ევროპის ერთა თასის გათამაშების დაწყებამდე ათიოდ დღე დარჩა. საქართველოს ნაკრების მეტოქეები ერთმანეთის მიყოლებით ასახელებენ რაზმების შემადგენლობას. "ბორჯღალოსნების" ერთ-ერთი მთავარი კონკურენტის, რუსეთის ეროვნული გუნდის უელსელმა მწვრთნელმა, კინგსლი ჯოუნზმა გუნდის გაფართოებული შემადგენლობა გააცხადა.
იმ მორაგბეთა შორის, რომლებიც ერთა თასის გათამაშების მატჩებისთვის მოსამზადებლად სოჭში შეიკრიბებიან, სამი ქართული წარმოშობის მორაგბეა. ესენია: ვალერი ცნობილაძე, მისი ძმა გრიგოლ ცნობილაძე და მოსკოვის "სპარტაკის" ახალგაზრდა მორაგბე პავლე კვერნაძე.
ეს უკანასკნელი, ცხადია, დებიუტანტია, მასთან ერთად პირველად გამოიძახეს ნაკრებში გერმან გოდლიუკი, სტანისლავ სელსკი, მაქსიმ სტრუზი, რომან კოკორინი და ანტონ სინიცინი.
აღსანიშნავია, რომ რუსეთის ნაკრებში არ არის გამოძახებული რვა ისეთი მორაგბე, რომლებმაც ახალ ზელანდიაში გამართულ მსოფლიოს თასზე იასპარეზეს. ესენია: ვიაჩესლავ გრაჩოვი, კონსტანტინ რაჩკოვი, ანდრეი კუზინი, ანდრეი ბიკანოვი, ალექსანდრ ხროკინი, ალექსეი ტრავკინი, ივან პრიშეპენკო და ევგენი პრონენკო.
შეგახსენებთ, რომ რუსეთის ნაკრები ჩვენ ეროვნულ გუნდს თბილისში 17 მარტს დაუპირისპირდება. ცნობილია, ამ მატჩის არბიტრის ვინაობაც. თამაშს ფრანგ მსაჯთა ბრიგადა განსჯის. მთავარი მსაჯი მატიე რეინალი იქნება.
"ბორჯღალოსნები" პირველ შეხვედრას 4 თებერვალს დნეპროპეტროვსკში, სტადიონ "მეტეორზე" უკრაინის ნაკრებთან გამართავს. ამ შეხვედრას იტალიელი სტეფანო მანჩინი განსჯის. ერთი კვირის თავზე საქართველოს ნაკრები მადრიდში ესპანეთის ეროვნულ გუნდს ესტუმრება. იქ ირლანდიელი დევიდ ვილკინსონი იმსაჯებს.
პირველ საშინაო შეხევედრას საქართველოს ნაკრები 25 თებერვალს გამართავს. მეტოქე, ჩვენი გუნდისთვის ტრადიციულად უხერხული გუნდი, პორტუგალიელი "ლობუშები" იქნებიან. ამ მატჩში იტალიელი მარიუს მიტრეა იმსაჯებს.
რუსეთის ნაკრები: მიხაილ ბაბაევი, ალექსეი ვოლკოვი, ვიქტორ კობზევი, ალექსეი პანასენკო, ევგენი მატვეევი, არტიომ ფატახოვი, იური კუშნარიოვი, სერგეი ტრიშინი, ალექსანდრ შაკიროვი, ალექსანდრ იანუშკინი (ყველა-ვვა), სტანისლავ სელსკი, ვალერი ცნობილაძე, ვლადიმირ ბოტვინიკოვი, ნიკიტა მედკოვი, ანდრეი ტემნოვიი, დიმიტრი გერასიმოვი, იგორ კუშნარიოვი, დენის სიმპლიკევიჩი (ყველა-ენისეი), ჰაზირ გასანოვი, გრიგოლ ცნობილაძე, მაქსიმ სტრუზა, ანდრეი გარბუზოვი, ანტონ რიაბოვი, ალექსეი მაკოვეცკი (ყველა-კრასნი იარი), ანდრეი იგრეცოვი, დენის ანტონოვი, გერმან გოდლიუკი (სამივე-სლავა), პაველ კვერნაძე, ანტონ სინიცინი, რომან კოკორინი (სამივე-სპარტაკი), კირილ კოპეშკინი, ვლადიმირ ბოლტენკოვი (ორივე-იმპერია), ვლადიმირ ოსტროუშკო (ტაგანროგი), ევგენი ტიტოვი (სმენა).
ერთა თასი
1. საქართველო - 22 ქულა, 2. რუმინეთი - 16, 3. პორტუგალია - 14, 4. რუსეთი - 11, 5. ესპანეთი - 10, 6. უკრაინა - 0.
ფოტო: ბურთით ლევან დათუნაშვილი
ყოველდღიური სპორტული გაზეთი "ლელო"
