ქართველმა ჩოგბურთელებმა წელი გამარჯვებით დაიწყეს

ქართველი ჩოგბურთელები ნაახალწლევს საერთაშორისო ტურნირებში ჩაებნენ.

ნიკოლოზ ბასილაშვილი ყატარში იმყოფება და დოჰას საერთაშორისო შეჯიბრებაში (საპრიზო ფონდი 1.221.320 დოლარი) ცდის ძალებს.

საკვალიფიკაციო ეტაპის სტარტზე თბილისელმა ჩოგბურთელმა პორტუგალიელი გასტაო ელიაში დაამარცხა - 6:4, 6:1.

მეორე წრეში ჩვენებური ავსტრიელ ფილიპ ოსვალდს დაუპირისპირდა. პირველ შეხვედრაში ამ უკანასკნელმა მასპინძელი აბდულაჰ შანან ალჰარასი ჩამოიშორა გზიდან - 6:0, 6:1. ბასილაშვილმა ოსვალდს ორ სეტში მოუგო - 6:3, 6:3 და მესამე წრეში სერბი ილია ბოზოლიაცის მძლეველ (6:4, 3:6, 7:6) ფილიპ კრაინოვიჩს (სერბეთი) გაუწევს მეტოქეობას. ამ პაექრობაში წარმატების შემთხვევაში ძირითად ბადეში ითამაშებს.

ჩინეთის ქალაქ შენჟენში (საპრიზო ფონდი 500.000 დოლარი) თამაშობს თბილისელი ოქსანა კალაშნიკოვა. იგი ტაივანელ ჩინ-ვეი ჩანთან არის შეამხანაგებული და ტურნირზე მე-4 ნომრადაა განთესილი.

ქართულ-ტაივანურმა დუეტმა პირველ წრეში იაპონელი რიკა ფუჯივარა და ტაივანელი შუ-ინ ჰსიე დაამარცხა ძალების დაუძაბავად - 6:1, 6:2. მეოთხედფინალში კალაშნიკოვა და ჩანი ალექსანდრა კრუნიჩი (სერბეთი)-კატერინა სინიაკოვას (ჩეხეთი) და ტიმეა ბაშინსკი (შვეიცარია)-ვერა ზავონარევას (რუსეთი) შორის უძლიერესთან გაარკვევენ ურთიერთობას.

ყოველდღიური სპორტული გაზეთი "ლელო"