22 წლის ჩოგბურთელი ალექსანდრე მეტრეველი ბოლო პერიოდში წარმატებით ასპარეზობს სხვადასხვა ტურნირში.ალექსანდრეს სამომავლო ამბების გასარკვევად მამამისს, ირაკლი მეტრეველს დავუკავშირდით, რომელიც ამავე დროს, მისი მწვრთნელიცაა. თავდაპირველად კი საუბარი იმაზე დავიწყეთ, თუ რამდენი წლიდან დაიწყო ალექსანდრემ ჩოგბურთზე სიარული და ვინ შეაყვარა მას სპორტის ეს სახეობა.
"ალექსანდრემ ჩოგბურთზე სიარული 5 წლიდან დაიწყო, ხოლო 6 წლიდან უკვე სერიოზულად მოეკიდა ამ საქმეს. ბავშვობიდანვე მისი მწვრთნელი მე ვიყავი".
ალექსანდრე სახელოვანი ალექსანდრე მეტრეველის შთამომავალია. ის გასული საუკუნის 60-70-იანი წლების ჩოგბურთის მსოფლიო ვ
"რასაკვირველია, მის თამაშსა და კარიერაზე მნიშვნელოვანი გავლენა იქონია მისი ბაბუის, ალექსანდრე მეტრეველის სახელმა. როცა ალექსანდრე პატარა იყო, ბაბუამისი მონაწილეობას იღებდა მისი თამაშის განვითარებაში. ჩოგბურთის სიყვარული უმცროს ალექსანდრეს სწორედ ბაბუისგან მოსდის.
ახლა ბაბუა და შვილიშვილი ერთმანეთს არც ისე ხშირად ხვდებიან. უმცროსი ალექსანდრე ტურნირებზე ასპარეზობს, უფროსი კი ჩოგბურთის ფედერაციის პრეზიდენტია. ამის მიუხედავად, უფროსი ალექსანდრე შვილიშვილისთვის რჩევებს არ იშურებს".
ბოლოს მეტრეველმა, როგორც ერთეულთა თანრიგში, ისე წყვილებში ჩიმკენტის საერთაშორისო ტურნირი (15 000 დოლარი) მოიგო. მეტრეველის თამაშს მწვრთნელი დადებითად აფასებს.
"ჩიმკენტში ძალიან კარგი ტურნირი იყო. ალექსანდრემ ისე გაიმარჯვა, პრინციპში, სეტიც არ წაუგია. დღეს კი უკვე მეორე ტურნირი დაიწყო, სადაც პირველივე თამაში მოიგო.
იმ შემთხვევაში, თუ ალექსანდრე მეორე ტურნირის მინიმუმ ნახევარფინალში მაინც გავა, რეიტინგში დაახლოებით მე-200 ადგილამდე აიწევს, რაც საშუალებას მისცემს, "ჩელენჯერის" ტურნირებზე ძირითად ბადეში მოხვდეს. კიდევ უფრო წინ წაწევის შემთხვევაში კი, უკვე მომავალ წელს "დიდი სლემის" ტურნირების საკვალიფიკაციო ეტაპებში თამაშის საშუალებაც შეიძლება მიეცეს".
ალექსანდრე მეტრეველი ამჟამად ATP-ის რეიტინგში 369-ე ადგილზე იმყოფება, თუმცა ჩიმკენტის მოგებული ტურნირის შემდეგ მისი წინსვლა გარდაუვალია. რა თქმა უნდა, ეს ადგილი ახალგაზრდა ჩოგბურთელის მაქსიმუმი არ გახლავთ. რა სამომავლო გეგმები და მიზანი აქვს მეტრეველს? ამის შესახებ დეტალურად გვესაუბრება ირაკლი მეტრეველი.
"გუშინდელი ტურნირის მოგების შემდეგ შეიძლება ითქვას, რომ ალექსანდრემ უკვე წაიწია რეიტინგში 6 საფეხურით. სამწუხაროდ, ეს რეიტინგები ჯერ არ გამოქვეყნებულა.
პირველ რიგში, ალექსანდრეს მიზანი ATP-ის რეიტინგის 100-ეულში მოხვედრაა, რაც მას საშუალებას მისცემს, დიდ ტურნირებში მიიღოს მონაწილეობა. მისი უპირველესი მიზანია, რაც შეიძლება სწრაფად შეაბიჯოს უძლიერესთა ასეულში. ამის შემდეგ კი, რა თქმა უნდა, მხოლოდ წინსვლა იქნება მიზანი.
თუმცა რამდენად სწრაფად მოხდება ეს, დამოკიდებულია დაფინანსებაზე, რომელიც ფაქტობრივად, არ გაგვაჩნია. ძალიან მცირე დაფინანსებას ვიღებთ ჩოგბურთის ფედერაციისგან. საუბარი ისეთ მიზერულ თანხებზეა, რომ თქმაც კი არ მინდა.
თუ იქნება ნორმალური დაფინანსება, ვფიქრობ, რომ მომავალ წელს ალექსანდრე უკვე შეძლებს TOP100-ში შეღწევას. შევიტანე რამდენჯერმე განცხადება სპორტის სამინისტროში დაფინანსების შესახებ და აი, ველოდები პასუხს, იქნებ დადებითად გამოგვეხმაურონ.
ჩიმკენტის ტურნირის შემდეგ ალექსანდრე თბილისში ჩამოვა და უკვე ფინანსებზე იქნება დამოკიდებული, რომელ ტურნირში მიიღებს მონაწილეობას. თან უკვე იწყება "ჩელენჯერები", მაგრამ ისევ ვიმეორებ, ამ ტურნირებზე წასვლა ფინანსებზეა დამოკიდებული, რომელიც არ გაგვაჩნია.
გარდა ამისა, დოჰაშიც ტარდება დეკემბრის ბოლოს ტურნირი, რომელშიც მონაწილეობას ასევე ვგეგმავთ".
ამას წინათ, საქართველოს ვაჟ ჩოგბურთელთა ნაკრებმა (ნიკოლოზ ბასილაშვილი, ალექსანდრე მეტრეველი, გიორგი ცივაძე, გიორგი ჯავახიშვილი, კაპიტანი ვლადიმერ გაბრიჩიძე) გაისად დევისის თასის მე-2 ევროპულ ჯგუფში თამაშის უფლება მიიღო.
ჩვენი ნაკრები წილისყრას ელოდება, რომელიც ნოემბერში ჩატარდება და შესაძლოა, ამ ეტაპს თბილისმა უმასპინძლოს.
"დევისის თასზე ჩვენი ნაკრების გამოსვლა მნიშვნელოვანი იყო. დაახლოებით 10 წელია, ნაკრები ქვედა ჯგუფში იყო, თუმცა ნიკოლოზ ბასილაშვილის და დანარჩენი ბიჭების დამსახურებით, გუნდი მე-2 ევროპულ ზონაში გადავიდა, სადაც უკვე ბევრად ძლიერი ნაკრებებია - ისეთები, როგორებიცაა პორტუგალია, ბელორუსი, მონაკო და ა.შ."
![ATP CUP: ქართველი ჩოგბურთელის პირველი გამარჯვება ერთეულებში! [VIDEO]](/pictures/image7/9c80fb666415ee034f9edfcc165b46ab.jpg "ATP CUP: ქართველი ჩოგბურთელის პირველი გამარჯვება ერთეულებში! [VIDEO]")
