"უილიამსი" გახდა პირველი გუნდი 2014 წლის პელოტონში, რომელმაც ფოტოების მეშვეობით გვიჩვენა ახალ ბოლიდზე - FW36-ზე შეცვლილი "ცხვირის" დიზაინი. ბრიტანული საჯინიბოს ავტომობილი "მერსედესის" ძრავით იქნება აღჭურვილი.ახალი ტექნიკური რეგლამენტის თანახმად, გუნდები ვალდებულნი არიან, დაიცვან 185-მილიმეტრიანი დაშორება ასფალტსა და მანქანის წინა ნაწილს შორის. ამიტომაც "უილიამსის" ტექნიკურმა შტაბმა გადაწყვიტა, მიემართა "ცხვირის წვერის" დიზაინისთვის. მისი არსი შემდეგში მდგომარეობს: შასის შუა ნაწილში "ცხვირი" მაქსიმალურად მაღლა მდებარეობს, რათა გაიზარდოს მანქანის ქვეშ გამავალი ჰაერის ნაკადი, ხოლო წინა ანტიფრთასთან ახლოს "ცხვირი" მკვეთრად დაქანებულია (სწორედ რეგლამენტის მოთხოვნების დასაკმაყოფილებლად).
ფოტოებზე
"წელს ფორმულა 1-ის მანქანებში ბევრ თანამედროვე ტექნოლოგიას ვხედავთ. ტურბოძრავები ადრეც გამოიყენებოდა, მაგრამ განსხვავება იმაშია, რომ დღეს ჩვენ უბრალოდ კი არ ვიყენებთ ახალ ძრავებს, არამედ სრულიად ახალ ტექნოლოგიურ სისტემაზე გადავდივართ. კერძოდ, ატმოსფერული ძალისმიერი აგრეგატებიდან, რომლებშიც გამოიყენებოდა ჰიბრიდული ტექნოლოგიები, მთლიანად ჰიბრიდულ ძრავებზე გადავერთეთ.
ჩვენ პირველად ვთანამშრომლობთ "მერსედესთან" და ჩემზე დიდ შთაბეჭდილებას ახდენს ამ კომპანიის სპეციალისტებისთვის დამახასიათებელი პროფესიონალიზმი და საქმისადმი ერთგულება. დარწმუნებული ვარ, ჩვენი ძრავა კონკურენტუნარიანი იქნება", - ამბობს "უილიამსის" ტექნიკური დირექტორი პეტ სიმონდსი.
FW36-ის შასი ასევე აღჭურვილია ახალი რვასაფეხურიანი გადაცემათა კოლოფით. ის "უილიამსშია" დამზადებული, რადგან გუნდში გადაწყვიტეს, არ შეეძინათ ეს აგრეგატი "მერსედესისგან".
ბრიტანულმა გუნდმა შეძლო, მაქსიმალურად შეემცირებინა ახალი ავტომობილის წონა, რათა ის შესაბამისობაში მოსულიყო ახალ რეგლამენტთან. წონის მაქსიმალური ზღვარი 690 კილოგრამს შეადგენს.
ახალ მანქანას საქმეში ხერესის ტესტებისას ვიხილავთ, რომელიც 28 იანვარს დაიწყება. წინასასეზონო ვარჯიშების დროს შასი ტრადიციულ ლურჯ ფერში იქნება გადაწყვეტილი.
ყოველდღიური სპორტული გაზეთი "ლელო"
