საფრანგეთის რაგბის ნაციონალური ლიგის სადისციპლინო კომიტეტმა "მონპელიეს" მეორეხაზელი ტიბო პრივა და "ტულუზის" შერკინების კვაჭი ვილიამ სერვა 11 იანვარს ამ კომიტეტის ტრიბუნალზე დაიბარა. რამდენიმე დღის წინ ფრანგულ მედიაში "ტულუზის" თავკაცმა გი ნოვემ აურზაური ატეხა მონპელიელის საქციელის გამო. "ტულუზისა" და მამუკა გორგოძის, გიორგი ჟღენტის, მიხეილ ნარიაშვილისა და გოდერძი შველიძის "მონპელიესთან" მატჩში, პრივამ მეტოქის მორკინალ იანიკ ბრუს განზრახ ბინძურად ეთამაშა და სამხრეთაფრიკელს ტრავმა მიაყენა.
მატჩის არბიტრმა პრივას მოედანი ათი წუთით დაატოვებინა, თუმცა გი ნოვემ ეს საკამრისად არ მიიჩნია და მისი დსიკვალიფიკაციით დასჯა მოითხოვა.
მას მატჩის კომისარიც დაეთანხმა, რის საფუძველზეც სადისციპლინო კომიტეტმა პრივა თავისთან იხმო საქმის ვითარების გასარკვევად.
პრივასთან ერთად განიხილავენ "ტულუზის" შერკინების კვაჭის ვილიამ სერვას საქმესაც. ტულუზელმა იმავე შეხვედრაში, ზემოთ აღნიშნული ფაქტიდან 20 წუთის შემდეგ პრივას დაარტყა, რისთვისაც არბიტრმა ასევე სინბინში გაუშვა. გამორიცხული არ არის, ორივე მორაგბე მკაცრად დაისაჯოს.
მიუხედავად იმისა, რომ ტრავმირებული გარი ბოთას ნაცვლად "ტულუზმა" ქართველი აქვსენტი გიორგაძე მიიწვია, სერვას დანაკლისი ამ გუნდისთვის საგრძნობლად დიდი იქნება. აღსანიშნავია, რომ "ტულუზში" ჩვენებურთან ერთად სულ სამი შერკინების კვაჭია, აქედან ერთი როგორც უკვე ვთქვით, დაშავებულია, მეორეს დისკვალიფიკაცია ემუქრება. ასე რომ, ევროპის ერთ-ერთი საუკეთესო გუნდი აქვსენტი გიორგაძის იმედადღა დარჩება.
არანაკლებ რთულ მდგომარეობაში აღმოჩნდება "მონპელიეც", რომელსაც ტრავმირებული მოთამაშეების რიცხვი მატჩიდან მატჩამდე ეზრდებათ.
არადა, ჩვენებურთა გუნდს 31 დეკემბერს უმნიშვნელოვანესი მატჩი ელის შინ უშუალო კონკურენტ "მეტრო რასინგთან".
ყოველდღიური სპორტული გაზეთი "ლელო"
