რეიტინგები: ნოვაკი და სერენა - პირველები ბოლომდე

გასული ორი კვირა ძალიან დაძაბული გამოვიდა რეიტინგული მოვლენების მხრივ. დავიწყოთ მთავარით - სერენა უილიამსმა ნახევარფინალამდე მიაღწია და გაინაღდა პირველი ადგილი სეზონის შედეგების მიხედვით.

მართალია, მან ვერ შეძლო "დიდი სლემის" მოგება, მაგრამ ეს წელი მაინც ფენომენალური გამოუვიდა. ის ზედიზედ მესამედ და კარიერაში მეხუთედ დაასრულებს სეზონს პირველ პოზიციაზე. ამ მაჩვენებლით ის კრის ევერტს გაუთანაბრდა, ხოლო ლიდერი შტეფი გრაფია, რომელმაც რვაჯერ დაასრულა სეზონი ლიდერის რანგში.

გარდა ამისა, უკვე ცნობილია წლის შემაჯამებელი ტურნირის სამი მონაწილე: უილიამსი, სიმონა ჰალეპი და მარია შარაპოვა.

აშშ-ის ღიას მოულოდნელი ჩემპიონი ფლავია პენეტა 26-დან მერვე პოზიციამდე ავიდა. მანამდე 33 წლის იტალიელის რეკორდი - მეათე ადგილი იყო. პენეტამ უკვე გამოაცხადა, რომ წლის ბოლოს ასრულებს კარიერას და, შესაძლოა, მისთვის ბოლო ტურნირი იყოს WTA-ის შემაჯამებელი ჩემპიონატი. "ჩემპიონთა რბოლაში" აპენინელი უკვე მეექვსე ადგილზეა და სინგაპურში მოხვედრის მაღალი შანსი აქვს.

კაროლინ ვოზნიაცკიმ ვერ დაიცვა ქულები შარშანდელი ფინალისთვის, რის გამოც მეექვსე ადგილზე ჩამოვიდა და მეხუთე პოზიცია ლუსი საფაროვას დაუთმო. ათეულიდან გავარდა კარლა სუარეს ნავარო და მისი ადგილი სწორედ პენეტამ დაიკავა. და კიდევ, მეოთხედფინალში გასვლით, კრისტინა მლადენოვიჩი 28-ე ჩოგანი გახდა. მან გაუსწრო ალიზ კორნეს და, ახლა, ქალებში საფრანგეთის პირველი ნომერია.

ცალკე ვთქვათ ლუსი საფაროვაზე. ის კარიერაში პირველად შევიდა TOP5-ში. ჩეხი გახდა მხოლოდ მე-12 ჩოგბურთელი ისტორიაში, ვისი პირადი რეკორდი მეხუთე ადგილია კლასიფიკაციაში. ამ 12-დან ხუთი მოქმედი ჩოგბურთელია. საფაროვას გარდა, ესენი არიან: ეჟენი ბუშარი, ანჟელიკ კერბერი, სარა ერანი და დანიელა ჰანტუხოვა, რომელსაც ეს პოზიცია 12 წლის წინ ეკავა.

იმ ჩოგბურთელთაგან, რომლებმაც დაასრულეს კარიერა და მათი პიკი მეხუთე ადგილი იყო, არიან რუსი ანა ჩაკვეტაძე, ბელარუსი ნატაშა ზვერევა, ამერიკელები კეტი ჯორდანი და როზმარი კაზალსი, ბრიტანელი ჯო დიური, ჰოლანდიელი ბეტი სტოვე და გერმანელი სილვია ჰანიკა. საინტერესოა, რომ ამ 12 ჩოგბურთელიდან არც ერთს არ მოუგია "დიდი სლემის" ტურნირი.

