ქუთაისის ,,აია" საქართველოს თასის პირველ ნახევარფინალურ მატჩში თბილისის ,,არმიასთან" 12:18 დამარცხდა. საკუთარ კედლებში წაგების მიუხედავად ქუთათურები ფინალში გასვლის შანს ისევ ინარჩუნებენ, ამისთვის "აიამ" განმეორებით შეხვედრაში, რომელიც ხვალ "ავჭალის" სარაგბო სტადიონზე გაიმართება, მეტოქე მინიმუმ 7 ქულის სხვაობით უნდა დაამარცხოს. "სამწუხაროდ, ,,არმიასთან ისევ დავმარცხდით, მაგრამ ამის გამო ფარ-ხმალის დაყრას არ ვაპირებთ. ფინალში გასვლის შანსი ჯერ არ დავიკარგავს. ექვსი ქულის გაბათილება გადაუჭრელ ამოცანას არ წარმოადგენს, დასაკარგი არაფერი გვაქვს და განმეორებით შეხვედრაში ბოლომდე ვიბრძოლებთ." - აღნიშნა "აიას" მწვრთნელმა კობა გიორგაძემ.
მანვე მარცხის მიზეზებზეც ილაპარაკა:
პირველ ტაიმში კარგად გამოვიყურებოდით, მაგრამ შესვენების შემდეგ გუნდი აირია და საბოლოოდ დავმარცხდით. შეცდომებს გავაანალიზებთ და მომავალ მატჩს გაცილებით მომზადებული შევხვდებით.
თუკი, ტრავმირებული მორაგბეები დროულად გამოჯანმრთელდებიან და სრული შემადგენლობით ვითამაშებთ, "აიას" ნამდვილად აქვს იმის პოტენციალი, რომ ფინალის საგზური მოიპოვოს."
ლევან ცაბაძე, "არმიას" მწვრთნელი: "პირველი ნახევარფინალური მატჩი ძალიან საინტერესო და დაძაბული გამოდგა. ძლიერი მეტოქე გვყავდა, უპირატესობასაც ფლობდნენ მაგრამ, ამ მატჩში ფორტუნა ჩვენს მხარეს იყო... სტუმრად მოგების მიუხედავად, განმეორებით შეხვედრაში "აიასთან" ძალიან რთული თამაში გველოდება და ფინალისტის ვინაობასაც თბილისური შეხვედრა გაარკვევს."
ყოველდღიური სპორტული გაზეთი "ლელო"
