მიხაელ შუმახერი სებასტიან ფეტელს აქებს

მსოფლიოს შვიდგზის ჩემპიონმა მიხაელ შუმახერმა განაცხადა, რომ "რედ ბულის" პილოტს სებასტიან ფეტელს შეუძლია გააუმჯობესოს მისი რეკორდები.

"მას საუკეთესო ტექნიკა აქვს ფორმულა 1-ში, ჩემპიონატს კი, როგორც წესი, საუკეთესოები იგებენ, - მოჰყავს შუმახერის სიტყვები Motorsport-ს. - რეკორდები იმისთვის არსებობს, რომ ის ვიღაცამ გააუმჯობესოს. როცა გამოსვლას ვიწყებდი, მოტივაციას რეკორდების დამხობა მაძლევდა და საბოლოოდ, მოვახერხე საუკეთესო გავმხდარიყავი. დარწმუნებული იყავით, რომ ფეტელი შეძლებს ჩემს გასწრებას და მე ეს მხოლოდ გამიხარდება. მოკლე დროში მან შეძლო სამი ჩემპიონატის მოგება. მაშინ, რატომ ვერ მოახერხებს შვიდი ტიტულის მოპოვებას?!"

* * *
ამასობაში, გაზეთ "ბილდს" ინტერვიუ მისცა სებასტიან ფეტელმა, რომელმაც განაცხადა, რომ ჯერ არ აპირებს სხვა გუნდში გადასვლას.

"მიყვარს რბოლები. როცა დილით ვიღვიძებ, არ მჭირდება ვინმეს დაძალება რაიმეს გასაკეთებლად. მინდა ყველაზე სწრაფი ვიყო, ყველაზე ადრე მივიდე ფინიშზე. დღემდე ვერ დავკმაყოფილდი მოგებებით. გამიმართლა, რომ დაკავებული ვარ საქმით, რომელიც მაინტერესებს. როცა მომწყინდება, დავფიქრდები რა გავაკეთო მომავალში. არ გამოვრიცხავ, რომ ხუთი წლის შემდეგ დავტოვებ ფორმულა 1-ს.

ეს იმ შემთხვევაში მოხდება, თუ დავიღლები რბოლების გამო. შესაძლოა, სხვა გუნდში გავაგრძელო კარიერა, რადგან ეს ახალი გამოწვევა გახდება ჩემთვის. თუმცა ახლა ბედნიერი ვარ "რედ ბულში" და ვერ წარმომიდგენია, რომ ოდესღაც სხვა გუნდის ბოლიდის საჭეს მივუჯდები", - ამბობს ფეტელი.

ყოველდღიური სპორტული გაზეთი "ლელო"

ასევე იხილეთ:
მიხაელ შუმახერმა "ჩემპიონთა რბოლა" დაადასტურა