ქალთა 12 და ვაჟთა 61 გუნდი მონაწილეობდა მოჭადრაკეთა ევროპის საკლუბო ჩემპიონატში (საპრიზო ფონდი 35.000 ევრო), რომელსაც ბერძნულმა პორტო-კარასმა (ჰალკიდიკი) უმასპინძლა. 18 ოქტომბერს საპრიზო ადგილებისთვის გადამწყვეტი ორთაბრძოლები გაიმართა. ქალთა ფინალში წინა წლის ჩემპიონი ბათუმის "ნონა" და მსგავსი ტურნირების მრავალგზის გამარჯვებული "მონტე კარლო" შეხვდნენ ერთმანეთს.
პირველ დაფაზე ანა მუზიჩუკმა თეთრი ფიგურებით ნანა ძაგნიძე დაამარცხა და ოქროს მედლების ბედიც ამ ორთაბრძოლამ გადაწყვიტა, რადგან მეორე დაფაზე ნინო ბაციაშვილმა პია კრამლინგს აჯობა, ხოლო ლელა ჯავახიშვილი და ბელა ხოტენაშვილი, შესაბამისად, მონიკა სოჩკოსა და დეიმანტე კორნეტეს დაუზავდნენ.
მესამე ადგილისთვის პაექრობა სანკტ-პეტერბურგის (რუსეთი) SSHOR-სა და "იუგრას" (რუსეთი) შორის ფრედ - 2:2 დასრულდა. რადგანაც ოთხივე დაფაზე მეტოქეები დაზავდნენ (ანასტასია ბოდნარუკი-ანა უშენინა, ევგენია ოვოდი-ნატალია პოგონინა, დინა ბელენკაია-ოლგა გირია, ელენა სემიონოვა-ბაირა კოვანოვა), მათ შორის უძლიერესის გამოსავლენად დაინიშნა ბლიც-მატჩი. 2.5:1.5 გაიმარჯვა "იუგრამ" და ბრინჯაოს ჯილდო დაისაკუთრა.
დანარჩენი ადგილებისთვის ორთაბრძოლები ასე დასრულდა: V ადგილისთვის: "კიევი" (უკრაინა)-"ოდლარ იურდუ" (აზერბაიჯანი) 3:1, VII ადგილისთვის: "კაისა" (იტალია, PA)-"ბიირ შევა" (ისრაელი) 2.5:1.5, IX ადგილისთვის: "მარიბორი" (სლოვენია)-"ფილიდორი" (საფრანგეთი) 3.5:0.5, XI ადგილისთვის: "კაისა" (იტალია, BAM)-"გალაქსიასი" 3:1.
დაფების მიხედვით ქართველთა მონაგარი ასეთია: I დაფა: ოქროს მედალი ანა მუზიჩუკმა მოიპოვა, 6 შესაძლებლობიდან 3 ქულით ნანა ძაგნიძემ მე-6 ადგილი დაიკავა; II დაფაზე საუკეთესო იყო პია კრამლინგი, 6-დან 4.5 ქულით ვერცხლი ნინო ბაციაშვილს ხვდა. III დაფაზე 6-დან 5 ქულით პირველობა არავის დაუთმო ლელა ჯავახიშვილმა და, ცხადია, მას ოქროს მედალი ერგო. IV დაფაზე პირველი იყო დეიმანტე კორნეტე, 6-დან 5 ქულით მეხუთე ადგილზე ბელა ხოტენაშვილი გავიდა, V დაფაზე ყველას ელენა სემიონოვამ აჯობა, 4-დან 3 ქულით სალომე მელია მე-4 ადგილს დასჯერდა.
ვაჟთა შეჯიბრების ბოლო ტურში გადამწყვეტი აღმოჩნდა პეტერბურგის (რუსეთი) "მედნი ვსადნიკისა" და ნორვეგიის "ველერენგას" დაპირისპირება. პირველ დაფაზე მსოფლიოს ჩემპიონი მაგნუს კარლსენი და პიოტრ სვიდლერი დაზავდნენ. გუნდურ შეხვედრაში კი პეტერბურგელებმა გაიმარჯვეს 4:2 და 12 ქულით ჩემპიონობა მოიპოვეს. ამდენივე ქულას მოუყარა თავი ჩეხეთის "ნოვი ბორმა", რომელმაც გუშინ აზერბაიჯანის "ოდლარ იურდუ" დაჯაბნა - 4:2, მაგრამ უარესი დამატებითი მაჩვენებლებით მეორე ადგილზე გავიდა. დაზავდნენ რუსეთის "მოლოდიოჟკა" და იტალიის "პადოვა". ამ მშვიდობიანმა დასასრულმა ბრინჯაოს მედლები "მოლოდიოჟკას" მოუტანა. მართალია, მანაც 11 ქულა მოაგროვა, მაგრამ უკეთესი კოეფიციენტით აჯობა "პადოვას", "ველარენგასა" და "ალკალოიდს" (მაკედონია), რომლებმაც, შესაბამისად, მეოთხე-მეექვსე ადგილები გაინაწილეს.
პირველ დაფაზე საუკეთესო იყო ჩინელი დინ ლიჟენი (ალკალოიდი). მას მცირედით ჩამორჩა რადოისლავ ვოიტაჩეკი (ნოვი ბორი), რომელსაც მეორე ადგილი ხვდა. მესამე იყო მაგნუს კარლსენი (ვალერენგა). დანარჩენ დაფებზე პირველ ადგილებზე გავიდნენ: ნიკიტა ვიტიუგოვი, ვლადიმირ ფედოსეევი, მაქსიმ მატლაკოვი (ყველა - მედნი ვსადნიკი), დანიელე ვოკატურო (პადოვა), მარკუს რაგერი (ნოვი ბორი), ვიქტორ ლაზნიჩკა (ნოვი ბორი) და დანიილ დვირნი (პადოვა).
(იბეჭდება მცირე ცვლილებით)
ყოველდღიური სპორტული გაზეთი "ლელო"
