ტურინში შემაჯამებელი ტურნირის მე-5 დღის შეხვედრები გაიმართა. ამჯერად გულშემატკივარმა "წითელი ჯგუფის" წარმომადგენლები იხილა.
ალექსანდრ ზვერევი (გერმანია) ჰუმბერ ჰურკაჩს (პოლონეთი) დაუპირისპირდა და მარტივად, 6:2 6:4 დაამარცხა.
1-ელ სეტში გერმანელმა მეტოქის ჩაწოდება ზედიზედ ორჯერ მოიგო და დაწინაურდა.
მე-2 სეტში კი სპორტსმენები საკუთარ მოწოდებებს იგებდნენ, თუმცა პოლონელი მე-9 გეიმში შეცდა... მე-10 გეიმში კი ზვერევმა გამარჯვება მოიპოვა და ნახევარფინალში გავიდა.
![Sportall.Ge](/pictures/artimages/original/92a81cae27e3ce3d686b798ae5de12ec.jpg "პირველი ნახევარფინალური სუპერ წყვილი შედგა - ტურინში "წითელი ჯგუფის" შეხვედრები დასრულდა [VIDEO]")
მეორე შეხვედრა გაცილებით დაძაბული და სანახაობრივი გამოდგა.
დანილ მედვედევი (რუსეთი) იანიკ სინერს (იტალია) დაუპირისპირდა და მძიმე ბრძოლაში 6:0 6:7 7:6 დაამარცხა.
მოქმედმა ჩემპიონმა პირველ სეტში დებიუტანტს შანსი არ დაუტოვა, აი, მეორე სეტიდან კი გულშემატკივარმა ბრწყინვალე თამაში იხილა.
სპორტსმენებმა ტაიბრეიკამდე ბრეიკები გაცვალეს, მე-13 გეიმში კი სინერმა 7:5 იმარჯვა და საქმე დისაიდერში გადავიდა. ტაი-ბრეიკამდე საქმე ზუსტად ისე წარიმართა, როგორც მე-2 სეტში იყო, თუმცა გადამწყვეტ გეიმში ყველაფერი თავდაყირა დატრიალდა.
ჩოგბურთელებს მატჩზე ჩაწოდების უფლება სულ 4-ჯერ ჰქონდათ (2-2), საბოლოოდ კი რუსმა ისარგებლა და 10:8 გაიმარჯვა.
ამრიგად, ასპარეზობას მედვედევი და ზვერევი აგრძელებენ, სინერი და ჰურკაჩი კი ტურნირს ნაადრევად დატოვებენ.
რაც შეეხება ნახევარფინალურ დაპირისპირებებს - უკვე გარკვეულია, რომ ზვერევის მეტოქე ნოვაკ ჯოკოვიჩი იქნება (20 ნოემბერი, 17:00 საათი), დანილის მოწინააღმდეგის ვინაობას კი ალექსანდრ რუბლევისა და კასპერ რუდის შეხვედრა გაარკვევს (19 ნოემბერი, 14:30 საათი).
![alt](/pictures/image50/1ea41bbae631a6e8cb5be08c76e461b4.jpg "პირველი ნახევარფინალური სუპერ წყვილი შედგა - ტურინში "წითელი ჯგუფის" შეხვედრები დასრულდა [VIDEO]")
მორიგი ტრავმა... ციციპასი შემაჯამებელს დაემშვიდობა, მისმა შემცვლელმა კი ვერ ივარგა [VIDEO]
