ტექნიკური პრობლემა ბაჰრეინში
სეზონის სტარტზევე ფეტელმა ყველას მიანიშნა, რომ მისი "რედ ბული" სერიოზული ბრძოლისთვის იყო განწყობილი: ბაჰრეინში პირველ ეტაპზე პოული მოიპოვა, რბოლის დიდი ნაწილი ლიდერობდა და დამაჯერებლად უგებდა "ფერარის" წყვილს, მაგრამ მისმა ძრავამ მოულოდნელად სიმძლავრე დაკარგა და გერმანელი მხოლოდ მეოთხე მივიდა ფინიშთან.
დამაჯერებელი მოგება მალაიზიაში
მელბურნში კიდევ უფრო დიდი იმედგაცრუების შემდეგ (სებასტიანი ისევ ლიდერობდა, მაგრამ ბრძოლა საბურავთან დაკავშირებული
შეჯახება უებერთან
"სეპანგზე" სებასტიანის გამარჯვების შემდეგ, ინციატივა მარკ უებერის მხარეს გადავიდა და ავსტრალიელმა ზედიზედ ორი რბოლა მოიგო - ესპანეთსა და მონაკოში. მარკი თურქეთშიც ლიდერობდა, მაგრამ ფეტელი კვალში ედგა. ბოლოს გერმანელმა შეტევა გადაწყვიტა, რომელიც ორი "რედ ბულის" ავარიით დასრულდა. სებასტიანი დისტანციას ჩამოშორდა, უებერმა კი ბრძოლა გააგრძელა, მაგრამ წინ გაუშვა "მაკლარენების" წყვილი. ამ ავარიის შემდეგ ავსტრიულ საჯინიბოში სიტუაცია დაიძაბა...
დაბრუნება ვალენსიაში
მონრეალის ტრასა სტილით არ შეესაბმებოდა "რედ ბულის" ბოლიდებს და სებასტიანმა ჩააგდო კანადური ეტაპი. სამაგიეროდ, ორი კვირის შემდეგ ვალენსიაში დაკარგული აინაზღაურა - პოული და შემდეგ რბოლა მოიგო, მის თანაგუნდელს კი ესპანური ეტაპი საკუთარი ბოლიდის "გაფრენით" დაამახსოვრდა.
პირველი წრე სილვერსტოუნში
"რედ ბულში" დაძაბულობამ კულმინაციას ბრიტანეთში მიაღწია, როცა გუნდმა უშუალოდ კვალიფიკაციის წინ გადაწყვიტა ერთადერთი მოდიფიცირებული ანტიფრთის უებერის ბოლიდიდან ფეტელის მანქანაზე გადატანა. სებასტიანმა პოული მოიპოვა, მაგრამ სტარტი წააგო მარკთან. შემდეგ ლიდერობის დაბრუნება სცადა, თუმცა საბურავი გაუსკდა და რბოლის გადარჩენა შეუძლებელი გახდა. ფეტელი მხოლოდ მეშვიდე მივიდა ფინიშთან.
კონტრაქტი ბატონთან
სპაზე სებასტიანი დიდი ხანი მესამე ადგილზე იყო - ის კვალში ედგა ჯენსონ ბატონს. შეტევაზე წასულმა გერმანელმა მართვა დაკარგა და ინგლისელი ტრასიდან გადააგდო. ბატონმა რბოლის გაგრძელება ვერ შეძლო, ფეტელი კი ტრასაზე დაბრუნდა, მაგრამ ვიტანტონიო ლიუცისთან შეჯახებამ მხოლოდ მე-15 ადგილი მოუტანა. ბელგიური უქმეების შემდეგ სებასტიანი ჩემპიონატის ლიდერ უებერთან 31 ქულას აგებდა.
ზედიზედ მეორე მოგება სუზუკაზე
მონცაზე მეოთხე და სინგაპურში მეორე ადგილზე გასვლის შემდეგ, სებასტიანი, როგორც იქნა, დაბრუნდა პოდიუმის უმაღლეს საფეხურზე. ფეტელმა ზედიზედ მეორედ მოიგო იაპონიის გრან-პრი, რისი წყალობითაც უებერთან ჩამორჩენა 14 ქულამდე შეამცირა - ჩემპიონატის დასრულებამდე სამი ეტაპის ადრე გერმანელს ტიტულის მოგების პერსპექტივა გაუჩნდა.
დრამა კორეაში
კორეის გრან-პრის დიდი ნაწილის განმავლობაში ისე ჩანდა, რომ სებასტიანი სეზონში პირველად შეძლებდა საერთო ჩათვლაში პირველ ადგილზე გადასვლას. წინა დღეს მან პოული მოიპოვა და რბოლას სტარტიდანვე ლიდერობდა, უებერმა კი მანქანა ეტაპის სტარტზევე დაამტვრია. მაგრამ ფინიშამდე რამდენიმე წრით ადრე ფეტელის ბოლიდის ძრავა მწყობრიდან გამოვიდა და გერმანელი უქულოდ დარჩა.
გამარჯვება ბრაზილიაში
"ინტერლაგუშის" რბოლის სტარტზევე ფეტელმა გაასწრო პოულის მოულოდნელ მფლობელ ნიკო ჰიულკენბერგს, რის შემდეგაც უპრობლემოდ მოიპოვა უებერზე სოლიდური უპირატესობა. მთავარი ინტრიგა შემდეგში მდგომარეობდა - გამოიყენებდა თუ არა "რედ ბული" გუნდურ ტაქტიკას და აქცენტს მარკ უებერის წარმატებაზე გადაიტანდა? მაგრამ ავსტრიელებმა პრინციპებს არ უღალატეს - სებასტიანმა რბოლა მოიგო და ტიტულის შანსი შეინარჩუნა - ბოლო რბოლის წინ ლიდერ ფერნანდო ალონსოსთან 15 ქულას აგებდა.
ტრიუმფი აბუ დაბიში
ფეტელს აუცილებლად უნდა მოეგო სეზონის ფინალური ეტაპი და მან ეს გააკეთა. მისი მთავარი კონკურენტები - ალონსო და უებერი ადრეულ პიტ-სტოპზე შევიდნენ და ვიტალი პეტროვის უკან ჩარჩნენ. ალონსოსთვის გასაკვირად, რუსი არ აპირებდა ტიტულის პრეტენდენტთა გატარებას. სებასტიანს აწყობდა მოვლენათა ამგვარი განვითარება - და მან სეზონში მეექვსე მოგებით პირველად მოიპოვა მსოფლიოს ჩემპიონის ტიტული.
