დღეს, 8 აგვისტოს, მონრეალის მასტერსის მერვედფინალში ჰამბურგის ტურნირის ნახევარფინალის გამეორება გველის - ქართველი ჩოგბურთელი ნიკოლოზ ბასილაშვილი გერმანელ ალეკსანდრ ზვერევს შეხვდება და იმედი გვაქვს, რომ მატჩის შედეგიც ჰამბურგის შეჯიბრების მსგავსი იქნება.
აქვე უნდა აღვნიშნოთ, რომ დღევანდელი შეხვედრა ნიკოლოზისთვის ოდნავ უფრო რთული იქნება, რადგან ჰარდის საფარზე ზვერევი უფრო მეტად უტევს, ვიდრე თიხაზე, ხოლო გერმანელის დაცვითი ქმედებების ეფექტიანობა ისე არ მოიკლებს, როგორც შეტევა გაუუმჯობესდება.
ამას დაემატება ლამის 2-მეტრიანი ზვერევის მოწოდება, რომლის აღებაც ჰარდზე უფრო ძნელია, ვიდრე თიხაზე.
წინა მატჩისგან განსხვავებით, ზვერევს აღნიშნული უპირატესობა
ექნება, თუმცა მხოლოდ ეს დეტალები მატჩის ბედს ზვერევის სასარგებლოდ ვერ გადაწყვეტს, რადგან ნიკოლოზის დარტყმები ჰარდის საფარზე უფრო რთული ასაღებია.
აღსანიშნავია ის, რომ გერმანელი არც ისე სასურველ ფსიქოლოგიურ მდგომარეობაშია, მწვრთნელი წავიდა, რაღაცები აერია. თან, ჰამბურგის ნახევარფინალში თავდაჯერებული იყო და თქვა, რომ მეგონა, პირველი სეტის წაგების შემდეგ ბასილაშვილსაც მოვუგებდიო, მაგრამ ვერ მოუგო.
შეიძლებოდა გვეთქვა, რომ ეს წაგება მის მიზანსწრაფულობას გაზრდიდა, თუმცა ამ მდგომარეობაში ზვერევისთვის ეს ძალიან რთული იქნება. ამიტომ, ვთვლით, რომ მატჩის ბედი ნიკოლოზზე იქნება დამოკიდებული. თუ ნაკლებ ორმაგ შეცდომას დაუშვებს და საჭირო დროს სწორად ითამაშებს, ალბათ, საშას დამარცხებას 2 კვირის განმავლობაში მეორედ მოახერხებს.
მთავარია, ბასილაშვილმა პირველი სეტი ითამაშოს კარგად და ეს არათუ საქმის ნახევარი, არამედ საქმის 80% იქნება.
კიდევ ერთი ფაქტი, ზვერევი და ბასილაშვილი ჰარდზე შარშან შეხვდნენ ერთმანეთს და მაშინ თითქმის ფორმის პიკში მყოფმა საშამ ნიკოლოზი 2 სეტში დაამარცხა - 7:5, 6:4, თუმცა ადვილი შეხვედრა ნამდვილად არ ჰქონია და ნიკოლოზს ორი ბრეიკ-პოინტიდან ერთი რომ გამოეყენებინა, პირველ სეტზე მოაწვდიდა კიდეც.
მონრეალში კი, ზვერევმა პირველი წრე გამოტოვა, ხოლო მეორე წრეში მსოფლიოს 62-ე ჩოგანს, ბრიტანელ ქემერონ ნორის 2 სეტში მოუგო - 7:6, 6:4. ისე კი, ზვერევს კარიერაში ერთადერთი მასტერსი აქვს მოგებული ჰარდზე და ისიც კანადაში იმარჯვა. 2017 წელს ფინალში თვით როჯერ ფედერერს მოუგო 2 სეტში - 6:4, 6:3.
ნიკოლოზმა კი მონრეალის მასტერსის ორივე შეხვედრაში "ქამბექი" გვიჩვენა და პირველი სეტების წაგების შემდეგ ორივე მატჩში მოიგო. თან, აღსანიშნავია, რომ ორივე მეტოქე უფრო ძლიერი ჰყავდა, ვიდრე ზვერევს.
დღეს ისევ დაძაბული შეხვედრაა მოსალოდნელი და პირველი ორი შეხვედრის სცენარი ზვერევთან არ იმუშავებს. თუ გერმანელმა იგრძნო, რომ მოგება შეუძლია, მისი დამარცხება ძალიან რთული იქნება.
ნიკოლოზმა ამ ტურნირზე უკვე მოახერხა 90 სარეიტინგო ქულისა და 70 325 დოლარის გამომუშავება, თუმცა ბასილაშვილს უფრო მეტი შეუძლია და მონრეალის მასტერსის ფინალში თამაში არარეალური სულაც არ არის. თუ ნიკოლოზი ამას მოახერხებს, მსოფლიოს მე-10 ჩოგანი გახდება.
ბასილაშვილსა და ზვერევს შორის შეხვედრა თბილისის დროით 22:30 წუთზე არის ჩანიშნული, თუმცა არაა გამორიცხული, რომ მატჩი უფრო გვიან დაიწყოს.
უცნაური თასები - რატომ აქვს ბასილაშვილის ჰამბურგის ჯილდოს ასეთი დიზაინი? [PHOTO]
