როჯერ ფედერერი - ისევ ყველაზე მაღალანაზღაურებადი

შვეიცარიელი ლეგენდა როჯერ ფედერერი ზედიზედ მეთორმეტედ გახდა მსოფლიოს ყველაზე მაღალანაზღაურებადი ჩოგბურთელი. 2016 წლის ივნისიდან 2017 წლის ივნისის პერიოდში მან 64 მილიონი დოლარი გამოიმუშავა. ამ თანხიდან მხოლოდ 6 მილიონია ტურნირებზე მიღებული საპრიზო ჰონორარი.

ფედერერს სასპონსორო კონტრაქტები აქვს კომპანიებთან - Wilson, Credit Suisse, Mercedes, Rolex, Lindt, Jura, Moet & Chandon, Sunrise, Netjest და Nike. წელს, როჯერმა ხუთწლიანი კონტრაქტი გააფორმა პასტას მწარმოებელ Barilla-სთან და ჯამში 40 მილიონ დოლარს მიიღებს.

ამერიკული ჟურნალის Forbes-ის ინფორმაციით, ფედერერის შემოსავლის ერთ-ერთი მნიშვნელოვანი წყაროა - უბრალოდ, საჩოგბურთო ტურნირებში მონაწილეობა. საჩვენებელ შეჯიბრებაში გამოსვლის სანაცვლოდ, შვეიცარიელი 2 მილიონ ევროს ითხოვს, ხოლო ATP500 ან ATP250 კატეგორიის ტურნირებში მონაწილეობისთვის - 1 მილიონს.

სხვათა შორის, ATP-ის ახალი რეიტინგის გამოქვეყნების შემდეგ, ფედერერი მსოფლიოს ახალი რეკორდის მფლობელი გახდა. მან გაუსწრო ამერიკელ ჯიმი კონორსს კლასიფიკაციის ტოპ-ოთხეულში ყოფნის ხანგრძლივობით. ფედერერმა 670 კვირა გაატარა TOP4-ში, რაც დაახლოებით 12 წელსა და 8 თვეს უდრის. კონორსი, რომელმაც 1996 წელს დაასრულა კარიერა, ტოპ-ოთხეულის წევრი 669 კვირის განმავლობაში იყო.

ამ სიაში მესამე ადგილზეა ესპანელი რაფაელ ნადალი - 529 კვირა, მეოთხეზე სერბი ნოვაკ ჯოკოვიჩი - 526 კვირა, მეხუთეზე - ამერიკელი ივან ლენდლი (510 კვირა).

აღვნიშნავთ, რომ მომავალ კვირას ფედერერი კონორსს გაუსწრებს TOP5-ში გატარებული დროის ოდენობით. დღეისთვის, ორივენი კლასიფიკაციის ხუთ საუკეთესო ჩოგბურთელს შორის 706 კვირის განმავლობაში იყვნენ.