გარბინ მუგურუსა მესამე ჩოგანი გახდა

ქალ ჩოგბურთელთა ასოციაციამ ახალი რეიტინგი გამოაქვეყნა. კლასიფიკაციის პირველ ათეულში ცვლილება მხოლოდ ორ ჩოგბურთელს შეეხო. გარბინ მუგურუსამ ცინცინატის უმაღლესი კატეგორიის ტურნირზე გამარჯვება მოახერხა და ამის წყალობით სამი ადგილი მოიგო. ახლა, ესპანელი მსოფლიოს მესამე ჩოგანია. ეს პოზიცია მან ყოფილ პირველ ჩოგანს, გერმანელ ანჟელიკ კერბერს წაართვა, რომელიც სამი საფეხურით დაბლა დაეშვა და მეექვსე ადგილზე იმყოფება.

მუგურუსამ ცინცინატის ფინალში რუმინელი სიმონა ჰალეპი დაამარცხა და ამ უკანასკნელს კლასიფიკაციაში ლიდერობის მოპოვების საშუალება არ მისცა. ჰალეპი ანალოგიურ სიტუაციაში იყო როლან გაროსზე, როცა ასევე ფინალის მოგება სჭირდებოდა რეიტინგში პირველ ადგილზე გადასასვლელად, მაგრამ წააგო ლატვიელ ელენა ოსტაპენკოსთან სენსაციურად.

WTA-ის კლასიფიკაციის TOP10 ასე გამოიყურება:

1. (1). კაროლინა პლიშკოვა (ჩეხ) - 6 390
2. (2). სიმონა ჰალეპი (რუმ) - 6 385
3. (6). გარბინ მუგურუსა (ესპ) - 5 860
4. (4). ელინა სვიტოლინა (უკრ) - 5 650
5. (5). კაროლინ ვოზნიაცკი (დან) - 5 350
6. (3). ანჟელიკ კერბერი (გერ) - 5 146
7. (7). იოჰანა კონტა (ბრიტ) - 4 750
8. (8). სვეტლანა კუზნეცოვა (რუს) - 4 410
9. (9). ვინუს უილიამსი (აშშ) - 4 216
10. (10). აგნიეშკა რადვანსკა (პოლ) - 3 855

TOP10-ში ჩოგბურთელებს შორის ქულათა სხვაობა იმდენად მცირეა, რომ "დიდი სლემის" რიგით მეოთხე ტურნირის - აშშ-ის ღია პირველობის წინ უნიკალური სიტუაციაა შექმნილი. კერძოდ, ნიუ იორკში გასამართ ჩემპიონატზე (28 აგვისტო-10 სექტემბერი) WTA-ის რეიტინგის პირველ ადგილზე პრეტენზიას რვა ჩოგბურთელი განაცხადებს.

თუ აშშ-ის შარშანდელი პირველობის ქულებს გამოვაკლებთ, მაშინ ჩოგბურთელებს ასეთი სასტარტო პოზიცია ექნებათ: ლიდერია სიმონა ჰალეპი (5955), შემდეგ მოდიან - გარბინ მუგურუსა (5790), ელინა სვიტოლინა (5400), კაროლინა პლიშკოვა (5090), კაროლინ ვოზნიაცკი (4570), იოჰანა კონტა (4510), სვეტლანა კუზნეცოვა (4340) და ვინუს უილიამსი (3976).

ამასთან, მეტოქეთა გამოსვლებზე დამოკიდებული არ იქნება პირველი სამი ჩოგბურთელი - ტიტულის მოპოვების შემთხვევაში, მათ გარანტირებული ექნებათ პირველი ადგილი. დანარჩენებს ამა თუ იმ კონკურენტის ნაადრევად გამოვარდნა დასჭირდებათ.

აღვნიშნავთ, რომ თუ პლიშკოვა ფინალამდე ვერ მივა, ლიდერობას ნებისმიერ შემთხვევაში დაკარგავს.

(იბეჭდება მცირე ცვლილებით)
ყოველდღიური სპორტული გაზეთი "ლელო"