ირაკლი მირცხულავას "ტარბის" დამარცხება - 36:22.

ნემსაძემ და ჩხაიძემ სრულად ითამაშეს; ამასთან ერთად, ჩხაიძე მატჩის არბიტრმა მე-60 წუთზე გაასინბინა, მირცხულავა 61-ე წუთზე შეცვალეს, რატიანიძეს არ უთამაშია.

ლევან დათუნაშვილისა და გიორგი ნაცარაშვილის "ორიაკმა" სტუმრად დაამარცხა ერთ-ერთი აუტსაიდერი "ოში" - 21:13 და ახლა 22 ქულით მეოთხე ადგილზეა.

დათუნაშვილმა, როგორც ყოველთვის, ამჯერადაც თავიდან ბოლომდე ითამაშა, ნაცარაშვილი 70-ე წუთზე შეცვალეს.

ლიდერთა შორის მოხვედრის შანსი ხელიდან გაუშვა ბექა შეყლაშვილის "ბეზიემ", რომელმაც შინ წააგო "პოსთან" მინიმალური სხვაობით - 19:20. შერკინების ქართველი ბურჯი თამაშში 53-ე წუთიდან ჩაერთო.

კახაბერ კობერიძის, ალექსანდრე თოდუას, ვახტანგ მაისურაძის, ვახტანგ ახობაძის, გიორგი თეთრაშვილისა და ხვიჩა ბუჯიაშვილის "ალბიმ" სტუმრად მინიმალური სხვაობით დაამარცხა თამაზ მჭედლიშვილის, მერაბ შარიქაძისა და გიორგი სულუაშვილის "ბურგ ან ბრესი" - 23:22.

მჭედლიშვილმა და თოდუამ სრულად ითამაშეს, თეთრაშვილი მოედანზე 48-ე წუთიდან გამოჩნდა.

II დივიზიონი
VII ტური
აჟენი-ტარბი 36:22, ოში-ორიაკი 13:21, ბეზიე-პო 19:20, ბურგუენი-ლა როშელი 16:16, კარკასონი-მონ დე მარსანი 19;13, დაქსი-ნარბონი 18:20, ბურგ ან ბრესი-ალბი 22:23, კოლომიე-ლიონი 23:24.

სატურნირო მდგომარეობა
1. ლიონი - 27 ქულა, 2. აჟენი - 25, 3. ლა როშელი - 24, 4. ორიაკი - 22, 5. პო - 22, 6. კოლომიე - 19, 7. ბურგუენი - 18, 8. ნარბონი - 17, 9. ბეზიე - 15, 10. ტარბი - 12, 11. მონ დე მარსანი - 12, 12. ბურგ ან ბრესი - 11, 13. კარკასონი - 11, 14. დაქსი - 11, 15. ოში - 10, 16. ალბი - 9.

VIII ტური
ალბი-ბეზიე, ორიაკი-აჟენი, კარკასონი-ნარბონი, ლა როშელი-ბურგ ან ბრესი, მონ დე მარსანი-ბურგუენი, პო-დაქსი, ლიონი-ოში, ტარბი-კოლომიე.

ფედერალ 1 დივიზიონში ქართველ მორაგბეთა გუნდებიდან ლიდერთა შორის მხოლოდ სამია. ესენია: "მასი", "სენ ნაზერი" და "მაკონი".

A ჯგუფში პირველობას ისევ არავის უთმობს შალვა სუთიაშვილის, არჩილ კობაურის, დავით აშვეთიას, ელიზბარ ყუფარაძისა და დავით დადუნაშვილის "მასი", რომელმაც შინ დაამარცხა პლეი ოფში გასვლისთვის მებრძოლი "ნევერი" - 20:12.

სუთიაშვილი ძირითად შემადგენლობაში იყო და მატჩის არბიტრმა 74-ე წუთზე წითელი ბარათი უჩვენა.

აშვეთია 48-ე წუთზე ყუფარაძემ შეცვალა, დადუნაშვილმა მოედანი 67-ე წუთზე დატოვა, კობაურს არ უთამაშია.

"მასის" ახლა 26 ქულა აქვს და რვა ქულით უსწრებს მეორეადგილოსან ბაჩუკი გუჯარაიძის "სენ ნაზერს", რომელმაც შინ დაამარცხა "კონიაკი" - 32:6. გუჯარაიძე განაცხადში არ იყო.

ირაკლი ნინიძის "დიჟონმა", რომელიც ბოლოსწინა ადგილზეა, შინ წააგო ბოლო ადგილზე მყოფ რეზო გიგაურისა და თენგიზ გელანტიას "მონლუსონთან" - 20:23. გიგაურმა, რომელმაც სრულად ითამაშა, მე-10 წუთზე ლელო გაიტანა, გელანტია 55-ე წუთზე შეცვალეს, ნინიძემ 15 წუთით ნაკლები ითამაშა.

A ჯგუფი
ლილი-ვანი 25:3, მასი-ნევერი 20:12, სენ ნაზერი-კონიაკი 32:6, დიჟონი-მონლუსონი 20:23, სენ ჟან დანჟელი-ბობინი 23:16.

სატურნირო მდგომარეობა
1. მასი - 26 ქულა, 2. სენ ნაზერი - 18, 3. ლილი - 18, 4. ნევერი - 17, 5. ვანი - 15, 6. სენ ჟან დანჟელი - 13, 7. კონიაკი - 10, 8. ბობინი - 8, 9. დიჟონი - 6, 10. მონლუსონი - 2.

