ალექსანდრე მეტრეველი იზმირის ტურნირის 1/8-ფინალში გავიდა

იზმირში გრძელდება ჩოგბურთელ ვაჟთა საერთაშორისო ტურნირი (საპრიზო ფონდი 64.000 ევრო), რომელშიც თბილისელი ალექსანდრე მეტრეველიც მონაწილეობს.

ჩვენებურმა სტარტი საკვალიფიკაციო ეტაპიდან აიღო. იქ პირველ წრეში თავისუფალი იყო, მეორეში ბრაზილიელ გუსტავო გუერესს აჯობა - 6:3, 6:1, გადამწყვეტ ორთაბრძოლაში ავსტრიელი მაქსიმილიან ნეუჩრისტი დაამარცხა - 7:5, 5:7, 7:5 და ძირითად ბადეში გააღწია, სადაც 22 სექტემბერს იტალიელ ერიკ ჩრეპალდის დაუპირისპირდა.

დაძაბული პაექრობა ქართველმა ჩოგბურთელმა სამ სეტში მოიგო - 6:4, 6:7, 7:6 და მერვედფინალში უკრაინელი დენის მოლჩანოვის მძლეველ (6:3, 6:3) მიხალ კონეჩნისთან (ჩეხეთი) გაარკვევს ურთიერთობას.

ალექსანდრე მეტრეველი ახლა რეიტინგით 418-ეა. თურქეთში საკვალიფიკაციო ეტაპისა და ძირითადი ბადის პირველი წრის დაძლევით უკვე 13 სარეიტინგო ქულა გამოიმუშავა. ვიმედოვნებთ, რომ იზმირში ის კიდევ წინ წაიწევს.

რაც შეეხება ქართველ ჩოგბურთელ ვაჟთა საკლასიფიკაციო მდგომარეობას, მათი მაჩვენებლები ასეთია: 96 (94). ნიკოლოზ ბასილაშვილი (561 ქულა), 418 (422). ალექსანდრე მეტრეველი (98), 891 (889). გიორგი ცივაძე (18), 1145 (1133). გიორგი ჯავახიშვილი (7), 1402 (1396). ალექსანდრე ბაკში (3), 2058 (2052). ირაკლი მეტრეველი (1).

უკრაინულ ბუჩაში ჩოგბურთელ ქალთა საერთაშორისო ტურნირზე (საპრიზო ფონდი 25.000 დოლარი) წყვილთა პაექრობის რეიტინგფავორიტები არიან სოფიო შაფათავა და ეკატერინე გორგოძე.

პირველ წრეში მათ ალონა ფომინა (უკრაინა) და დეა ჰერდზელასი (ბოსნია) დაამარცხეს - 6:1, 3:6, 10:6.

ქართველთა დუეტი მეოთხედფინალში მარგარიტა ლაზარევას (რუსეთი) და ვალერია სტრახოვას (უკრაინა) შეხვდება. რუსულ-უკრაინულმა ტანდემმა სტარტზე მასპინძლები - ნატალია მალენკო და კატერინა სლიუსარი ჩამოიშორა გზიდან - 7:6, 6:3.

ერთეულებში სოფიო ქვაცაბაია ჰანა პოზნიხირენკოსთან დამარცხდა - 3:6, 3:6.

(იბეჭდება მცირე ცვლილებით)
ყოველდღიური სპორტული გაზეთი "ლელო"