მაიამის "მასტერსის" შემდეგ: მაიამი ციფრებში

მაიამის "მასტერსის" შემდეგ რამდენიმე საინტერესო სტატისტიკური და ისტორიული ფაქტი დაფიქსირდა...

1 - ნოვაკ ჯოკოვიჩი გახდა ისტორიაში პირველი ჩოგბურთელი, რომელმაც სამჯერ შეასრულა დუბლი ინდიან უელსისა და მაიამის "მასტერსებზე". ადრე მხოლოდ როჯერ ფედერერმა შეძლო ორჯერ ერთ სეზონში ამ ტურნირების მოგება.

1 - კარლა სუარეს ნავარო მაიამიში პირველად გავიდა უმაღლესი კატეგორიის ტურნირის ფინალში. ადრე მან უფრო მოკრძალებულ ტურნირებზე შვიდი ფინალი ითამაშა და მხოლოდ ერთი მოიგო. ეს ერთადერთი ტიტული ესპანელს პორტუგალიის ქალაქ ოეირაშში აქვს აღებული.

1 - მარტინა ჰინგისმა და სანია მირზამ ქალების წყვილთა თანრიგში გამოსვლა ზედიზედ ორი მოგებით დაიწყეს. მათ ჯერ წაგება არ აქვთ პროფესიულ ტურში.

3 - ენდი მარეი მაიამის ფინალში გასვლით მესამე ადგილზე გადავიდა ATP-ის კლასიფიკაციაში. კარიერაში მისი მაქსიმუმი მეორე ადგილია (2009).

3 - ტომაშ ბერდიხს კიდევ ერთხელ დააკლდა ერთი ნაბიჯი "მასტერსის" ფინალამდე. ბოლოს ჩეხმა ამ სერიის ტურნირის ფინალში სამი წლის წინ, მადრიდში ითამაშა, როცა ფედერერთან წააგო.

3 - ჯონ ისნერი მესამე ჩოგბურთელია მაიამის "მასტერსის" ისტორიაში, ვინც ნახევარფინალამდე საკუთარი გეიმის წაუგებლად მიაღწია. ასეთი რამ ფედერერმა და ჯოკოვიჩმა შეძლეს, შესაბამისად, 2002 და 2011 წლებში.

4 - სერენა უილიამსი მეოთხე ჩოგბურთელი გახდა ისტორიაში, რომელმაც ერთ კონკრეტულ ტურნირზე რვაჯერ გაიმარჯვა. მანამდე ეს შეძლეს მარტინა ნავრატილოვამ, კრის ევერტმა და შტეფი გრაფმა.

5 - ნოვაკ ჯოკოვიჩმა მეხუთე გამარჯვება მოიპოვა მაიამიში. უფრო მეტჯერ აქ ანდრე აგასის მოუგია - ექვსჯერ.

6 - ტომაშ ბერდიხი 2015 წლის სეზონში მხოლოდ რეიტინგის ტოპ-ათეულის წევრებთან მარცხდება. ექვსი წაგება მხოლოდ ელიტის მოთამაშეებთან.

7 - ნოვაკ ჯოკოვიჩმა ზედიზედ მეშვიდედ დაამარცხა ენდი მარეი. ჰარდის საფარის კორტებზე ამ სერიამ ათ მატჩამდე მიაღწია.

10 - კარლა სუარეს ნავარო კარიერაში პირველად შევიდა WTA-ს კლასიფიკაციის საუკეთესო ათეულში.

10 - სერენა უილიამსმა მეათედ ითამაშა მაიამის ტურნირის ფინალში. ეს მისთვის საუკეთესო შედეგია ყველა ტურნირზე. რვაჯერ უთამაშია სერენას აშშ-ის ღიას გადამწყვეტ მატჩში.

11 - ჯონ ისნერმა შეწყვიტა ტოპ-ათეულის მოთამაშეებთან 11-მატჩიანი მოუგებელი სერია. ამერიკელმა ჯერ მილოშ რაონიჩი დაამარცხა, შემდეგ კი კეი ნიშიკორი ჩამოიცილა გზიდან.

12 - ენდი მარეის 12-მატჩიანი მოუგებელი სერია აქვს "დიდ ოთხეულის" წევრებთან. ბოლო მოგება ბრიტანელს 2013 წლის უიმბლდონზე ჰქონდა, როცა ფინალში ნოვაკ ჯოკოვიჩი დაამარცხა.

14 - WTA-ს კლასიფიკაციის საუკეთესო ათეულში 14 წელია არ გამოჩენილა ესპანელი ჩოგბურთელი. ბოლოს TOP10-ში 2001 წლის მაისში არანჩა სანჩეს-ვიკარიო ირიცხებოდა.

15 - სიმონა ჰალეპმა სერენა უილიამსთან წაგებამდე ზედიზედ 15 მატჩი მოიგო.

18 - ნოვაკ ჯოკოვიჩმა მეთვრამეტედ დაამარცხა მარეი. მათი ურთიერთშეხვედრათა ანგარიში გახდა - 18:8.

18 - სერენა უილიამსის მოგებათა სერია მაიამიში 18 შეხვედრას გაუტოლდა. ბოლო მარცხი 2012 წლით თარიღდება, როცა ამერიკელი კაროლინ ვოზნიაცკისთან დამარცხდა.

18 - სერენა უილიამსმა 2015 წელს 18 მატჩი ჩაატარა და ყველა მოიგო.

22 - ნოვაკ ჯოკოვიჩმა "მასტერსის" სერიის ტურნირებზე 22-ე ტიტული აიღო.
რაფაელ ნადალი 27
როჯერ ფედერერი 23
ნოვაკ ჯოკოვიჩი 22
ანდრე აგასი 17
პიტ სამპრასი 11
ენდი მარეი 9

66 - სერენა უილიამსს კარიერაში 66 ტიტული აქვს მოგებული. მას ერთი მოგება სჭირდება ბილი ჯინ კინგთან გასათანაბრებლად.
მარტინა ნავრატილოვა 167
კრის ევერტი 154
შტეფი გრაფი 107
მარგარეტ კორტი 92
ივონ გულაგონგი 68
ბილი ჯინ კინგი 67
სერენა უილიამსი 66

69 - ჯონ ისნერმა მაიამიში ყველაზე მეტი ეისი ჩააწოდა.

141 - ნოვაკ ჯოკოვიჩი ჯამში 141 კვირის განმავლობაში ლიდერობს ATP-ის კლასიფიკაციას. ამ მაჩვენებლით ის გაუთანაბრდა რაფაელ ნადალს.

500 - კევინ ანდერსონის დამარცხებით ენდი მარეიმ კარიერაში მე-500 გამარჯვება იზეიმა.

700 - სერენა უილიამსმა მაიამიში კარიერაში მე-700 მატჩი მოიგო. ამ მაჩვენებლით ამერიკელი მერვე ადგილზეა ისტორიაში.

ყოველდღიური სპორტული გაზეთი "ლელო"