VII ტური
ნევერი-დიჟონი, ვანი-მასი, კონიაკი-ლილი, ბობინი-სენ ნაზერი, მონლუსონი-სენ ჟან დანჟელი.

B ჯგუფში მეორე ადგილზეა ავთანდილ კოპალიანის "მაკონი", რომელმაც სტუმრად დაამარცხა ზერო პეტრიაშვილისა და მერაბ კვირიკაშვილის "ვიენი" - 25:13. კოპალიანი 59-ე წუთზე შეცვალეს, კვირიკაშვილი მოედანზე 72-ე წუთიდან გამოჩნდა, პეტრიაშვილს არ უთამაშია.

"მაკონს" ორი ქულით ჩამორჩება და მესამე ადგილზეა საბა ქართველიშვილის "შამბერი", რომელმაც შინ მოუგო გიორგი ჯაშიტაშვილის "შალონს" - 29:3. ქართველიშვილი თამაშში 41-ე წუთიდან ჩაერთო და 17 წუთში ლელო გაიტანა, ჯაშიტაშვილი განაცხადში არ იყო.

B ჯგუფი
ექსი-ობენა 42:18, რომანი-ლა სეინი 27:23, ვიენი-მაკონი 13:25, ანესი-ლა ვულე 14:19, შამბერი-შალონი 29:3.

სატურნირო მდგომარეობა
1. ექსი - 21 ქულა, 2. მაკონი - 20, 3. შამბერი - 18, 4. ობენა - 16, 5. რომანი - 15, 6. ლა ვულე - 14, 7. ლა სეინი - 12, 8. ვიენი - 10, 9. შალონი - 9, 10. ანესი - 7.

VII ტური
მაკონი-რომანი, ლა სეინი-ექსი, ობენა-შამბერი, ლა ვულე-ვიენი, შალონი-ანესი.

სამწუხაროდ, კიდევ ერთხელ წააგო თედო ზიბზიბაძის, ნიკოლოზ მაღალდაძის, გიორგი გაბელიასა და ირაკლი ნატრიაშვილის "პერიგომ", რომელიც C ჯგუფში ასპარეზობს.

ჩვენებურთა გუნდი სტუმრად დამარცხდა უშუალო კონკურენტ "ლიმოჟთან" - 19:22. ზიბზიბაძემ სრულად ითამაშა, სხვა ქართველი მორაგბეები განაცხადში არ იყვნენ.

C ჯგუფი
ლიმოჟი-პერიგო 22:19, მონტობანი-ლავორი 41:10, ლორმონი-ენდაი 30:23, როდეზი-ტულე 26:20, სენ ჟან დე ლუზი-ლანჟონი 24:20.

სატურნირო მდგომარეობა
1. მონტობანი - 28 ქულა, 2. ლანჟონი - 21, 3. სენ ჟან დე ლუზი - 21, 4. პერიგო - 15, 5. ლიმოჟი - 15, 6. ლორმონი - 14, 7. ლავორი - 11, 8. როდეზი - 10, 9. ტულე - 5, 10. ენდაი - 2.

VII ტური
პერიგო-სენ ჟან დე ლუზი, ტულე-მონტობანი, ლანჟონი-როდეზი, ლავორი-ლორმონი, ენდაი-ლიმოჟი.

D ჯგუფში სიმონ მაისურაძის, ლადო გუნიავას, ბექა ურჯუკაშვილის, ლაშა მალაღურაძისა და გიორგი მჭედლიშვილის "ბაგნერემ" სტუმრად წააგო "აგეტმოსთან" - 13:20, თუმცა 13 ქულით მე-5 ადგილზეა და კვლავ ინარჩუნებს შანსს, პლეი ოფში გასვლისთვის იბრძოლოს.

მალაღურაძემ სრულად ითამაშა და გუნდს რვა ქულა მოუტანა (ორი საჯარიმო და ერთი გარდასახვა), ურჯუკაშვილი 62-ე წუთზე გაასინბინეს და ათწუთიანი გაძევებიდან დაბრუნებული უმალვე შეცვალეს, მჭედლიშვილმა მოედანი 46-ე წუთზე დატოვა, გუნიავამ 26 წუთით მეტი ითამაშა, მაისურაძე განაცხადში არ იყო.

D ჯგუფი
ლურდი-ოლორონი 23:17, ლანამეზანი-ვალანსი 6:12, მოლეონი-კასტანე 9:32, აგეტმო-ბაგნერე 20:13, ბლანიაკი-ტიროსი 6:18.

სატურნირო მდგომარეობა
1. ტიროსი - 25 ქულა, 2. ოლორონი - 21, 3. ლანამეზანი - 16, 4. ბლანიაკი - 15, 5. ბაგნერე - 13, 6. კასტანე - 13, 7. აგეტმო - 13, 8. ვალანსი - 10, 9. მოლეონი - 9, 10. ლურდი - 8.

VII ტური
ოლორონი-აგეტმო, კასტანე-ლანამეზანი, ვალანსი-ლურდი, ბაგნერე-ბლანიაკი, ტიროსი-მოლეონი.

ყოველდღიური სპორტული გაზეთი "ლელო"