ვავრინკა სუპერკლასიკოს დაელოდება

სათამაშო დღის პროგრამას ასრულებდა მამაკაცთა უნიკალური ნახევარფინალი. პირველად დიდი ხნის განმავლობაში, ფინალისტს არკვევდნენ ჩოგბურთელები, რომლებიც არასოდეს ყოფილან ავსტრალიის ღიას გადამწყვეტ მატჩში. ტომაშ ბერდიხის ანგარიშზე იყო 2010 წლის უიმბლდონის ფინალი, ვავრინკასთვის კი ეს გახლდათ 2013 წლის აშშ-ის ღია პირველობის შემდეგ მეორე ნახევარფინალი. ადრე ვავრინკა და ბერდიხი 13-ჯერ შეხვდნენ ერთმანეთს და შვეიცარიელი წინ იყო - 8:5. თანაც, სტანისლასს მოგებული ჰქონდა ბოლო სამი მატჩი.

მეოთხედფინალში ჯოკოვიჩის დამარცხებით, ვავრინკა ახალ დონეზე გავიდა და ამიტომაც 22 იანვრის მატჩში ფავორიტად მიიჩნეოდა. ბერდიხს კი ნახევარფინალამდე სერიოზული წინააღმდეგობა არ შეხვედრია.

ნახევარფინალი მოსალოდნელი სცენარით განვითარდა. ორივე ჩოგბურთელი საკუთარ მოწოდებას ინარჩუნებდა და მთელი შეხვედრის განმავლობაში ერთადერთი ბრეიკი დაფიქსირდა - სწორედ მან გადაწყვიტა პირველი სეტის ბედი ვავრინკას სასარგებლოდ. ბერდიხს პირველ პარტიაში ერთადერთი ბრეიკი ჰქონდა, მაგრამ ამ დროს სმეში ააცილა მიზანს.

მეორე სეტში ერთადერთი ბრეიკი ვავრინკამ მიიღო 3:3-ზე, მაგრამ ბერდიხი მოწოდებამ გადაარჩინა. ჩოგბურთელებმა ტაი-ბრეიკამდე მიაღწიეს. მე-13 გეიმში უკეთ ტომაში აწვდიდა და 7:1 მოიგო საჩოგბურთო ლატარია.

მესამე სეტშიც საქმე ტაი-ბრეიკამდე მივიდა. ორივე შესანიშნავად აწვდიდა, თუმცა ერთი ბრეიკ-პოინტი მაინც ვნახეთ. მეშვიდე გეიმში ბერდიხმა ვერ მიიღო მოწოდება და ეს ერთადერთი შანსი გაანიავა. ტაი-ბრეიკზე ჩეხმა ორი ორმაგი შეცდომა დაუშვა და წარმატებაზე ლაპარაკი ზედმეტი იყო.

არანაირი ცვლილება არ მომხდარა თამაშის სცენარში მეოთხე სეტის დროს. მესამე ტაი-ბრეიკი ტომაშმა ბადესთან უხეში შეცდომით დაიწყო, 1:3-ზე კი მას ისევ უმტყუნა ნერვებმა - ორმაგი შეცდომა დამღუპველი აღმოჩნდა. ვავრინკამ ორი მინი-ბრეიკით დაწინაურება მოახერხა და მეორე მატჩბოლიდან დაასრულა შეხვედრა.

ვავრინკას მეტოქე ფინალში 23 იანვარს გაირკვევა, როცა "სუპერკლასიკო" გაიმართება როჯერ ფედერერსა და რაფაელ ნადალს შორის.

კაცები
1/2-ფინალი
სტანისლას ვავრინკა (შვეიც, 8)-ტომაშ ბერდიხი (ჩეხ, 7) 6:3, 6:7(1), 7:6(3), 7:6(4).

ყოველდღიური სპორტული გაზეთი "ლელო"