"ოლ ბლექსმა" იოჰანესბურგში, იქ, სადაც ერთი თვის წინ ესპანეთის ფეხბურთელთა ნაკრებმა მსოფლიოს ჩემპიონობა იზეიმა, "ბოკე" 29:22 დაამარცხა და სამხრეთ ნახევარსფეროს საუკეთესო გუნდი გახდა.
სამხრეთაფრიკელებმა უმძიმესი დარტყმა მიიღეს. ახალ ზელანდიასთან ზედიზედ სამჯერ "ბოკეს" არასდროს წაუგია. მეტიც, მსოფლიოს ჩემპიონებს სამი ერის ოთხი მატჩიდან ოთხივეში ხელი მოეცარათ. განსკუთრებით მტკივნეულად განიცადა წაგება გუნდის კაპიტანმა ჯონ სმიტმა, რომელმაც "ოლ ბლექსთან" ამ მატჩში
თამაში ორივე გუნდმა ფრთხილად დაიწყო. მეოცე წუთისთვის მგეზავებმა მორნი სტეინმა და დენ კარტერმა ორ-ორი საჯარიმო გაცვალეს - 6:6. "ოლ ბლექსს" არსად ეჩქარებოდა, მათთვის მაქსიმუმ შვიდი ქულით წაგებაც ხელსაყრელი იყო, რისთვისაც ერთ საპრემიო ქულას მიიღებდნენ და პირველობას გაინაღდებდნენ.
"ბოკე" მხოლოდ გამარჯვებას ეშურებოდა. სამხრეთაფრიკელთა თავკაცმა პიტერ დე ფილიერსმა წარუმატებელი სერიისთვის წერტილის დასასმელად გუნდის შემადგენლობა მნიშვნელოვნადს გადაახალისა.
24-ე წუთიდან მოყოლებული, როცა მესამეხაზელმა სხალკ ბურხერმა ლელო გაიტანა - 13:6, "ბოკე" ნელ-ნელა უპირატესობას დაეუფლა, თუმცა შესვენებაზე მხოლოდ ორქულიანი უპირატესობით წავიდა. სტეინის საჯარიმოს კარტერმა საჯარიმოთივე უპასუხა. 37-ე წუთზედ კი "ოლ ბლექსის" პირველხაზელმა ტონი ვუდკოქმა ლელო მიითვალა, რომელიც კარტერმა ვერ გარდასახა - 14:16.
მეორე ტაიმის 25 წუთი მასპინძლების უპირატესობით წარიმართა. მორნი სტეინმა კიდევ ორი საჯარიმო გაიტანა და "ბოკე" რვა ქულით დააწინაურა - 22:14.
ეს ანგარიში 68-ე წუთამდე შენარჩუნდა. მასპინძლები დაცვაში, საკუთარი ოცდაორმეტრიანი ზონის მისადგომებთან რაკში თამაშისას დაჯარიმდნენ. კარტერმა საჯარიმო ზუსტად დაარტყა - 17:22.
ანგარიშში სხვაობა საკმაოდ მყიფე გახდა. წესით, "ბოკე" უნდა გააქტიურებულიყო, რათა სტადიონზე მისული 94 ათასი მაყურებელი არ გაეწბილებინა, მაგრამ პირიქით კი მოხდა.
ახალი ზელანდიის ნაკრებმა ორ წუთში, 78-ე და მე-80 წუთებზე ორი ლელო გაიტანა და იოჰანესბურგი ტრიუმფით მოიარა. თამაშის დამთავრებას ორი წუთი აკლდა, როცა საკუთარ ნახევარზე სამხრეთაფრიკელებმა ბურთი დაკარგეს. "ოლ ბლექსის" შუამარბი მაა ნონუ ჯონ სმიტს გასცდა, რამდენიმე მეტრი გაიარბინა და შებოჭეს, რაკიდან ბურთი სწრაფად მარჯვნივ, გრძელ ფრთაზე, კიდემდე ჩაათამაშეს, სადაც გარემარბის პოზიციაზე მესამეხაზელი რიჩი მაკქოუ აღმოჩნდა. მისი შეჩერება სამმა სამხრეთაფრიკელმა ვერ შეძლო. კარტერმა ვერ გარდასახა - 22:22.
ეს ანგარიში ახალზელანდიელებს ხელს აძლევდათ, მაგრამ "ოლ ბლექსი" რისი "ოლ ბლექსია," მიღწეულს დასჯერდეს. მორიგი და, როგორც გაირკვა, ბოლო შეტევა შეცვლაზე შესულმა ფულბეკმა იზრაელ დაგმა ლელოთი დაასრულა, კარტერი გარდასახვისას ამჯერად ზუსტად გაისარჯა - 29:22.
"ოლ ბლექსი" სამი ერის ჩემპიონია.
სამხრეთ აფრიკა-ახალი ზელანდია 22:29
სამხრეთ აფრიკა (15-9) ეპლონი, პიტერსენი (ფან დერ ლინდე 68), დე იონგი, დე ფილიერსი, ჰაბანა, სტეინი, ჰუგარი (იანუარი 76) . (1-8) სტენკამპი, სმიტი (ლავი 58), დუ პლესი, ფან დერ მერვე (როსუ 70), მეტფილდი, ბურხერი, სმიტი, სპისი.
ლ: ბურხერი. 5ს,გ: სტეინი.
ახალი ზელანდია (15-9) მულიაინა, ჯეინი, სმითი, ნონუ, როკოთოკო (დაგი 58), კარტერი, ქოუანი (ვიპუ 42). (1-8) ვუდკოქი, მეალამუ, ფრენქსი (აფოა 62), დონელი (ვაითლოქი 50), თორნი, კაინო (ვიტო 70), მაკქოუ, რიდი.
3ლ: ვუდკოქი, მაკქოუ, დაგი. 4ს,გ: კარტერი
მსაჯი: ნაიჯელ ოუენსი (უელსი)
სატურნირო მდგომარეობა
თ მ ფ წ ბ ქ
1. ახ.ზელანდია 5 5 0 0 +72 23
2. ავსტრალია 3 1 0 2 -14 4
3. ს.აფრიკა 4 0 0 4 -58 1
სამი ერი
28 აგვისტო
სამხრეთ აფრიკა-ავსტრალია
4 სექტემბერი
სამხრეთ აფრიკა-ავსტრალია
11 სექტემბერი
ავსტრალია-ახალი ზელანდია
ყოველდღიური სპორტული გაზეთი "ლელო"
