რაფაელ ნადალს გრუნტზეც უჭირს

გუშინ, გვიან ღამით უნდა გამართულიყო ფინალი რიო-დე-ჟანეიროს მამაკაცთა ტურნირში, მანამდე კი ნახევარფინალში დიდი სენსაცია მოხდა - თავის საყვარელ გრუნტზე დამარცხდა მსოფლიოს მესამე ჩოგანი, ესპანელი რაფაელ ნადალი.

"გრუნტის მეფის" დამარცხება მოახერხა იტალიელმა ფაბიო ფონინიმ. ბოლო ორი წლის განმავლობაში ის მხოლოდ მეოთხე ჩოგბურთელია, ვინც ნადალის გრუნტზე ძლევა შეძლო - მანამდე ეს გააკეთეს დავიდ ფერერმა (მონტე კარლო), ნოვაკ ჯოკოვიჩმა (რომი) და ნიკოლას ალმაგრომ (ბარსელონა). სულ კი ნადალმა ამ საფარზე კარიერაში მხოლოდ 25-ე მატჩი წააგო. საინტერესოა, რომ აქამდე რაფას ზედიზედ 52 ტურნირის ნახევარფინალი ჰქონდა მოგებული გრუნტისსაფარიან კორტებზე.

27 წლის ფონინი მეცხრედ გავიდა ATP-ის ტურნირის ფინალში და კარიერაში მეხუთე ტიტულისთვის გუშინ კიდევ ერთ ესპანელს, დავიდ ფერერს უნდა გაბრძოლებოდა. ფონინიმ ნადალთან მოგებით პირველი გამარჯვება მოიპოვა კარიერაში ATP-ის TOP5-ის წარმომადგენელთან - მანამდე რეიტინგის ლიდერებთან ზედიზედ 23 წაგება ჰქონდა. გარდა ამისა, პირველად მოუგო ნადალს, ხოლო ფერერთან მას შვიდიდან შვიდი წაგება აქვს.

პირველ სეტში კატასტროფას არაფერი მოასწავებდა - ნადალმა 6:1 გაანადგურა მეტოქე, მაგრამ მეორე პარტიიდან შეცდომების დაშვება დაიწყო, თან იტალიელი უფრო აგრესიულად ათამაშდა. აპენინელმა მეორე სეტი სწრაფად მოიგო - 6:2, მესამეში კი ბოლოს გატეხა გრუნტის ლეგენდის წინააღმდეგობა და ორ საათსა და 17 წუთში 1:6, 6:2, 7:5 გაიმარჯვა. იტალიელის ანგარიშზე 32 "ვინერსი" და ცხრა ბრეიკ-პოინტიდან ხუთი ბრეიკი მოდის.

"პირველი სეტი შესანიშნავი გამოვიდა, მაგრამ წარმატების განვრცობა ვერ შევძელი, სირთულეები მქონდა. ასევე, ვერ გავიგე, რატომ შემექმნა პრობლემები ფიზიკურ მდგომარეობასთან დაკავშირებით.

მეორე სეტის სტარტზე თავს ცუდად ვგრძნობდი. გაცილებით მალე დავიღალე, ვიდრე ეს ჩვეულებრივ ხდება. ასეთი რამ კარიერაში ძალიან იშვიათად მქონია.

ახლა, უბრალოდ, უნდა მივიღო ეს წაგება და წინსვლა გავაგრძელო. ვარჯიშებზე კარგად ვმუშაობ, ბევრ კომპონენტში მოვუმატე. დარწმუნებული ვარ, სწორი მიმართულებით მივდივარ", - ასე ახსნა თავისი წაგება ნადალმა.

ყოველდღიური სპორტული გაზეთი "ლელო"