ფორმულა 1. გერმანიის გრანპრის წინ

იტალიური კომპანია "პირელის" სპორტული განყოფილების ხელმძღვანელმა პოლ ჰემბრიმ ჟურნალისტებს მოუყვა გერმანიის გრანპრისთვის მზადების შესახებ, რომელიც უახლოეს უქმეებზე გაიმართება. მისი სიტყვებით, სილვერსტოუნში ინციდენტების შემდეგ, როცა რამდენიმე პილოტმა საბურავების მწყობრიდან გამოსვლის გამო წარმატების შანსი დაკარგა, "პირელიმ" მონახა კომპრომისი სიჩქარესა და უსაფრთხოებას შორის.

"გასაკვირია, მაგრამ "ნიურბურგრინგი" ერთ-ერთი იმ ტრასათაგანია, სადაც გამოსვლის მინიმალური გამოცდილება გვაქვს - აქ მხოლოდ ერთ გრანპრიში მივიღეთ მონაწილეობა, - ამბობს ჰემბრი. - ამასთან, დარწმუნებულნი ვართ, რომ გერმანიაში საშუალო და რბილი ტიპის საბურავების ჩატანით სწორი კომპრომისი ვიპოვეთ სიჩქარესა და საიმედოობას შორის.

ზუსტად ასეთი არჩევანი გავაკეთეთ 2011 წელს, მაგრამ მას შემდეგ ჩვენი საბურავები უფრო რბილი და სწრაფი გახდა. ამიტომაც ველოდებით წრეზე უფრო მაღალ დროს და საშუალოდ დაახლოებით სამ პიტსტოპს თითო პილოტზე. "ნიურბურგრინგის" ავტოდრომი ისეთი მომთხოვნი არ არის საბურავის მიმართ, მაგრამ მასთან მუშაობის მხრივ, მთელი უქმეები ყურადღება უნდა მიექცეს ისეთ ასპექტებს, როგორიც არის ბორდიურებზე ასვლა. ჩვენი ვარაუდით, საბურავების შემადგენლობებს შორის წრეზე დროში სხვაობა 0.8-1.0 წამს შეადგენს. ასე რომ, გუნდებს სტრატეგიის არჩევის ბევრი ვარიანტი ექნებათ".

* * *
ფორმულა 1-ის კალენდარი ისეა შედგენილი, რომ ბრიტანულ და გერმანულ ეტაპებს შორის სხვაობა მხოლოდ ერთი კვირაა. კალენდრის შემდგენლებს რომ სცოდნოდათ "პირელის" საბურავებთან დაკავშირებული პრობლემები, დროში მინიმუმ ორკვირიან სხვაობას აიღებდნენ. "ნიურბურგრინგზე" მონაწილეებს მოუწევთ მოდიფიცირებულ უკანა საბურავებთან შეგუება და გვინდა გვჯეროდეს, რომ ისინი ბრიტანული სიხშირით არ გამოვლენ მწყობრიდან.

გერმანიის გრანპრი
ჩატარების ადგილი: ნიურბურგრინგი (გერმანია)
წრის სიგრძე: 5.148 კმ
წრის რეკორდი: 1:29,468 (მიხაელ შუმახერი, 2004)

საერთო ჩათვლა
1. ფეტელი (რედ ბული) - 132 ქულა
2. ალონსო (ფერარი) - 111
3. რაიკონენი (ლოტუსი) - 98
4. ჰემილტონი (მერსედესი) - 89
5. უებერი (რედ ბული) - 87
6. როსბერგი (მერსედესი) - 82
7. მასა (ფერარი) - 57
8. დი რესტა (ფორს ინდიან) - 36

უქმეების განრიგი
5 ივლისი, 12:00 - I პრაქტიკა
5 ივლისი, 16:00 - II პრაქტიკა
6 ივლისი, 13:00 - III პრაქტიკა
6 ივლისი, 16:00 - კვალიფიკაცია
7 ივლისი, 16:00 – რბოლა

ყოველდღიური სპორტული გაზეთი "ლელო"

ასევე იხილეთ:
კიმი რაიკონენი: წინასწარ არაფერს გპირდებით