"დაუბრუნონ სახელმწიფოს მათზე დახარჯული თანხა" - დევისისა და სმოლკინის საქართველოს მოქალაქეობის მიღების შემდეგ, რუსებმა ახალ კანონპროექტზე მუშაობა დაიწყეს

რუსეთის სახელმწიფო სათათბიროს ფიზკულტურისა და სპორტის კომიტეტის თავჯდომარე დიმიტრი სვიშჩევმა RBC SPORT-ს განუცხადა, რომ ახალ კანონპროექტზე დაიწყეს მუშაობა, რომლის მიხედვითაც, ის სპორტსმენები, რომლებმაც მოქალაქეობა შეიცვალეს და წარსულში სახელმწიფოსგან ფინანსდებოდნენ, მიღებული თანხის დაბრუნება მოუწევთ.

"ფიზკულტურის და სპორტის კომიტეტში ვამზადებთ კანონპროექტს, რომ იმ სპორტსმენებს, რომლებიც მოქალაქეობას შეიცვლიან და სხვა ქვეყნის სახელით გადაწყვეტენ ასპარეზობას, მოუწევთ სრულად აანაზღაურონ ის ხარჯები რაც მათ მოსამზადებლად სახელმწიფო ბიუჯეტიდან დაიხარჯა.

ერთ დღეში შეიძლება ისე მოხდეს რომ მათში დაბანდებული თანხა, სხვა ქვეყნის წარმატების მისაღწევად იქნება გამოყენებული", - ამბობს სვიშჩევი.

საინტერესოა, რომ რუსები ამ კანონოპროექტის მიღებაზე მას შემდეგ დაფიქრდნენ, რაც ფიგურულმა მოციგურავეებმა დიანა დევისმა და გლებ სმოლკინმა მოქალაქეობა შეიცვალეს და ამიერიდან საქართველოს სახელით იასპარეზებენ.

ისინი რუსეთის ნაკრების კანდიდატებად განიხილებოდნენ და 2022/23-წლების სეზონში სპორტის სამინისტროდან ფინანსდებოდნენ, ახლა კი კონტრაქტი გაუწყვიტეს.

ზემოთ აღნიშნული კანონი სპორტის ყველა სახეობაში გავრცელდება, ასევე შეეხება იმ პირებსაც, ვინც არ არიან რუსეთის ნაკრების წევრები, მაგრამ კანდიდატებად ითვლებიან.

გამოცემა "ხოლოდის" ინფორმაციით, ორასზე მეტია იმ სპორტსმენთა რიცხვი, ვინც რუსეთის სახელით გამოსვლაზე უარი თქვა, ან მომავალში აპირებს. სიაში არიან როგორც ევროპისა და მსოფლიოს ჩემპიონები, ასევე დამწყებები.

მოგეხსენებათ, რუსეთის უკრაინაში შეჭრისა და ომის დაწყების შემდეგ, ამ ქვეყნის წარმომადგენელთა სპორტსმენებს სანქციები აქვთ დაწესებული.