WTA. TOP10
1(1). სერენა უილიამსი (აშშ) 11 501
2(2). სიმონა ჰალეპი (რუმ) 6 780
3(3). მარია შარაპოვა (რუს) 5 795
4(4). პეტრა კვიტოვა (ჩეხ) 5 295
5(6). ლუსი საფაროვა (ჩეხ) 3 570
6(5). კაროლინ ვოზნიაცკი (დან) 3 510
7(7). ანა ივანოვიჩი (სერ) 3 440
8(26). ფლავია პენეტა (იტა) 3 317
9(9). გარბინ მუგურუსა (ესპ) 3 305
10(8). კაროლინა პლიშკოვა (ჩეხ) 3 215

* * *
ნოვაკ ჯოკოვიჩმა, ისევე როგორც უილიამსმა, უკვე გაინაღდა პირველი ადგილი მიმდინარე სეზონის შედეგების მიხედვით. პირველად კარიერაში, სერბმა მთელი სეზონი პირველ ადგილზე გაატარა - ერთი კვირითაც არ დაუთმია ლიდერობა. ჯოკოვიჩი მეოთხედ დაასრულებს წელს პირველი ჩოგანის რანგში. როჯერ ფედერერს ერთით მეტი საბოლოო პირველი ადგილი აქვს. რეკორდსმენი კი პიტ სამპრასია, რომელმაც ასეთ შედეგს ექვსჯერ მიაღწია.

ნიუ იორკში გამარჯვების შემდეგ, ნოვაკმა მეორე ადგილთან 6740 ქულით გაზარდა უპირატესობა, გარდა ამისა, რეიტინგში ქულების სარეკორდო რაოდენობა აქვს - 16145. ფედერერმა აშშ-ის ღიას შემდეგ, წლის შემაჯამებელ ტურნირზე თამაში გაინაღდა, ისევე, როგორც მისმა თანამემამულემ სტენ ვავრინკამ. უფრო ადრე, ლონდონის საგზურები ჯოკოვიჩმა და ენდი მარეიმ მოიპოვეს.

მარინ ჩილიჩმა ვერ შეძლო ტიტულის დაცვა. მართალია, ხორვატმა ნახევარფინალამდე მიაღწია, მაგრამ მაინც ბევრი ქულა დაკარგა და მეცხრე ადგილიდან 14-მდე დაქვეითა. TOP10-ში კი შევიდა ჟილ სიმონი, რომელიც ნიუ იორკში უკვე პირველ რაუნდში გავარდა.

ჩააგდო ამერიკის ღია პირველობა შარშანდელმა ფინალისტმა კეი ნიშიკორიმ. იაპონელმა სასტარტო მატჩი წააგო ბენუა პერთან. კეიმ 1200 ქულა დაკარგა და მეოთხედან მეექვსე ადგილამდე დაეშვა. მეოთხე პოზიციაზე გადაინაცვლა ვავრინკამ, მეხუთეზე - ტომაშ ბერდიხმა.

ივო კარლოვიჩი ბოლო შვიდ წელიწადში პირველად შევიდა ტოპ-ოცეულში. 36 წლის ხორვატი TOP20-ის ყველაზე ასაკოვანი წევრია ჯიმი კონორსის შემდეგ. 37 წლის ამერიკელი 1990 წელს იყო საუკეთესო ოცეულში.

ATP. TOP10
1(1). ნოვაკ ჯოკოვიჩი (სერ) 16 145
2(2). როჯერ ფედერერი (შვეიც) 9 405
3(3). ენდი მარეი (ბრიტ) 8 660
4(5). სტენ ვავრინკა (შვეიც) 6 000
5(6). ტომაშ ბერდიხი (ჩეხ) 5 050
6(4). კეი ნიშიკორი (იაპ) 5 015
7(8). რაფაელ ნადალი (ესპ) 3 770
8(7). დავიდ ფერერი (ესპ) 3 695
9(10). მილოშ რაონიჩი (კან) 2 790
10(11). ჟილ სიმონი (საფ) 2 560

ყოველდღიური სპორტული გაზეთი "ლელო"